7 “Kweni khwima mtima na kuŵa wankhongono chomene na kusungilira mwakupwelelera Dango lose ilo Mozesi muteŵeti wane wakakuphalira. Ungapatukangako chara, kulazga kumalyero panji kumazere,+ mwakuti uchite vinthu mwavinjeru kulikose uko ukuluta.+ 8 Buku ili la Dango lingafumangapo chara pa mulomo wako,+ uŵazgenge na kughanaghanirapo* muhanya na usiku, mwakuti uchitenge mwakupwelelera vyose ivyo vili kulembekamo.+ Para wachita nthena, vinthu vikwenderenge makora, ndipo uchitenge mwavinjeru.+