Obulyo Habwaki Abakristayo Abamananu Batakozesa Omusalaba omu Kuramya

ABANTU obukaikuru n’obukaikuru bagonza omusalaba kandi bagutekamu ekitiinisa. Ekitabu Encyclopædia Britannica kyeta omusalaba “akamanyiso akakuru ak’ediini y’Obukristayo.” Nobukiraba kiri kityo, Abakristayo abamananu tibakozesa musalaba omu kuramya. Habwaki?

Ensonga enkuru eri nti Yesu Kristo atafere ha musalaba. Ekigambo ky’Oruyonani ekikuhindurwa “musalaba” kiri stau·rosʹ. Omu mananu ekigambo kinu kimanyisa “Omuti oguterekereire rundi empagi.” The Companion Bible ekyoleka kurungi: “[Stau.ros’] tikimanyisa mbaho ibiri ezicwanganizemu, Gonze n’omubihandiiko eby’Oruyonani [Ekiragano Ekihyaka] busamu kigambo kyoona ekikumanyisa embaho ebiri, orumu rwekikire omuli orundi.”

Omu byahandiikirwe bingi, abahandiiki ba Baibuli bakozesa ekigambo ekindi nibamanyisa omuti nambere Yesu yaferire. Nikyo kigambo ky’Oruyonani xyʹlon. (Engeso 5:30; 10:39; 13:29; Abagalatiya 3:13; 1 Petero 2:24) Ekigambo kinu kimanyisa “orubaho rundi omwigo, rundi omuti.”

Nikisoborra obulyo habwaki [empagi] yakozesebwaga kuitiraho abantu, ekitabu ekyetwa Das Kreuz und die Kreuzigung (Omusalaba n’Okubambwa), ekyahandiikirwe Hermann Fulda, kigamba: “Emiti tiyabaga mu buli kicweka ekyabaga kikomerwe kwitiramu abantu ababaga bacwerirwe ogw’okufa. Nahabwekyo empagi yasimbwaga omwitaka omu kikaro ekyo. Ha mpagi zinu, abacwi b’ebiragiro niho bahanikwaga emikono yabu ebohirwe haiguru rundi eterirwemu emisumali, kandi emirundi ekukira obwingi n’amaguru gabu gasibirwe rundi nago gaterirwemu emisumali.”

Kyonka obwakaiso obukuki’rayo kimu, buli omu Kigambo kya Ruhanga. Omukwenda Paulo akagamba: “Kristo akatucungura omu kukyenwa kwebiragiro, nafoka okukyenwa habwaitu: baitu kikahandikwa ngu Akyenerwe wena ahanikirwe ha muti.” (Abagaratiya 3:13) Hanu Paulo akaba najuliza Ekyebiragiro 21:22, 23, ekibaza ha muti baitu hatali omusalaba. Habwokuba kwita omuntu omu mulingo ogu kyamuforaga “akyenerwe,” tikyakubaire kirungi Abakristayo kuhanika ebisisani bya Yesu ahanikirwe ha muti omu maju gabu.

Tiharoho bujulizi bukwoleka ngu omu myaka 300 eyahondireho hanyuma y’okufa kwa Yesu, ngu abayeyetaga Abakristayo bakakozesa omusalaba omu kuramya. Kyonka, omu kyasa eky’akana omukama omukafiiri Constantine aketeraniza ha kitebe ky’Abakristayo abajeemu, yafoora omusalaba kuba kamanyiso k’ediini y’Ekikristayo. Constatine nobwaraba yabaire n’ebigendererwa ki, omusalaba tigwine kakwatiraine koona na Yesu Kristo. Omu mananu omusalaba, gwine endugirro omu bukafiiri. Ekitabu New Catholic Encyclopedia kigamba: “Omusalaba gwasangwaga omu bantu Obukristayo butakabaireho n’omubantu abatali Bakristayo gwakozesebwaga.” Ebitabu ebindi bikwataganiza omusalaba n’okuramya ebintu ebyahangirwe hamu n’obuzizo bw’ekikafiiri ebirukukwata ha busihani.

Hati habwaki akamanyiso kanu ak’ekikafiiri katandikire kukozesebwa? Nikizoka, kworobeza abakafiiri kufooka “Bakristayo.” Nobukiraba kiri kityo, Baibuli ejumirra kukozesa ekintu kyoona eky’ekikafiiri omu kuramya. (2 Abakolinso 6: 14-18) Kandi nabwo ebyahandiikirwe bikugira kuramya ebisisani okwa buli mulingo. (Okuruga 20:4, 5; 1 Abakolinso 10:14) Nahabwekyo, Abakristayo baina obulyo obukumara butakozesa omusalaba omu kuramya.a