Maraika Abungira Malyamu

OMUKAZI onu arukuzooka kurungi nuwe Malyamu. Mukazi Muisareri arukwikara mu rubuga rwa Nazalesi. Ruhanga nakimanya ngu muntu murungi muno. Nikyo atwekiire maraika we Gabiryeri aije abaze nawe. Omanyire Gabiryeri eki yaizire kumugambira? Katurole.

Gabiryeri amugamba ati: ‘Mirembe iwe anyakuhairwe muno omugisa, Yahwe ali naiwe.’ Malyamu akaba atakarorahoga omuntu onu. Akahunirra habwokuba tarayetegerize maraika eki arukumanyisa. Baitu ahonaho yamugamba atekanane.

Yamugamba: ‘Otatiina Malyamu, oboine embabazi hali Yahwe nikyo arukwija kukukorra ekintu ekyamahano. Oija kutunga omwana. Oyine kumweta Yesu.’

Gabiryeri ayeyongera kusoborra: ‘Aliba mukuru kandi alyetwa omwana wa Ruhanga anyakuli Haiguru Muno. Yahwe alimufora omukama, nkoku Daudi akaba ali. Baitu Yesu aliba Mukama ebiro byona, kandi obukama bwe tibulihwaho!’

Malyamu amukaguza ati: ‘Ebi byona birisoboka bita? Tinswirwe. Tindikwikara n’omusaija, hati nsobora nta kutunga omwana?’

Gabiryeri amugarukamu ati: ‘Amaani ga Ruhanga galikwizira, n’ahabwekyo omwana alyetwa Mwana wa Ruhanga.’ Ayeyongera agamba Malyamu ati: ‘Ijuka Erisabesi mwene wanyu. Abantu bakagamba nti akuzire muno tasobora kuzaara baana. Baitu mu bwangu aija kutunga omwana w’obwojo. Nahabwekyo norora, tiharoho Ruhanga ekyatasobora kukora.’

Ahonaho Malyamu agamba ati: ‘Ndi muzaana wa Yahwe; kibe hali nyowe nkoku ogambire.’ Hanyuma, maraika agenda.

Malyamu ayanguha kugenda kubungira Erisabesi. Erisabesi obuyahuliire iraka lya Malyamu, omwana munda ya Erisabesi agurukaguruka n’okusemererwa. Erisabesi aijuzibwa omwoyo gwa Ruhanga, kandi agambira Malyamu ati: ‘Ohairwe omugisa omuli abakazi.’ Malyamu aikara na Erisabesi okumara nk’emyezi esatu, hanyuma agaruka owabu Nazalesi.

Malyamu ali haihi okuswerwa omusaija arukwetwa Yusufu. Baitu Yusufu obu yakyetegerize nti Malyamu nagenda kuzaara, atekereza nti tikihikire okumuswera. Nukwo maraika wa Ruhanga kumugambira ati: ‘Otatiina okutwara mukazi wawe Malyamu habwokuba Ruhanga nuwe omuhaire omwana.’ Kale Yusufu atahya Malyamu kandi balindirra Yesu okuzaarwa.