1 Midauko
14 Hiramu+ themba la Ture wakatuma mathenga kwa Davide, pamoza na mathabwa gha sidara, ŵakuŵaja malibwe* na makuni kuti ŵakamuzengere nyumba.+ 2 Davide wakamanya kuti Yehova wamukhozga chomene kuŵa themba pa Israyeli,+ pakuti uthemba wake ukakwezgeka chomene chifukwa cha ŵanthu ŵake Israyeli.+
3 Davide wakatora ŵanakazi+ ŵanandi mu Yerusalemu, ndipo wakababa ŵana ŵanandi ŵanalume na ŵanakazi.+ 4 Mazina gha ŵana awo wakaŵa nawo mu Yerusalemu+ ni agha: Shamuwa, Shobabu, Natani,+ Solomoni,+ 5 Ibuhara, Elishuwa, Elipeleti, 6 Noga, Nefegi, Yafiya, 7 Elishama, Beliyada, na Elifeleti.
8 Ŵafilisiti ŵakati ŵapulika kuti Davide waphakazgika kuŵa themba pa Israyeli+ yose, wose ŵakiza kuzakapenja Davide.+ Davide wakati wapulika, wakaluta kukarwa nawo. 9 Penepapo Ŵafilisiti ŵakiza na kundanda mu Dambo* la Refayimu.+ 10 Davide wakafumba kwa Chiuta, wakati: “Kasi nikwere kukarwa na Ŵafilisiti? Kasi muŵapelekenge mu woko lane?” Penepapo Yehova wakati: “Kwera, niŵapelekenge nadi mu woko lako.”+ 11 Ntheura Davide wakakwera ku Baala-perazimu,+ na kuŵakomera kwenekura. Davide wakati: “Chiuta waunenesko waphwamura ŵalwani ŵane na woko lane nga ntchinkhwawu icho chaphwamulika na maji.” Lekani ŵakathya malo ghara zina lakuti Baala-perazimu.* 12 Ŵafilisiti ŵakasida ŵachiuta ŵawo kwenekura, ndipo Davide wakati walangura, ŵakaŵawotcha na moto.+
13 Ŵafilisiti ŵakandandaso mu dambo.*+ 14 Davide wakafumbaso kwa Chiuta, ndipo Chiuta waunenesko wakati: “Ungalutanga mwakudunjika yayi kwa iwo. Kweni ulute kumanyuma kwawo, ndipo uŵizire kunthazi kwa vivwati vya baka.+ 15 Para wapulika mswayuswayu pachanya pa vivwati vya baka, uŵawukire, chifukwa Chiuta waunenesko waŵenge kuti wadangira panthazi pako kukoma ŵankhondo ŵa Ŵafilisiti.”+ 16 Ntheura Davide wakachita ivyo Chiuta waunenesko wakamulangura,+ ndipo ŵakakoma ŵankhondo ŵa Ŵafilisiti kwamba ku Gibiyoni m’paka ku Gezeri.+ 17 Lumbiri lwa Davide lukafika mu vyaru vyose, ndipo Yehova wakachitiska mitundu yose kumopa Davide.+