Weyihiremu Kimu Entekereza Yoona ey’Erukuhakaniza Amagezi ga Ruhanga!

1. Buhabuzi ki omukwenda Paulo y’ahaire Abakristaayo abaseserweho amagita?

OMUKWENDA PAULO akaha obuhabuzi bw’amaani. Buhabuzi ki obuyahaire? Akagamba ati: “Mutasisanizibwa nkobusinge bunu.” (Bar. 12:2) Ebigambo binu Paulo akabihandiikira Abakristaayo ab’omu kyasa ky’okubanza. Habwaki y’abahaire obuhabuzi bunu obw’amaani kandi kunu Abakristaayo banu boona baali behaireyo hali Ruhanga kandi baseserweho amagita?​—Bar. 1:7.

2-3. Bintu ki Sitaani abyakozesa kulengaho kutwiha hali Yahwe, baitu nitusobora tuta kweyihamu entekereza embi ezigumire kuleka?

² Omukwenda Paulo akakwatwaho muno habwokuba Abakristaayo abamu, bakaba batandikire kwikiriza entekereza embi n’enyegesa ezirukukurakuranizibwa ensi enu ey’erukulemwa Sitaani. (Bef. 4:17-19) Kandi naitwe ekintu kinu nikisobora kutubaho. Habwokuba Sitaani nuwe mulemi w’obusinge bunu, akozesa emiringo erukukwahukana kulengaho kutwiha hali Yahwe. Nk’ekyokurorraho, kakuba arora nitugonza kufooka bantu ruranganwa, n’asobora kukozesa ekyetaago eki kutwiha hali Yahwe. N’asobora n’okukozesa ebintu ebibatwegeseze omu ka, ha isomero, rundi abantu abandi ebibatwegeseze kutuletera kutekereza nkauwe.

³ Baitu mali nikisoboka kweyihamu entekereza embi ezigumire kuleka? (2 Kol. 10:4) Wetegereze omulingo Paulo arukugarukamu ekikaguzo kinu: “Ntusesa empaka nekitekerezo kyona ekyokwenyumiza ekinyakwehembera amagezi ga Ruhanga, kandi ntuhamba ekitekerezo kyona okukihuliza Kristo.” (2 Kol. 10:5) Yahwe n’asobora kutukonyera kweyihamu entekereza yoona embi eyitusobora kuba twine. Nk’oku omubazi gusobora kwiha obutwa omu mubiri, Ekigambo kya Ruhanga nikisobora kutukonyera kweyihamu entekereza embi kuruga omu nsi ya Sitaani eziri nk’obutwa.

“MUHINDURWE OMU MAGEZI GANYU”

4. Baingi haliitwe kikatwetagisa kukora mpindahinduka ki obutwayegere amananu?

⁴ Banza otekerezeho empindahinduka eziwakozere obuwayegere amananu kuruga omu Baibuli kandi w’acwamu kuheereza Yahwe. Baingi omuliitwe kikatwetagisa kubanza kuleka engeso embi ezitwali twine kusobora kuheereza Yahwe. (1 Kol. 6:9-11) Mali nitusiima muno Yahwe habw’okutukonyera kuleka kukora ebintu ebibi!

5. Nk’oku kyolekerwe omu Abarumi 12:2, bintu ki bibiri ebitusemeriire kukora?

⁵ Baitu titusemeriire kutekereza ngu, hati tikikyatwetagisa kwikara nitukora empindahinduka. N’obukiraaba ngu tukaleka kukora ebibi eby’amaani obutwali tutakabatizibwe, na hati nikitwetagisa kwikara nitutamu amaani kwetantara ekintu kyona ekisobora kutuletera kwongera kukora ebintu ebibi ebitwakoraga kara. Kinu nitusobora kukikora tuta? Omukwenda Paulo natugambira ati: “Kunu mutasisanizibwa nkobusinge bunu: baitu muhindurwe omu magezi ganyu amahyaka.” (Bar. 12:2) Nahabweki tusemeriire kukora ebintu binu bibiri. Eky’okubanza, titusemeriire ‘kusisanizibwa n’obusinge bunu,’ kinu nikitwarramu kutaikiriza ensi enu kutuhindura. Ekyakabiri, tusemeriire ‘kuhindurwa’ kandi kinu nikitwarramu kuhindurra kimu entekereza yaitu.

