Omunaara gwa Baberi

Hanyuma y’Okusandaara kw’Amaizi, batabani ba Nuha bakazaara abaana baingi. Amaka gakakanya gararanga omu bicweka bingi eby’ensi nk’oku Yahwe akaba abaragiire.

Baitu abantu abamu batorobere Yahwe. Bakagamba: ‘Leka twombeke orubuga nukwo twikale omu kiikaro kimu. Nitwija kwombeka omunaara oguraihire muno kuhika omu iguru. Obu nubwo abantu baratumanya.’

Ekintu kinu kitasemeze Yahwe, nahabweki akacwamu kubalemesa. Omanyire nk’oku yakikozere? Aho n’aho Ruhanga akaburanganiza orulimi rwabo batandika kubaza endimi ezirukwahukana. Kusigikirra nk’oku bakaba batakyayetegerezangana, bakaleka omulimo gw’okwombeka. Orubuga oru bakaba nibombeka rukatandika kwetwa Baberi, ekirukumanyisa “Kuburanganizibwa.” Eby’okwombeka abantu bakabihwaho batandika kuraranga ensi yoona. Kandi hona hona nambere bagendaga bayeyongeraga kukora ebintu ebibi. Baitu hali hakyaroho abantu abarukugonza Yahwe? Nitwija kugarukamu ekikaguzo kinu omu suura erukuhonderaho.