Omulingo Ogu Yesu Ayegesaamu

KIRO kimu Yesu agambira omusaija ngu asemerire kugonza mutaahi we. Omusaija akaguza Yesu ati: ‘Mutaahi wange nuwe oha?’ Yesu mali amanyire omusaija onu okwarukutekereza. Omusaija natekereza ngu abantu ab’oruganda rwe n’ediini ye nubo bonka abataahi be. Katuzoole kiki Yesu eki yamugambiire.

Obundi n’obundi Yesu yayegesaga nakozesa oruganikyo. Hati nikyo akora. Agamba ha ruganikyo orurukukwata ha Muyudaya n’Omusamaliya. Tumazire kwega ngu Abayudaya abakukira obwingi tibaagonza Abasamaliya. Kale runu nurwo ruganikyo rwa Yesu:

Kiro kimu hakaba haroho Omuyudaya akaba na sirimuka mu muhanda ogw’orusozi kugenda Yeriko. Baitu abasuma bakamugurukira. Bakamwibaho sente ze kandi bamutera bamuleka nk’afiire.

Hanyuma, nyakatagara Omuyudaya akaija mu muhanda ogu. Yarora omusaija ayatiirwe. Notekereza akakora ata? Mali akacwanganiza orugudo yagenda harubaju orundi, yayegendera. Hanyuma omusaija ondi Omunyadiini nawe akaija. Akaba ali Mulevi. Akemerra? Nangwa, nawe atemerre kukonyera omusaija ayatiirwe. Nosobora kurora nyakatagara n’Omulevi nibasirimuka mumuhanda.

Baitu dora onu ali n’omusaija ayatiirwe. Musamaliya. Nakonyera Omuyudaya. Namutaho omubazi ha bihuta bye. Hanyuma akatwara Omuyudaya omukiikaro nambere asobora kuhumurraho akaba kurungi.

Hanyuma y’okumara oruganikyo runu, Yesu agamba omusaija ayamukagwize ekikaguzo: ‘Mubanu habasatu, noha ayayefoire nka mutaahi w’omusaija ayatiirwe? Nyakatagara, rundi Omulevi, rundi Omusamaliya?’

Omusaija agarukamu ati: ‘Omusamaliya. Akagirra embabazi omusaija ayatiirwe.’

Yesu agamba ati: ‘Ohikire. Kale genda okolege abandi nkoku ogu yakozere.’

Torukugonza omulingo Yesu ogu ayegesaamu? Tusobora kwega ebintu ebikuru kakuba tuhuliriza Yesu ebyakugamba mu Baibuli, tinukwo kiri?