Masalimo
Sumu ya Davide.
141 Nkhuchema imwe, A Yehova.+
Endeskani kuti munovwire.+
Tegherezgani para nkhuchema kwa imwe.+
2 Lurombo lwane luŵe nga ni vyakununkhira+ ivyo vyanozgeka panthazi pinu,+
Mawoko ghane agho ghatumphuskika ghaŵe nga ni sembe ya vyamuminda ya mise.+
3 A Yehova, ŵikani mulinda pa mulomo wane,
Ŵikani wakulaŵilira pa mulyango wa milomo yane.+
4 Mungazomerezganga chara kuti mtima wane ulazge ku chilichose chiheni,+
Kuti uchiteko ntchito ziheni pamoza na ŵanthu ŵaheni,
Ningaryangako chara manoninoni ghawo.
5 Para murunji wanitimba, nitenge wanichitira lusungu.*+
Para wanichenya, viŵenge nga ni mafuta pa mutu wane,+
Agho mutu wane ungakana chara,+
Nilutilirenge kuŵalombera nanga ni mu nyengo iyo soka laŵawira.
6 Nanga ŵeruzgi ŵawo ŵaponyeke pasi kufuma pa chigodobu,
Ŵanthu ŵategherezgenge mazgu ghane, pakuti ngakukondweska.
7 Nga umo munthu wakugadulira* dongo na kulipopota,
Ntheura ndimo viwangwa vithu vyambininikira pa mulomo wa Dindi.*
8 Kweni maso ghane ghali kwa imwe, A Yehova Fumu Yikuru.+
Mwa imwe ndimo nkhubisama.
Mungawuskangako yayi umoyo wane.
9 Nivikilirani ku milomo ya chipingo icho ŵanithya,
Ku madiŵa gha ŵanthu ŵaheni.
10 Ŵaheni wose ŵawirenge mu maukonde ghawo,+
Apo ine nijumphengepo makoraghene.