Nkaba Ndi Muntu ow’Ensoni Nyingi, Baitu Nkafooka Omumiisani

Nkazaarwa omu 1951 omu Vienna, Austria, kandi abazaire bange bakaba bali bakatuliki. Nkaba ndi muntu w’ensoni, baitu naikiririzaaga omuli Ruhanga kandi nakiraga kusaba. Obu nahikize emyaka mwenda, isenyowe akatandika kwega Baibuli n’Abakaiso ba Yahwe, kandi nyinanyowe akamweteranizaaho hanyuma.

Omu bwire buke tukeeteranizaaho ekitebe kya Döbling omu Vienna. Nk’eka, ebintu twabikorraga hamu. Twasomaga hamu Baibuli, tugenda omu nsorrokano, kandi tukoonyera ha nsorrokano enkooto. Omu myaka egi ey’obuto, isenyowe akankoonyera kugonza muno Yahwe. Amananu gali, isenyowe yagonzaaga muno ngu nyowe na munyaanyanyowe tuheereze nka bapayoniya. Baitu omu kasumi ako, eki kikaba kitali kigendererwa kyange.

KUTANDIKA OBUHEEREZA OBW’AKASUMI KOONA

Nkabatizibwa omu 1965, obu nkaba nyine emyaka 14. Baitu kyangumiraga kubaza n’abantu abantamanyire omu buheereza. Ekindi nayehurraga ngu ensinganto bagenzi bange nibegondeza omu bwomeezi kunkira kandi nagonzaaga bafooke banywani bange. Hanyuma y’obwire buke mazire kubatizibwa, nkatandika kumara obwire n’abantu abakaba batarukuheereza Yahwe. Noobu kiraaba ngu nagonzaaga kwikara nabo, omuntu wange ow’omunda akaikara nandumiiriza habwokuba namaraga obwire n’abantu abatali Bakaiso ba Yahwe. Baitu kikangumira kuleka kuba nabo. Kiki ekyankoonyiire?

Omu kasumi ako, omwisiki ow’emyaka 16 ow’arukwetwa Dorothée akaija omu kitebe kyaitu. Obwekambi obw’akaba aine omu kutebeza okw’enju ha nju bukampuniiriza muno. Nkaba niimukiraho obukuru, baitu nkaba ntarukwejumbira muno omu buheereza. Nkateekereza nti: ‘Abazaire bange Bakaiso ba Yahwe, baitu Dorothée nuwe wenka ali omu mananu omu ka y’owabu. Naarolerra nyina ow’arwaire, baitu tayosa omu buheereza!’ Ekyokurorraho kye kikanyekambisa kugonza kuha Yahwe ekirukukiraho. Omu kaire kake itwena tukatandika kuheereza hamu nka bapayoniya. Tukabanza kuheereza nka bapayoniya abasagiki, hanyuma twaheereza nka bapayoniya ab’akasumi koona. Habwokuba Dorothée’ yagonzaaga muno kutebeza, nanyowe nkatandika kukwegondezaamu. Akankoonyera kutunga omwegi wa Baibuli. Hanyuma y’obwire buke, nkaleka kutiina kubaza n’abantu omu kutebeza okw’enju ha nju, omu muhanda, n’omu nyikara ezindi.

Omu mwaka gwange ogw’okubanza obu nkaba nimpeereza nka Payoniya ow’akasumi koona, ow’oruganda ow’arukwetwa Heinz akaija omu kitebe kyaitu. Akeegera amananu omu Canada obu akaba abungiire mugenzi we ow’akaba ali omu h’Abakaiso ba Yahwe. Akasindikwa omu kitebe kyaitu kuheereza nka payoniya ow’embaganiza. Ahonaaho nkamugonza. Akaba naagonza kufooka omumiisani, baitu eki kikaba kitali kigendererwa kyange. Nahabweki ha kubanza nkasereka enyehurra zange. Hanyuma, tukatandika kujumbirangana, twataaha obuswere kandi twatandika kuheereza hamu nka bapayoniya omu Austria.

