10 “Yehova wakuti: ‘Mu malo agha, gheneagho mukuti ni mayiyi, ghambura munthu na viŵeto, mu misumba ya Yuda na mu misewu ya Yerusalemu ivyo vyawuwa, kwambura munthu panji wakukhalamo panji viŵeto, muzamupulikikwaso 11 mazgu ghakuzaya, mazgu ghakusekelera,+ mazgu gha mwenenthengwa na mazgu gha mwali, mazgu gha awo ŵakuti: “Wongani Yehova wa mawumba, chifukwa Yehova ni muwemi.+ Lusungu* lwake lukukhalilira muyirayira!”’+

“‘Ŵizenge na sembe za kuwonga mu nyumba ya Yehova,+ pakuti awo ŵakakoleka niŵawezgerenge ku charu ichi, nga umo nkhachitira pakwamba,’ wakuti Yehova.”