ISOMO 38
Yoleka Okusiima habw’Ekisembo eky’Obwomeezi
Haroho ebintu bingi ebitusobora kukora kandi tukegondezaamu habwokuba tuli bomeezi. N’obuturukuba twine ebizibu, haroho ebintu ebimu omu bwomeezi ebitusobora kwegodezaamu. Nitusobora tuta kwoleka okusiima habw’ekisembo eky’obwomeezi? Kandi nsonga ki eyerukukirayo obukuru eyetuletera kukora eki?
1. Habwaki tusemeriire kusiima habw’ekisembo eky’obwomeezi?
Tusemeriire kusiima habw’obwomeezi obutwine habwokuba kiri kisembo kuruga hali Isiitwe ow’okugonza, Yahwe. Nuwe “ensoro yobwomezi”—nuwe yahangire ebintu byona ebyomeezi. (Zabuli 36:9) “Nuwe wenka abaha bona obwomezi, nokwikya orwoya, nebintu byona.” (Engeso Ezabakwenda 17:25, 28) Yahwe atuha ebiturukwetaaga kwikara tuli bomeezi. Baitu tagarukira aho, atusobozesa kwegondeza omu bwomeezi.—Soma Engeso Ezabakwenda 14:17.
2. Nitusobora tuta kwoleka Yahwe ngu nitusiima habw’ekisembo eky’obwomeezi?
Kuruga akasumi maama waawe obuyatwaire enda, Yahwe akatandika kukufaaho. Omu ha baheereza ba Ruhanga arukwetwa Daudi akaterekerezebwa omwoyo ogurukwera yagamba ati: “Amaiso gawe gakarora omubiri gwange gutakahikiriire.” (Zabuli 139:16) Obwomeezi bwawe bw’omuhendo hali Yahwe. (Soma Matayo 10:29-31.) Kimusaasa muno omuntu obw’acwamu kweyita.a (Okuruga 20:13) Kandi kisaaliza Yahwe obutunagiriza obwomeezi bwaitu tukabuteeka omu kabi rundi obututafaayo kulinda obwomeezi obw’abandi. Obutulinda obwomeezi bwaitu hamu n’obw’abandi, twoleka ngu nitusiima habw’ekisembo kinu ekirungi.
YEGA EBIRUKUKIRAHO
Manya emiringo ey’osobora kwolekamu ngu n’osiima habw’ekisembo eky’obwomeezi.
3. Rolerra kurungi obwomeezi bwawe
Abakristaayo abehaireyo hali Yahwe bakozesa obwomeezi bwabo bwona kumuheereza. Nikisisana oti rundi bakahayo emibiri yabo nk’ekihongwa hali Yahwe. Musome Abarumi 12:1, 2, hanyuma mubazeeho ebikaguzo binu:
Kiki ekisemeriire kukwekambisa kurolerra kurungi obwomeezi bwawe?
Miringo ki ey’osobora kurolerramu obwomeezi bwawe?
4. Wegendereze nukwo otangire okuhutaara rundi okufa
Baibuli netwekambisa kwetantara kukora ebintu ebisobora kuteeka obwomeezi bwaitu omu kabi. Mutekeho VIDIYO kumanya ebintu ebimu eby’osobora kukora kwerinda.
Musome Enfumo 22:3, hanyuma mubazeeho omulingo iwe hamu n’abandi musobora kwerinda . . .
omu ka yawe.
nambere okorra.
obworukuba n’ozaana emizaano.
obworukuba n’ovuga rundi nibakuvuga.
5. Otakora kubi obwomeezi bw’omwana ow’atakazairwe
Omu mulingo gw’ekizina, Daudi akasoborra ngu Yahwe n’amanya buli kimu ekihika ha mwana ow’atakazairwe. Musome Zabuli 139:13-17, hanyuma mubazeeho ekikaguzo kinu:
Kusigikirra hali Yahwe, obwomeezi bw’omuntu butandika omukazi obw’atwara enda rundi ha kuzaara?
Ebiragiro bya Yahwe omu Isaleri eyakara byalindaga abakazi abaine enda n’abaana abatakazairwe. Musome Okuruga 21:22, 23, hanyuma mubazeeho ebikaguzo binu:
Yahwe yaroraga ata omuntu ayaitaga omwana ow’atakazairwe atakigenderiire?
Ayehurra ata kakuba omuntu akikora akigenderiire?b
Oyehurra ota ha mulingo Yahwe aroramu ensonga enu?
N’omukazi ow’arukumanya obwomeezi kintu kikuru n’asobora kwehurra ngu kwihamu enda nikyo kintu kyonka eky’asemeriire kukora. Musome Isaya 41:10, hanyuma mubazeeho ebikaguzo binu:
Kakuba omukazi aba n’asindikirizibwa kwihamu enda, asemeriire kwiha nkaha obukonyezi? Habwaki?
ABANTU ABAMU BAGAMBA: “Omukazi nuwe aine kucwamu obwaraaba n’agonza kwihamu enda—habw’okuba mubiri gwe.”
Kiki ekirukukugumya ngu obwomeezi bw’omukazi ow’aine enda hamu n’omwana ow’atakazairwe bwomuhendo hali Yahwe?
OYEGERE KI?
Baibuli n’etwegesa kugonza, kutekamu ekitiinisa hamu n’okulinda ekisembo eky’obwomeezi Yahwe eky’atuhaire. Kinu nikitwarramu obwomeezi bwaitu hamu n’obw’abandi.
Kweijukyamu
Habwaki obwomeezi bw’omuntu bw’omuhendo hali Yahwe?
Yahwe ayehurra ata omuntu obwaita mutaahi we akigenderiire?
Habwaki n’osiima habw’ekisembo eky’obwomeezi?
SERULIIRIZA
Nitusobora tuta kusiima Yahwe habw’ekisembo ky’obwomeezi?
Manya eky’okugarukamu eky’ekikaguzo kinu, Ruhanga n’asobora kuganyira omukazi ayaihiremu enda?
“Baibuli Egamba Ki ha Kwihamu Enda?” (Ekicweka kinu kiri ha mukura)
Manya omulingo Yahwe aroramu obwomeezi kisemeriire kukwataho omulingo tukomamu eby’emizaano.
“Osemeriire Kuzaana Emizaano ey’Erateeka Obwomeezi Bwawe omu Kabi?” (Awake!, eya Okitobba 8, 2000)
Baitu kakuba omuntu aba aine ebitekerezo eby’okweyita? Wetegereze omulingo Baibuli esobora kumukonyera.
a Yahwe afaaho muno abo ab’emitima ey’ecwekere. (Zabuli 34:18) Namanya obusaasi obusobora kuleetera omuntu ekitekerezo eky’okweyita, kandi n’agonza kumukonyera. Kumanya omulingo obukonyezi bwe busobora kukukonyera kurwanisa ebitekerezo eby’okweyita, soma ekicweka “Ningonza Kufa—Baibuli n’Esobora Kunkonyera Obundukuba Nyine Ebitekerezo eby’Okweyita?” ekiri omu kicweka “Seruliiriza” omu isomo linu.
b Abo abaihiremu enda tibasemeriire kwecwera omusango ekihinguraine—Yahwe n’asobora kubaganyira. Kumanya ebirukukiraho, rora ekicweka “Baibuli Egamba Ki ha Kwihamu Enda?” ekiri omu kicweka Seruliiriza eky’isomo linu.