KUTANDIKA KUGONZA KUHEEREZA NK’OMUMIISANI

Heinz yangambirahoga nkooku akaba naagonza kufooka omumiisani. Noobu kiraaba ngu tiyansindikirizaaga, yankaguzaaga ati: “Nkooku tutaine abaana, titusobora kwongera ha buheereza bwaitu hali Yahwe?” Habwokuba nkaba nyine ensoni, nkaba nintiina kufooka mumiisani. Noobu kiraaba ngu nkaba nimpeereza nka payoniya ow’akasumi koona, nkateekereza ngu kufooka mumiisani kikaba kintu ekigumire muno. Baitu Heinz akankoonyera kwikara ninteekerezaaho ekigendererwa eky’okuheereza nk’omumiisani. Ekindi akanyekambisa kwikara ninfaaho abantu omu kiikaro ky’okweteekerezaaho nyenka. Obuhabuzi bwe bukankoonyera muno.

Mpora mpora nkatandika kugonza kufooka omumiisani, nahabweki tukaijuza foomu y’okugenda omu isomero lya Gilead. Baitu, ow’oruganda ow’akaba naaheereza h’akatebe k’itaagi akagamba ngu kyakubaire kirungi kubanza kwega kubaza kurungi orungereeza. Hanyuma y’okumara emyaka esatu niinyega kubaza kurungi orungereeza, kikatuhuniiriza muno obu baatusindikire omu kitebe kya Yugoslavia omu Salzburg, Austria. Tukamara emyaka musanju mu buheereza obu, otwaliiremu n’omwaka gumu ogu twamazire omu mulimo ogw’okubungira ebitebe. Orulimi orwa Serbo-Croatian rukaba rugumire, baitu tukaba twine abeegi ba Baibuli baingi.

Omu 1979 tukasabwa kugenda kuhuumuraho omu Bulgaria. Omulimo ogw’okutebeza omu ihanga eri gukaba gutangirwe. Nahabweki obu tukaba tugenzere “kuhuumuraho” tutatebeze. Baitu tukatwarra banyaanya itwe bataano obutabu obutaito omu nsita abakaba nibaikara omu rubuga orukuru orwa Bulgaria orurukwetwa Sofia. Nkaba ntiniire, baitu Yahwe akankoonyera. Obu narozere obumanzi bwa banyaanya itwe abo n’okusemererwa oku bakaba baine noobu kiraaba ngu bakaba nibasobora kuteekwa omu nkomo, kikampa obumanzi kwikiriza obujunaanizibwa bwona ekitebe kirampa.

Hanyuma y’akasumi, tukongera twasaba kugenda omu isomero lya Gilead, kandi ha murundi gunu bakatwikiriza. Tukateekereza ngu nitwija kugenda omu isomero ly’orungereeza omu United States. Baitu omu Novemba 1981, ekitebe kikacwamu ngu n’omu Germany habeyoga isomero lya Gilead. Nahabweki tukagenda omu isomero erikaba liri omu rulimi oru German, orukaba nirunyanguhira kwetegereza. Hanyuma y’isomero, ninkaha nambere baatusindikire kuheereza?

KUHEEREZA OMU IHANGA NAMBERE HAKABA HALI OBULEMU

Tukasindikwa kuheereza Kenya! Baitu itaagi lya Kenya likatusaba kugenda kuheereza omu ihanga eriri haihi erya Uganda. Emyaka ey’erukuhingura ikumi enyuma, omunyamahe ow’arukwetwa Idi Amin akaba atandikire kulema gavumenti ya Uganda. Obu akaba naalema, abantu baingi bakaitwa kandi obwomeezi bukaba bugumangaine. Omu 1979 abantu abakaba nibahakaniza gavumenti ya Amin bakamwiha ha ntebe. Nimusobora kuba nimukyetegereza habwaki nkaba ntiinire kugenda omu ihanga erikaba lirumu obulemu. Baitu omu isomero lya Gilead bakaba batwegeseze kwesiga Yahwe. Nahabweki tukaikiriza kugenda omu ihanga eri.

