Kuterra Bendera Etamama, Kutera Akaruru, Hamu n’Emirimo Etali y’Ekinyamahe

Kuterra ebendera etamama. Abakaiso ba Yahwe baikiriza ngu kwinamira ebendera rundi kugiterra etamama, eky’abantu bakira kukora ha bwire bw’okuzina ekizina ky’ihanga, kikorwa ky’okuramya ekirukwoleka ngu okujunwa nikuruga hali ihanga n’abebembezi balyo hatali Ruhanga. (Isaya 43:11; 1 Abakolinso 10:14; 1 Yohana 5:21) Ekyokurorraho kimu nikyo eky’omukama Nebukadeneza owa Baburoni. Habw’okugonza kwoleka ekitinisa kye hamu n’obwekambi bwe obw’okuramya ba ruhanga be, omulemi ow’amaani onu akakora ekisisani eky’ezabu hanyuma yaragira ngu buli muntu weena akiinamire, obu ekizina ekyali nk’ekizina kyihanga nikiterwa. Baitu, Abayudaya basatu​—Saduraki, Mesaki, hamu n’Abedenego—​bakanga kwinamira ekisisani, n’obu kiraaba kyali nikisobora kubarugiramu okwitwa.​—Danieri, Esuura 3.

Omuhandiki arukwetwa Carlton Hayes akagamba ngu, omu kasumi kanu, “ebendera k’okurorraho kakuru akoleka okugonza n’omwoyo gw’ihanga.” “Abasaija baihaho enkofiira obu baba nibarabyaho ebendera; Abahandiki bahandika ebizina ebihaisaniza ebendera kandi n’abaana bagizinira ebizina.” Akongera yagamba ngu, haroho “ebiro ebikuru” eby’okuramizaho ihanga. Nk’ekyokurorraho, omu Amerika baramya ihanga ebiro bbina okwezi kwa Julaayi. Kandi ha kiro kinu, habaho abo ababarukweta “abahikiriire” hamu na “yekaru rundi amaramizo” eby’okuramizaamu. Ha mukoro gumu omu ihanga lya Brazil, omukuru omu ow’amahe akagamba ngu: “Ebendera ehebwa ekitinisa kandi eramibwa nk’oku abantu baramya amahanga gaabo. . . . Ekitabu ekirukwetwa Encyclopedia Americana nikigamba ngu “ebendera etwarwa kuba erukwera nk’oku abantu barora omusalaba.”

Ekitabu nikyo kimu omu bwire bweyumaho kikongera kyagamba ngu ebizina by’ihanga “byoleka omwoyo gw’ihanga kandi habamu ebigambo by’okusaba Ruhanga kwebembera n’okulinda abantu rundi abalemi balyo.” Nahabweki, Abakaiso ba Yahwe bahikire kugamba ngu emikoro y’ihanga erukutwarramu okuterra ebendera etamaama hamu n’okuzina ebizina by’ihanga bikorwa by’ediini. Ekitabu ekirukwetwa The American Character, obu kikaba nikibaza ha baana b’Abakaiso ba Yahwe omu masomero g’omu ihanga ly’Amerika kwanga kwinamira ebendera rundi kurahira kusagika ihanga lyabu, kikagamba ngu: “Omu misango erukukira obwingi, kooti eya ha iguru eyolekere ngu emikoro enu eri y’ediini omu mulingo gwayo.”

Abakaiso ba Yahwe bahereza abantu abandi ekitiinisa kyabu n’obukiraaba ngu bo tibakora emikoro enu habwokuba Ebyahandikirwe tibirukugisagika. Baha ekitinisa ebendera nk’obumanyiso obw’amahanga kandi baikiriza ngu abalemi ba Gavumenti nibo “abalemi abakuru” abakora nka ‘abakwenda ba Ruhanga.’ (Abarumi 13:1-4) Nahabweki, Abakaiso ba Yahwe tuterererwa kusaba “habwabakama nabakuru bona.” Ekigendererwa kyaitu kiri ngu “nukwo tuikalege nobusinge nokuhumura omu biro byaitu, omu kutina Ruhanga kwona nomu kwerinda.”​—1 Timoseo 2:2.

