Di Obu Kirukwetagisa Omunyaanya Itwe Kuswekerra Omutwe Gwe​—Kand Habwaki?

Ni di obu kirukwetagisa omukazi Omukristaayo kuswekerra omutwe gwe n’ekitambaara obu kirukuhika ha by’okuramya, kandi habwaki? Katwetegereze omulingo omukwenda Paulo yabalizeho ensonga enu. Natuha obuhabuzi oburukutukonyera kukora ecwamu enungi kandi ezirukuhaisa Yahwe ekitiinisa. (1 Abakolinso 11:3-16) Paulo n’abazaaho ensonga isatu: (1) Omukazi eby’arukuba n’agenda kukora ebirukumwetagisa kusweka omutwe gwe, (2) ekiikaro n’abo abarukuba bakirumu hamu (3) n’ekigendererwa ky’okuhondera omusingi gunu.

Eby’arukuba n’agenda kukora. Paulo akabazaaho ebintu bibiri: okusaba hamu n’okutebeza. (enkarra 4, 5) Okusaba, guli mulingo gw’okubaza kandi kuramya Yahwe. Omu kasumi kanu, okutebeza okurukubazibwaho omu nkarra zinu nikutwarramu okwegesa kwona okurukusigikirra ha Baibuli oku Omukristaayo akora. Hati, Paulo akaba namanyisa ngu omukazi asemeriire kusweka ha mutwe gwe buli murundi araaba n’agenda kusaba rundi kwegesa Baibuli? Nangwa. Nikisigikirra ha kiikaro eky’arukuba arumu n’abo abarukuba baroho.

Ekiikaro, n’abo abarukuba bakirumu. Paulo omu bigambo bye akabazaho ebiikaro by’emirundi ebiri​—omu ka hamu n’omu kitebe. Akagamba: “baitu omutwe gwomukazi musaija; . . . Baitu omukazi obwasaba rundi obwatebeza, anyina omutwegwe gutaswekeriirwe, buli akwasize ensoni omutwegwe” (enkarra 3, 5) Omu ntekeniza y’omu ka, omusaija nuwe Yahwe ataireho kuba omutwe gw’omukazi. Kakuba omukazi atatekamu obusobozi bwa iba ekitiinisa, akatandika kutwara obujunanizibwa Yahwe obu ahaire omusaija n’aija kuba n’aswaza iba. Eky’okurorraho, kakuba kimwetagisa kwegesa omwegi wa Baibuli iba ali haihi, asemeriire kwoleka ngu n’atekamu ekitinisa omutwe gweka obu n’ayesweka ha mutwe gwe. Iba obwakuba abatiziibwe rundi atabatiziibwe, asemeriire kwesweka omutwe habwoku omusaija nuwe omutwe gw’eka.a Kakuba aba n’agenda kusaba rundi kutebeza baitu haroho omutabani omuto anyakubatiziibwe, nabwo asemeriire kusweka omutwe gwe, tikiri habwokuba omutabani mutwe gw’eka, baitu habw’obujunanizibwa obuhairwe abasaija ababatiziibwe omu kitebe Ekikristayo.

Ekiikaro kyakabiri Paulo eki yabalizeho nikyo ekitebe. Akagamba ati: “Baitu omuntu wena araba nasisana okuleta empaka, itwe titunyina engeso erukusisa eti, nobuzakuba ekanisa za Ruhanga.” (orukarra 16) Omu Kitebe Ekikristaayo, obwebembezi buhebwa abasaija ababa babatiziibwe. (1 Timoseo 2:11-14; Abaheburaniya 13:17) Abasaija bonka nubo abahebwa obujunanizibwa bw’okurolerra entama za Yahwe obu nibahereza nk’abagurusi rundi abahereza. (Engeso Ezabakwenda 20:28) Obwire obumu, nikisobora kwetagisa omukazi Omukristayo kukora omulimo ogusemeriire kukorwa omusaija anyakubatiziibwe. Eky’okurorraho, n’asobora kwebembera oruso’rokano orw’okugenda omu buhereza kakuba haba hataroho ow’oruganda. Rundi n’asobora okwegesa omwegi we owa Baibuli ali n’ow’oruganda anyakubatizibwe.b Kusigikirra nk’oku emirimo enu yoona eri ntekaniza y’ekitebe, asemeriire kuswekerra omutwe gwe kwoleka ngu n’atwara obujunanizibwa obusemeriire kukorwa omusaija anyakubatiziibwe.

Kandi ha rubaju orundi, haroho emiringo nyingi ey’okuramya nambere munyaanya itwe obu kirukuba kitarukumwetagisa kusweka omutwe gwe. Ekyokurorraho, tikirukumwetagisa kubanza kusweka omutwe gwe obwarukuba n’agarukamu omu nso’rokano, kutebeza nju ha nju obwarukuba ali na musaija we rundi n’omusaija ondi anyakubatiziibwe, kwega rundi kusaba n’omwana we atakabatiziibwe. Baitu nabwo, nihasobora kubaho ekintu ekitutabalizeho hati. Kakuba munyaanya itwe aba atamanyire eky’okukora, n’asobora kweyongera kuseruliza.c Baitu nabwo kakuba alemwa kukyetegereza kandi omuntu we ow’omunda amusindikiriza kwesiba ekitambaara, n’aija kuba atanagire omusango nk’oku kyolekerwe omu kisisani.

Ekigendererwa. Omu rukarra orwa 10, harumu ensonga ibiri habwaki omukazi Omukristaayo asemeriire kusweka ha mutwe gwe: “Habwa kinu kisemeriire omukazi okuba nakokuro’raho akamani ha mutwe habwa bamaraika.” Eky’okubanza, wetegereze ebigambo, “nakokuro’raho akamani.” Kweswekerra ha mutwe kali k’okurorraho akarukwoleka ngu n’ayorobera obusobozi obu Yahwe ahaire abasaija ababatiziibwe abali omu kitebe. Nahabweki, aba nayoleka okugonza n’obwesigwa hali Yahwe Ruhanga. Ensonga eyakabiri nesangwa omu bigambo “habwa bamaraika.” Kikwataho kita ebihangwa binu eby’omwoyo kandi eby’amaani omukazi obwayeswekerra ha mutwe?

Abamaraika nibagonza kurora obusobozi bwa Yahwe nibutebwamu ekitiinisa omu iguru n’omu nsi. Kandi nabo baine omulingo bagasirwamu obu barora abantu abatahikiriire niborobera Yahwe. Nabo nikibetagisa kworobera entekaniza ya Yahwe​—ekintu abamaraika bamu balemerwe kukora omu busumi bwa kara. (Yuda 6) Bamaraika nibasobora kurora omukazi Omukristaayo amanyire ebintu bingi n’okukira omusaija anyakubatiziibwe omu kitebe, rundi n’asobora kuba aseserweho amagita n’agenda kulema hamu na Yesu Kristo omwiguru baitu; nayorobera entekaniza ey’obwebembezi omu kitebe. Omukazi nk’ogu n’aba nagenda kuba omu kiikaro ekya haiguru ekirukukira eky’abamaraika. Kinu ka nikiba kyokurorraho kirungi omukazi eky’arukuba ateriireho abamaraika! Mali, gunu mugisa gw’amaani banyaanya itwe ogu baine kwoleka obuhulizi omu maiso g’obukaikuru n’obukaikuru bw’abamaraika abesigwa.