10 Rehobowamu wakaluta ku Shekemu,+ pakuti Israyeli yose wakiza ku Shekemu kuti ŵamwimike kuŵa themba.+ 2 Yerobowamu+ mwana wa Nebati wakapulika nkhani iyi (wakaŵa wachali mu Eguputo chifukwa wakachimbira Themba Solomoni).+ Ntheura Yerobowamu wakawerako ku Eguputo. 3 Penepapo ŵakatuma ŵanthu kukamuchema. Yerobowamu na Israyeli yose ŵakiza kwa Rehobowamu, ŵakati: 4 “Awuso ŵakatipa goliwoli lizito.+ Kweni para iwe ungapepuskako mulimo unonono wa awuso, na kupepuska goliwoli lizito* ilo ŵakaŵika pa ise, mbwenu tikuteŵeterenge.”