Ebikaguzo Kuruga Omu Basomi Baitu

Baibuli n’egamba ngu h’asemeriire kubaho hakire abakaiso babiri kusobora kugumya ensonga yoona. (Kubar. 35:30; Bir. 17:6; 19:15; Mat. 18:16; 1 Tim. 5:19) Baitu omu Biragiro bya Musa, omusaija obuyahambaga omwisiki anyakujumbiirwe ow’asangire “omu bwerre,” kandi omwisiki ogu akateera enduru, yabaga ataine musango baitu omusango gwabaga ha musaija. Habwaki omusaija bamutekahoga omusango hatali omwisiki kandi kunu tihabahoga bakaiso?

Ebiri omu Ekyebiragiro 22:25-27 nibyoleka ngu omusaija yabaga asingirwe omusango. Baitu ekiragiro kinu kyali ky’okukonyera kumanya omwisiki obwaraaba aine omusango rundi nangwa. Tekerezaaho enkarra ezetoroire ekiragiro kinu.

Enkarra ezirukubanza nizibazaaho omusaija ayabaga ateraine n’omwisiki ow’ajumbiirwe “omu rubuga.” Omusaija ayakoraga kinu, yabaga asihaine n’omukazi w’abandi habwokuba omwisiki ayabaga ajumbiirwe yabarwaga nk’ow’aswirwe. Kandi omwisiki uwe? Omwisiki obuyabaga ‘atatiire enduru, kandi ali omu rubuga,’ yabaga aine omusango. Habwokuba kakuba akaba atiire enduuru abantu bakuhulire kandi bamujunira. Nahabweki boona baasingwaga omusango ogw’obusiihani.​—Bir. 22:23, 24.

Ekiragiro kyayongeraga kibazaaho enyikara endi: “Baitu omusaija obwalinsanga omuisiki ajumbiirwe omu bwerre, kandi omusaija amuhamba nabyama nauwe; omusaija wenka ayabyamire nauwe nuwe alifa: baitu omuisiki otalimukora kigambo; omu muisiki tiharumu ekibi ekihikiriire okumuisa: baitu nkomuntu obwaimukira omutahiwe namuita, nukwo ekigambo eki kiri kiti: baitu akamusanga omu bwerre; omuisiki ajumbiirwe yatera enduru, kunu busaho muntu okumujuna.”​—Bir. 22:25-27.

Omu nyikara egi, abacwi b’emisango baikirizaaga ebigambo by’omwisiki. Habwaki? Habwokuba bakitwaraga ngu ‘atiire enduru’ baitu tihabaho “muntu okumujuna.” Nahabweki yabaga ataine omusango. Baitu omusaija yabaga aine omusango ogw’okuhamba hamu n’ogw’obusihani habwokuba yabaga akirize omwisiki amaani.

Nahabweki ekiragiro kinu kyali ky’okukonyera abacwi b’emisango kumanya omwisiki obwaraaba aine omusango rundi nangwa. Kandi nikyoleka ngu musaija uwe yabaga asingirwe ira omusango ogw’okuhamba hamu n’ogw’obusihani. Nitukigumya ngu abacwi b’emisango babanzaaga kukora okuseruliiriza okw’amaani nukwo bakora encwamu erusigikirra ha kiragiro Yahwe akaba abalizeeho kurungi kandi emirundi nyingi.​—Bir. 13:14; 17:4; Kurug. 20:14.