9 “Welerani luŵiro kwa adada, ndipo mukati kwa iwo, ‘Yosefe mwana winu wayowoya kuti: “Chiuta wanimika kuŵa fumu pa Eguputo yose.+ Ntheura mwize kwa ine, mungachedwanga yayi.+ 10 Muzakakhale mu charu cha Gosheni,+ ndipo muzamuŵa pafupi na ine. Mwize mose, imwe, ŵana ŵinu, ŵazukuru ŵinu, mberere zinu, ng’ombe zinu, na vyose ivyo muli navyo. 11 Nizamumupani chakurya, chifukwa kwakhala vyaka vinyake vinkhondi vya njara.+ Para mwizengeko yayi, imwe na nyumba yinu mukavukenge ndipo vyose ivyo muli navyo vimalenge.”’