Kuteera akaruru. Abakristaayo b’amananu tibajumirra obugabe bw’abandi kuteera akaruru. Tibahakaniza karuru kandi bakwataniza n’abalemi ababa bakomerwe. Baitu, tibaba n’orubaju orubasagika omu by’obulemi by’ihanga. (Matayo 22:21; 1 Petero 3:16) Omukristaayo asemeriire kukora ki kakuba aba naikara omu ihanga nambere buli muntu weena arukwetagisibwa kukoma rundi naikara omu nsi nambere abantu banoba omuntu weena atarukutera akaruru? Ekintu ekyahikire hali Saduraki, Mesaki, hamu na Abedenego nikisobora n’okuhika hali Omukristaayo weena. Abasigazi banu bakagenda bahika omu kyeya kya Dura. Omukristaayo nauwe nasobora kucwamu kugenda nambere barukukomera kakuba omuntu we ow’omunda amwikiriza. Baitu, tasemeriire kuba n’orubaju arukusagika. Asemeriire kwijuka emisingi enu mukaaga:

1. Abahondezi ba Yesu “tibali bensi.”​—Yohana 15:19, NW.

2. Abakristaayo bakikirra Kristo n’Obukama bwe.​—Yohana 18:36; 2 Abakolinso 5:20.

3. Ekitebe ky’Abakristaayo kiri omu bumu omu nyikiriza, kandi boona bateranizibwa hamu okugonza nk’okwa Kristo.​—1 Abakolinso 1:10; Abakolosai 3:14.

4. Abo abakoma omwebembezi nabo baba nibajunanizibwa ebikorwa bye.​—Wetegereze omusingi oguli omu 1 Samuiri 8:5, 10-18 hamu na 1 Timoseo 5:22.

5. Abaisareri obu basabire kutunga omukama, Yahwe akakitwara ngu baali bamwangire.​—1 Samuiri 8:7.

6. Abakristaayo basemeriire kuhurra baine obugabe bw’okutebeza amakuru amarungi agarukukwata ha Bukama bwa Ruhanga hali abantu ab’omu bitebe byona eby’obulemi batarukutiina.​—Matayo 24:14; 28:19, 20; Abaheburaniya 10:35.

Emirimo etali y’ekinyamahe. Omu nsi ezimu, omuntu obu ayanga emirimo y’ekinyamahe, gavumenti emuha emirimo endi ey’okukora habw’akasumi. Kakuba naitwe twesanga tuhikirweho ekintu ekya mulingo gunu, tusemeriire kusaba Yahwe, kandi tusoborre Omukristaayo anyakukuzire omu by’omwoyo, kandi hanyuma tukole encwamu nitusigikirra ha muntu waitu ow’omunda anyakutendekerwe.​—Enfumo 2:1-5; Abafiripi 4:5.

Ekigambo kya Ruhanga kituragira “okworoberaga abalemi, nabobusobozi, nokuhu’raga, nokwetekanirizaga omulimo gwona omurungi, . . . okuculera kwona.” (Tito 3:1, 2) Hati nitusobora kwekaguza ebikaguzo binu: ‘Omulimo ogutali gw’ekinyamahe ogu bandagiire kukora gurandetera kugwera orubaju omu by’obulemi rundi kwetahya omu bikorwa by’ediini ey’ebisuba?’ (Mika 4:3, 5; 2 Abakolinso 6:16, 17) ‘Obu ndaikiriza omulimo gunu, kiranyanguhira kuhikiriza obujunanizibwa bwange nk’Omukristaayo rundi nigwija kundemesa kubuhikiriza?’ (Matayo 8:19, 20; Abefeso 6:4; Abaheburaniya 10:24, 25) ‘Kandi ha rubaju orundi, okukora omulimo ogu kiransobozesa kwongera ha buhereza bwange nk’Omukristaayo, gamba nk’okutebeza amakuru amarungi?’​—Abaheburaniya 6:11, 12.

Kakuba Omukristaayo ayecweramu wenka kukora omulimo ogutali gw’ekinyamahe omu kikaro ky’okugenda omu nkomo, Abakristaayo abandi basemeriire kutamu ekitinisa encwamu ye. (Abarumi 14:10) Kandi kakuba ahurra ngu tarukusobora kukora omulimo ogu, abandi nabwo basemeriire kuha ekitinisa encwamu ye.​—1 Abakolinso 10:29; 2 Abakolinso 1:24.