Habwaki Osemeriire Kwehayo Kandi Okabatizibwa?

Ohayo obwomeezi bwawe hali Yahwe obw’omuraganiza kurabira omu kusaba ngu noija kuramya uwe wenka kandi ngu noija kwebembeza eby’agonza omu bwomeezi bwawe. (Zabuli 40:8) Hanyuma, obatizibwa. Obw’okora oti, oyoleka abandi ngu oyehaireyo. Okwehayo hali Yahwe okabatizibwa niyo encwamu erukukirayo obukuru eitusobora kukora. Kiki ekisobora kukwekambisa kukora encwamu enu ey’amaani kandi ey’erahindura obwomeezi bwawe?

1. Kiki ekyekambisa omuntu kucwamu kwehayo hali Yahwe?

Okugonza nukwo kutwekambisa kwehayo hali Yahwe. (1 Yohana 4:10, 19) Baibuli etutererra eti: “Ogonzege [Yahwe] Ruhanga wawe nomutima gwawe gwona, nobwomezi bwawe bwona, namagezi gawe gona, namani gawe gona.” (Marako 12:30) Twoleka ngu nitugonza Ruhanga hatali omu bigambo honka, baitu n’omu bikorwa byaitu. Nk’oku omusaija n’omukazi abarukugonzangana muno bacwamu kutaaha obuswere, naitwe okugonza okutwiniire Yahwe kutwekambisa kwehayo hali Yahwe n’okubatizibwa.

2. Migisa ki Yahwe ey’aha Abakaiso be ababatiziibwe?

Obw’orabatizibwa, noija kweteraniza ha ka ya Yahwe ey’erumu okusemererwa. Noija kurora okugonza kwe omu miringo nyingi, kandi noija kweyongera kumwirra haihi kukira hati. (Soma Maraki 3:16-18.) Oihireho kuba oine Yahwe nka So, noija n’okutunga eka ey’eby’omwoyo ey’ab’oruganda na banyaanya itwe kuruga omu nsi yoona abarukugonza Yahwe hamu naiwe. (Soma Marako 10:29, 30.) Ky’amananu ngu, haroho amadaara ag’osemeriire kurabamu otakabatiziibwe. Nikikwetagisa kwega hali Yahwe, kumugonza, n’okwikiririza omu Mwana we. Hanyuma, osemeriire kuhayo obwomeezi bwawe hali uwe. Kakuba okora ebintu ebi, kandi okabatizibwa noija kuba omu muhanda ogurakusobozesa kwegondeza omu bwomeezi ebiro n’ebiro. Ekigambo kya Ruhanga kigamba ngu: “Ekyo . . . nikibajuna kandi oku nukwo okubatizibwa.”​—1 Petero 3:21, “NWT.”

YEGA EBIRUKUKIRAHO

3. Itwena tusemeriire kucwamu n’oha outuraheereza

Omu Isaleri eya kara, abantu abamu bakatekereza ngu nibasobora kuheereza Yahwe na ruhanga ow’ebisuba arukwetwa Bbaali ha murundi gumu. Baitu Yahwe akasindika nabbi we Eriya kuterekereza entekereza enu ey’etahikire. Musome 1 Ekyabakama 18:21, hanyuma mubazeeho ekikaguzo kinu:

• Abaisaleri bakaba baine kukora ncwamu ki?

Nk’Abaisaleri, naitwe twine kukomamu nooha outuraheereza. Soma Luka 16:13, hanyuma mubazeeho ebikaguzo binu:

• Habwaki tutasobora kuramya Yahwe hamu n’omuntu ondi rundi ekintu ekindi ha murundi gumu?

• Twoleka tuta ngu Yahwe nuwe tucwiremu kuramya wenka?

4. Wecumiitirize ha kugonza Yahwe okw’akwiniire

Yahwe atuhaire ebisembo bingi eby’omuheendo? Mutekeho VIDIYO.

VIDIYO: Kuhayo Ebisembo Byawe Hali Ruhanga (3:04)

Miringo ki emu Yahwe ey’akwolekeremu okugonza? Musome Zabuli 104:14, 15 na 1 Yohana 4:9, 10, hanyuma mubazeeho ebikaguzo binu:

• Bisembo ki kuruga hali Yahwe ebyorukukirayo kusiima?

• Ebisembo ebi nibikuletera kwehurra ota hali uwe?

Obututunga ekisembo ekiturukugonza muno, tugonza tusiime ogu anyakukituhaire. Musome Ekyebiragiro 16:17, hanyuma mubazeeho ekikaguzo kinu:

• Kutekerezaaho ebintu byona Yahwe eby’akukoliire, nikikwekambisa kumuha ki?

5. Obw’orahayo obwomeezi bwawe hali Yahwe noija kutunga emigisa nyingi muno

VIDIYO: Kuzaana Omupiira Nikyo Kyali Nikikirayo Obukuru omu Bwomeezi Bwange (5:45)

• N’obukiraaba ngu omuzaani w’omupiira onu yagonzaaga muno kuguzaana, habwaki yagulekere?

• Akacwamu kuhayo obwomeezi bwe hali Yahwe, omu kiikaro ky’okwemarra omu kusamba omupiira. Notekereza akakora encwamu enungi? Habwaki?

Omukwenda Paulo obw’akaba atakafookere Omukristaayo, akaba n’akora n’amaani kufooka ruranganwa. Akasoma ebiragiro by’Ekiyudaaya kandi yayegesebwa omwegesa rurangaanwa. Baitu ebi byona akabirekaho yafooka Mukristaayo. Paulo akeijukya? Musome Abafiripi 3:8, hanyuma mubazeeho ebikaguzo binu:

• Habwaki Paulo yagambire ngu byona ebiyakozere atakafookere Mukristaayo bikaba biri ‘nk’esaabu’?

• Omu kiikaro ky’okufeerwa, akatunga birungi ki?

• N’otekereza kiki ekirakuletera kuba n’obwomeezi oburungi, kuheereza Yahwe, rundi kwemarra ha bintu ebindi?

OYEGERE KI?

Okugonza nukwo kutwekambisa kwehayo hali Yahwe kandi tukabatizibwa.

Kweijukyamu

• Habwaki Yahwe nuwe tusemeriire kugonza n’omutima gwaitu gwona kandi nuwe tukaramya wenka?

• Yahwa aha emigisa Abakaiso be ababatiziibwe?

• Wakugondeze kwehayo hali Yahwe?

SERULIIRIZA

Rora ensonga habwaki omuzini n’ow’eby’emizaano baacwiremu kwehayo hali Yahwe.

Ensingaanto Nibekaguza​—Ndakozesa nta Obwomeezi Bwange?​—Kwijuka ebya Kara (6:54)

Manya ensonga ezindi habwaki osemeriire kwehayo.

“Habwaki Osemeriire Kwehayo Hali Yahwe?” (Watchtower, eya Janwali 15, 2010)

Omu vidiyo ey’ekizina, wetegereze okusemererwa abo abeehayo hali Yahwe okubatunga.

Nimpayo Obwomeezi Bwange Haliiwe (4:30)

Omu kicweka “Kumara Emyaka Nayekaguzaaga, ‘Habwaki Tuli Omu Nsi?’” wetegereze kiki ekyayekambisize omukazi kwekebiija ebigendererwa bye.

“Baibuli Ehindura Obwomeezi” (Watchtower, eya Novemba 1, 2012)