Enyikara omu Uganda ekaba egumire muno. Gavumenti ekaba etarukusobora kuha abantu amaizi, amasanyarazi hamu n’ebintu ebindi. Amasimu gakaba gatarukukora. Abantu baateraga abandi amasasi, nibabaiba, kukira muno omu bwire bw’ekiro. Nahabweki omu bwire bw’ekiro, buli omu yaikaraga omu ka naasaba ngu hatabaho omuntu weena ayaija, akagira eki yaiba rundi akabaita. Noobu kiraaba ngu obwomeezi bukaba bugumangaine, ab’oruganda na banyaanya itwe omu Uganda bakagumizaamu baine okwikiriza okugumire!

Omu 1982, tukahika Kampala, orubuga orukuru orwa Uganda. Omu myezi etaano ey’okubanza tukaikara omu ka ya Sam na Christina Waiswa abakaba nibaikara n’abaana baabo bataano hamu n’abayabuzaale baabo bbana. Ow’oruganda na Munyaanya itwe Waiswa hamu n’ab’omu ka ye baalyaga ekiihuro kimu buli kiro, baitu baikaraga beeteekaniize kubagana na itwe akataito akabaabaga baine. Obwire obu twamazire n’ab’eka ya Waiswa tukeega amasomo amakuru agaatukoonyiire omu buheereza bwaitu nk’abamiisani. Ekyokurorraho, tukeega kukozesa kurungi amaizi obu nitwoga amaizi make, kandi hanyuma agarukusigara nitugakozesa kuyonja toileti. Omu 1983, nyowe na Heinz tukatunga enju yaitu omu kiikaro ekikaba kirumu obulinzi omu Kampala.

Mali tukeegondeza omu kutebeza. Ninyijuka omu kwezi kumu kwonka tukagaba magaziini ezirukuhingura 4,000! Baitu ekintu ekyakiraga kunsemeza nukwo kurora omulingo abantu baakwatwahoga obu twabegesaaga amananu. Baatamuga Ruhanga ekitiinisa kandi baagonzaaga kubazaaho Baibuli. Buli omu hali itwe akaba aine abeegi ba Baibuli 10 rundi 15 kandi tukabeegeraho ebintu bingi muno. Ekyokurorraho, noobu kiraaba ngu kyabetaagisaaga kurubata kugenda omu nsorrokano buli wiiki, tibaatontorromaga, kandi baikaraga basemeriirwe.

Omu 1985 na 1986, hakongera habaho obulemu omu Uganda. Twakiraga kurora abaana baine emundu kandi nibabakozesa nk’abaserikale omu nguudo. Omu kasumi ako, twakiraga kusaba Yahwe kutuha okwetegereza n’okutukoonyera kuteekaana obu nituserra abo abarukugonza kumanya amananu. Kandi Yahwe akagarukamu esaara zaitu. Obu twatangatanganaga omuntu ow’arukugonza kumanya amananu, twalekaga kuta omutima ha bintu ebirukutiinisa.

Ekindi, twayegondezaaga omu kutebeza abantu kuruga omu mahanga agandi. Ekyokurorraho, tukatangatangana Murat na Dilbar Ibatullin, abaswerangaine kuruga Tatarstan (Central Russia) kandi twatandika kwega nabo Baibuli. Murat akaba naakora nka dakitaali. Boona bakabatizibwa kandi nibakyaheereza Yahwe n’obwesigwa. Hanyuma nkatangatangana Tetjana Vileyska, omukazi ow’akaba naaruga Ukraine kandi akaba naagonza kweyita. Akabatizibwa, yagarukayo omu Ukraine kandi hanyuma yatandika kuhindura ebitabu byaitu omu Ukraine.a

OBUHEEREZA OBUHYAKA

Omu 1991 obu tukaba tugenzere kuhuumuraho omu Austria, itaagi erya Austria likatuhandiikira ngu tukaba nitwija kutandika kuheereza omu Bulgaria. Kumara obwire bwingi, omulimo gwaitu gukaba gutangirwe omu mahanga ga Bulaaya eya burugaizooba. Baitu hanyuma, omulimo gw’okutebeza gukongera gwaikirizibwa omu Bulgaria. Nkooku nsangirwe mbagambiire, nyowe na Heinz tukaba tutwaire ebitabu omu nsita omu ihanga eri omulimo gwaitu obu gukaba gutangirwe. Baitu hati tukaba tusindikirweyo kutebeza.