6. Ebigambo bya Yesu ebiri omu Matayo 12:43-45, nibitwegesa ki?

⁶ Kuhindurwa Paulo okw’arukubazaaho tikurukugarukira ha kuhindura omulingo turukuzookamu kwonka. Baitu nikutwarramu obwomeezi bwaitu bwona. (Rora akasanduuko “Okahindurwa rundi n’Oyefoora Bwefoora?”) Tusemeriire kuhindurra kimu entekereza yaitu, enyehurra hamu n’ebigendererwa. Nahabweki itwena tusemeriire kwekaguza ekikaguzo kinu: ‘Empindahinduka ezindukukora kusobora kuhondera ekyokurorraho kya Kristo ninzikora kusemeza busemeza abantu rundi ninzikora nukwo nfooke Mukristaayo ow’amananu omu mutima n’omu bitekerezo?’ Kikuru muno kumanya embaganiza enyakuli hagati y’ebintu binu bibiri. Omu Matayo 12:43-45, Yesu akooleka ekitusemeriire kukora. (Soma.) Ebigambo binu nibitwegesa ensonga enkuru muno: Hanyuma y’okweyihamu ebitekerezo ebibi, omu kikaro kyabyo tusemeriire kwijuzaamu ebitekerezo ebirukusemeza Ruhanga.

TUFOOKE BAHYAKA OMU NTEKEREZA YAITU

7. Nitusobora tuta kuhindukira kimu tukafooka bantu abahyaka?

⁷ Mali nikisoboka kuhindukira kimu tukafooka bantu abahyaka? Ego. Baibuli n’etutererra eti: “[Mufooke] abahyaka omu mutima gwebitekerezo byanyu, nokujwara omuntu omuhyaka, arukuhangwa Ruhanga omu kuhikirra nokwera okwamazima.” (Bef. 4:23, 24) Nahabweki, n’obukiraaba kitanguhire, nitusobora kuhinduka tukafooka bahyaka. Tikirukumara kurwanisa okwegomba okubi n’okuleka kukora ebibi. Tusemeriire n’okuhindukira kimu omu ntekereza yaitu. Eki nikitwarramu ebiturukwegomba, enyetwaza zaitu, hamu n’ebigendererwa byaitu. Kandi kinu nikyetagisa kwikara nitutamu amaani.

8-9. Ekyokurorraho eky’ow’oruganda omu nikyoleka kita ngu kikuru kuhinduka tukafooka abahyaka?

⁸ Leka tubazeeho ekyokurorraho eky’ow’oruganda ow’akaba ali w’ekiniga kiingi. Hanyuma y’ow’oruganda onu kuleka obutamizi n’okurwana, akakurakurana kandi y’abatizibwa, kyaletera n’abantu baingi omu kiikaro nambere yaikaraga kukwatwaho. Baitu obuharabireho akasumi kake amazire kubatizibwa akalengwa omu mulingo ogw’akaba atarukunihira. Omusaija omutamiizi akaija muka ye y’atandika kumwendereza nagonza barwane. Ha kubanza ow’oruganda akanga kurwana. Baitu omutamiizi obuyatandikire kubazaaho kubi ibara lya Yahwe, ow’oruganda onu ekiniga kikamwita, yagenda aheru y’amuteera. Kiki ekyamuletiire kwetwaza ati? Nobukiraaba ngu kwega Baibuli kikamukonyera kurwanisa ekiniga kye, akaba atakahindukiire kimu kufooka omuntu omuhyaka.

⁹ Baitu ow’oruganda onu atahwemu amaani. (Nfu. 24:16) Abagurusi bakamukonyera yagumizaamu nahindura enyetwaza ye. Obwire bukahika y’afooka mugurusi w’ekitebe. Kiro kimu obwakaba ayemeriire aheru y’Ekyombeko ky’Obukama omu bwire bwa rwebagyo, akongera yalengwa nk’oku akaba alengerwe omu myaka ey’enyuma. Omutamiizi ondi akaba nagonza kuteera omu h’abagurusi b’ekitebe. Ow’oruganda onu akakora ki? Omu mulingo ogutekaine kandi ogw’okwebundaaza, akabaza n’omutamiizi, yamukonyera kutekaana kandi yamusendekereza yamuhikya muka. Habwaki ow’oruganda onu yayetwaize ati ha murundi gunu? Ow’oruganda onu akaba ahindukire omu ntekereza ye. Kandi akaba ahindukiire kimu kuruga ha mutima, y’afooka omuntu arukugonza obusinge, omwebundaazi kandi arukuhaisa Yahwe ekitiinisa.