Bakatugambira ngu tutagaruka omu Uganda. Nahabweki tutatunge omugisa gw’okugarukayo kwihayo ebintu byaitu n’okuraga banywani baitu, oihireho tukagendera kimu ha Beseeri omu Germany, twatunga motoka kandi twagenda Bulgaria. Bakatusiindika omu guruupu ey’ekaba erumu abatebezi 20 omu Sofia.

Tukatunga ebizibu bingi omu Bulgaria. Eky’okubanza tukaba tutamanyire orulimi. Ekya kabiri, hakaba haroho ebitabu bibiri byonka ebikaba biri omu rulimi oru Bulgaria kandi ebi nibyo The Truth That Leads to Eternal Life hamu na Ekitabu Kyange eky’Enganikyo za Baibuli. Kandi ekya kasatu, kikaba kitanguhire kutunga abeegi ba Baibuli. Noobu kiraaba ngu tukatunga ebizibu ebi, guruupu yaitu ekaba eriyo n’ekurakurana. Ab’enyikiriza ya Orthodox bakakyetegereza kandi baatandika kutuhiiganiza.

Omu 1994 gavumenti ekaleka kutwara ediini y’Abakaiso ba Yahwe nk’ey’ehandikisiibwe, kandi abantu baingi omu Bulgaria baagiroraga nk’ediini ey’akabi. Ab’oruganda abamu bakakwatwa. Abanyamakuru bakararangya ebisuba hali Abakaiso ba Yahwe ngu nibaita abaana habwokuba tibarukubaikiriza kuteekwamu esagama, kandi ngu nibagambira n’Abakristaayo bagenzi baabo kweyita. Kikatugumira muno kutebeza. Twakiraga kutangatangana abantu abaine ekiniga, abaatucoomeraga, nibatwetera poliisi kandi nibatuhungurra ebintu. Kikaba kitanguhire kutaahya ebitabu omu ihanga n’okutunga ekiikaro eky’okupangisa kusorrokaniramu. Haroho poliisi obu yayemeriize rumu ha nsorrokano zaitu enkooto. Nyowe na Heinz tukaba tutakaroraga abantu abaine enobi ya mulingo ogu. Mali bakaba nibahukanira kimu hali abantu ab’omu Uganda abakaba nibagonza kwega Baibuli! Kiki ekyatukoonyiire kugumira empindahinduka zinu?

Kumara obwire n’ab’oruganda na banyaanya itwe kikatukoonyera muno. Baagonzaaga amananu, kandi baatusiimaga habw’obukoonyezi obu twabahaga. Boona bakaba baine obumu kandi nibakoonyerangana. Ekyokurorraho kyabo kikatwegesa ngu nitusobora kutunga okusemererwa omu buheereza bwona obu turatunga, kakuba twikara nitugonza abantu.

Hanyuma y’obwire, ebintu bikahinduka. Omu 1998, gavumenti ekongera yaikiriza omulimo gw’Abakaiso ba Yahwe, kandi hakabaho ebitabu bingi omu rulimi oru Bulgaria. Omu 2004 tukatunga ekyombeko ekihyaka ekya ofiisi y’itaagi. Kasumi kanu, omu Bulgaria haliyo ebitebe 57 ebirumu abatebezi 2,953. Kandi omwaka ogw’obuheereza oguhoire 2024, abantu 6,475 nubo baabaireho ha Kiijukyo. Noobu kiraaba ngu ha kubanza omu Sofia hakaba haliyo banyaanya itwe bataano, hati haliyo ebitebe mwenda! Tweroliire itwenka abake nibafooka orukumi.—Is. 60:22.

KUGUMIRA EBIRENGO

Omu bwomeezi bwange ntungire obuceke obw’omubiri. Kumara emyaka, ntungire ebizimba ebirukwahuka otwaliiremu n’eky’omu bwongo. Nkatunga obujanjabi bw’amaani kukeehya ekizimba, kandi nkagenda India nambere dakitaali yamazire esaaha 12 naansemeza. Hanyuma y’okusemezebwa, tukaikara ha Beseeri omu India, nukwo nsobole kuteekaana. Hanyuma y’okuteekaana tukagaruka omu buheereza bwaitu omu Bulgaria.

Hanyuma y’obwire, Heinz akatunga oburwaire oburukumanywa nka Huntington. Kyamugumiraga kurubata, kubaza n’okukozesa ebicweka bye by’omubiri. Kandi oburwaire obu bwayeyongiire kukanya, kikanyetaagisa kwikara niimukoonyera. Obwire obumu nahurraga mpoirwemu amaani, nyeraliikiriire ebintu nkooku biraaba. Baitu ow’oruganda omuto ow’arukwetwa Bobi yakiraga kuraaliza Heinz kukora na uwe omu buheereza. Bobi akaba atarukweraliikirra abantu eki baakuteekeriize ha mulingo Heinz akaba naabazaamu n’omulingo akaba atasobora kukozesaamu ebicweka bye by’omubiri. Bobi yaikaraga ayeteekaniize kukoonyera nambere nkaba ntarukusobora. Noobu kiraaba ngu tukacwamu kutazaara abaana omu kasumi kanu, tukehurra ngu Yahwe akaba atuhaire Bobi nka mutabani waitu!—Mar. 10:29, 30.

Heinz akaba aine n’oburwaire obw’ekookoro. Eky’obusaasi, akafa omu 2015. Hanyuma ya Heinz kufa, nkahurra ntaine bulinzi, kandi kikangumira kukiikiriza ngu akaba afiire. Baitu nyikara nimmuteekerezaaho muno oti rundi akyali mwomeezi! (Luk. 20:38) Nyikara ninyijuka ebigambo bye eby’embabazi n’obuhabuzi oburungi obu yampaga. Mali ninsiima muno ngu tukasobora kuheereza Yahwe hamu kumara emyaka nyingi.

NINSIIMA HABW’OBUKOONYEZI BWA YAHWE

Mali Yahwe ankoonyiire kugumira ebirengo ebirukwahukana. Ekindi, akankoonyera kuleka kuba n’ensoni, n’okufooka omumiisani ow’arukugonza abantu. (2 Tim. 1:7) Nimusiima muno habwokuba nyowe na mugenzi wange omuto hati tuli omu buheereza obw’akasumi koona. Uwe na musaija we bali omu mulimo gw’okubungira ebitebe ebirukubaza oru Serbia omu Bulaaya. Mali Yahwe agarukiremu esaara isenyowe ezi yasabire emyaka nyingi enyuma obu tukaba tukyali bato!

Kwesomesa Baibuli kinkoonyera kutunga obusinge. Kusisanaho na Yesu, nyegere kweyongera kusaba omu busumi obugumangaine. (Luk. 22:44) Yahwe agarukiremu esaara zange naakozesa ab’oruganda na banyaanya itwe omu kitebe ekya Nadezhda, omu Sofia, abaine okugonza n’embabazi. Bakira kundaaliza kumara nabo obwire, kandi bakira kungambira ngu nibangonza, ekindeetera okusemererwa.

Nkira kwecumiitirizaaho okuhumbuuka. Nteeramu akasisani nindora abazaire bange nibazooka kurungi nkooku bakaba bali bakyataahire obuswere. Nteeramu akasisani nindora munyaanyanyowe naateekaniza ekiihuro. Ekindi, nteeramu akasisani nindora Heinz ayemeriire haihi n’embaraasi ye. Obu nteekerezaaho ebintu binu, kinkoonyera kuguma, kindeetera okusemererwa n’okusiima Yahwe.

Obu nteekerezaaho ebi ndabiremu n’ebintu ebirungi ebi ndindiriire omu kasumi ak’omumaiso, kindeetera kwikiraniza n’ebigambo bya Daudi ebiri omu Zabuli 27:13, 14 ebirukugamba biti: ‘Nakugwire ensazi kakuba ntaraabaire n’okwikiriza ngu ndaarora oburungi bwa Yahwe omu nsi yabomiire. Tegereza Yahwe: garukwamu amaani, ogume omutima: Ego, otegereze Yahwe.’