10. Kiki ekitusemeriire kukora kufooka abantu abahyaka?

¹⁰ Empindahinduka nka zinu titusobora kuzikora omu kiro kimu kandi nikyetagisa kutamu amaani. Tusemeriire “okwekamba” muno kumara emyaka nyingi. (2 Pet. 1:5) Empindahinduka zinu tizirukwija kubaho ngu habwokuba tumazire emyaka nyingi nituheereza Yahwe. Baitu tusemeriire kwikara nitwekamba muno kusobora kufooka abantu abahyaka. Kandi haroho ebintu ebindi ebikuru ebitusemeriire kukora. Leka tubazeho ebintu binu.

OMULINGO TUSOBORA KUHINDURA ENTEKEREZA YAITU

11. Kusaba kutukonyera kuta kuhindura ha ntekereza yaitu?

¹¹ Ekintu ky’okubanza ekitusemeriire kukora nukwo okusaba. Tusemeriire kusaba nk’omuhandiiki wa Zabuli ay’asabire nagamba ati: “Ompangemu omutima ogusemeziibwe, ai Ruhanga; ongarremu omyoyo omurungi omunda yange.” (Zab. 51:10) Twine kukikiriza ngu nitwetaaga kuhindura entekereza yaitu kandi tusabe Yahwe atukonyere. Nitukigumya tuta ngu Yahwe n’asobora kutukonyera kuhindura entekereza yaitu? Yahwe ekiyaraganiize kukorra Abaisaleri abamujeemire omu busumi bwa nabbi Ezekyeri nikisobora kutugarramu amaani. Yahwe akagamba ati: “Ndibaha omutima gumu, kandi ndita omulibo omwoyo omuhyaka; . . . ndibaha omutima gwenyama: [ogu nugwo mutima ogwikiriza kuhondera oburagirizi bwa Yahwe].” (Ez. 11:19.) Yahwe akakonyera Abaisaleri kuhinduka, kandi naitwe ayetegekere kutukonyera.

12-13. (a) Kusigikirra ha Zabuli 119:59, bintu ki ebitusemeriire kwecumitirizaaho? (b) Bikaguzo ki eby’osemeriire kwekaguza?

¹² Ekyakabiri, tusemeriire kwecumitiriza. Obuturaabaga nitwesomesa Baibuli buli kiro, tusemeriire kutunga obwire obw’okwecumitirizaaho, rundi kutekerezaaho muno, entekereza hamu n’enyetwaza ezitusemeriire kuhindura. (Soma Zabuli 119:59; Baheb. 4:12; Yak. 1:25) Tusemeriire kwetegereza obuturaaba twine entekereza yoona rundi enyetwaza erukusigikirra ha nyegesa z’ensi. Obuturakyetegereza ngu twine obuceke bwona, twekambe kuburwanisa.

¹³ N’osobora kwekaguza ebikaguzo nka binu: ‘Nyine ihali lyona rundi itima omu mutima gwange?’ (1 Pet. 2:1) ‘Sente ezinyine, kusoma kwange rundi ekiikaro nambere nduga bindetera kwehurra nk’arukukira abandi?’ (Nfu. 16:5) ‘Ndabyamu amaiso abantu abataine ebintu nk’ebinyine rundi ab’erangi endi?’ (Yak. 2:2-4) ‘Mpurra ninsikirizibwa ebintu eby’ensi ya Sitaani?’ (1 Yoh. 2:15-17) ‘Ngonza kurora eby’okwesemeza ebirumu ebikorwa by’obusiihana rundi eby’okurwana?’ (Zab. 97:10; 101:3; Am. 5:15) Kwekaguza ebikaguzo nka binu n’okubigarukamu nikiija kukukonyera kumanya nambere osemeriire kuhinduramu. Obuturahindura entekereza nka zinu rundi enyehurra ezirukuzooka nk’ezitutasobora kuleka, nitwija kusemeza muno Isiitwe ow’omu iguru.​—Zab. 19:14.

14. Habwaki kikuru muno kutunga abanywani abarungi?

¹⁴ Ekintu ekyakasatu ekiratukonyera nukwo kutunga abanywani abarungi. Amananu gali ngu banywani baitu nibasobora kutuhindura. (Nfu. 13:20) Obutuba tuli ha isomero rundi ha mirimo tukira kuba twetoroirwe abantu abatasobora kutukonyera kutekerezaaho ebintu Ruhanga agonza. Baitu omu nsorrokano zaitu tusangayo abanywani abarungi. Abanywani banu nibasobora kutwekambisa “okugonzagana, nokukora engeso ezisemiire.”​—Baheb. 10:24, 25.

GUMYA OKWIKIRIZA KWAWE

15-16. Sitaani alengaho ata kuhindura entekereza yaitu?

¹⁵ Oikale okimanyire ngu Sitaani n’akora kyona ekirukusoboka kuhindura entekereza yaitu. Akozesa enyegesa eza buli mulingo kulengaho kutwebesa amananu agatwegere kuruga omu Kigambo kya Ruhanga.

¹⁶ N’omu kasumi kanu, Sitaani n’akozesa ekikaguzo nk’ekiyakagwize Hawa omu rugonjo orwa Adeni. Akamukaguza ngu: Mali “nukwo Ruhanga yagambire ati. . . ?” (Kub. 3:1) Na hati abantu batukaguza ebikaguzo ebisobora kutuletera kugurukyagurukya enyikiriza zaitu. Bakaguza ebikaguzo nka binu: ‘Mali Ruhanga tarukwikiriza abasaija kuswera abasaija na bakazi kuswera abakazi? Mali Ruhanga tarukugonza ojaguze Krismasi rundi amazarwa gaawe? Mali Ruhanga tarukugonza otekwemu esagama? Mali Ruhanga ow’okugonza natanga kukoragana n’omuntu ow’orukugonza baitu ayabingirwe omu kitebe?’

17. Kiki ekitusemeriire kukora obuturaba twine ebikaguzo ebirukukwata ha bintu ebiturukwikiriza kandi kusigikirra ha Abakolosai 2:6, 7 biki ebirarugamu?

¹⁷ Kikuru muno kukigumya ngu ebiturukwikiriza nugo mananu. Obuturaaba twine ebikaguzo ebirukukwata ha bintu ebiturukwikiriza, tusemeriire kutunga ebigarukwamu habwokuba obuturaikara tutabitungire nitusobora kutandika kugurukyagurukya enyikiriza zaitu. Kugurukyagurukya nikusobora kuhindura entekereza yaitu kandi kukacekya okwikiriza kwaitu. Hati kiki ekitusemeriire kukora? Ekigambo kya Ruhanga nikitutererra kuhindura entekereza yaitu, nukwo tusobole kugumiza kimu ngu “Ruhanga ebyagonza okubiri ebirungi ebisemiire, ebihikirire.” (Bar. 12:2) Kuraba omu kwesomesa Baibuli buli kiro, nitwija kukigumya ngu mali ebitwayegere bihikire kandi by’amananu. Ekirarugamu, nitwija kusisana nk’omuti ogwine emihama enkooto, kandi nitwija ‘kuguma omu kwikiriza.’​—Soma Abakolosai 2:6, 7.

18. Kiki ekiratukonyera kwerinda ebintu ebibi kuruga omu nsi ya Sitaani?

¹⁸ Niitwe twine obujunanizibwa obw’okugumya okwikiriza kwaitu, nahabweki gumizaamu n’ohindura entekereza yaawe. Saba Yahwe buli kiro kandi omwesengereza akuhe omwoyo gwe. Wecumitirizeeho muno entekereza yaawe hamu n’ebigendererwa byawe. Tunga abanywani abarungi abarakukonyera kuba n’entekereza ey’ehikire. Obworakora ebintu binu byona noija kuleka kandi oyerinde ebintu ebibi kuruga omu nsi ya Sitaani. Kandi kinu nikiija kukukonyera kuseesa “empaka nekitekerezo kyona ekyokwenyumiza ekinyakwehembera amagezi ga Ruhanga.”​—2 Kol. 10:5.