Yeremiya
47 Mazgu gha Yehova kwa Yeremiya ntchimi kuyowoya vya Ŵafilisiti,+ pambere Farawo wandatimbe Gaza. 2 Yehova wakuti:
“Wonani, maji ghakwiza kufuma kumpoto.
Ghaŵenge mlonga wakufuluka.
Ghabizgenge charu na chilichose icho chilimo,
Msumba na awo ŵakukhalamo.
Ŵanthu ŵakolomokenge,
Ndipo waliyose uyo wakukhala mu charu walirenge.
3 Pakupulika bundi la mahachi,
Mupwakapwaka wa magileta ghake ghankhondo,
Mugudugudu wa makhwiro ghake,
Ŵawiskewo ŵatondekenge kuzgokera ku ŵana ŵawo,
Pakuti mawoko ghawo ghakusoghoyoka,
4 Chifukwa zuŵa ilo likwiza lizamuparanya Ŵafilisiti wose.+
Lizamudumura wose awo ŵakovwira Ture+ na Sidoni,+ awo ŵakhalako.
5 Chipala* chizamwiza pa Gaza.
Ashikeloni wachetamiskika.+
Imwe ŵakukhalapo ŵa mu chidika chawo,
Kasi mulutilirenge kujicheka m’paka pawuli?+
6 We, lupanga lwa Yehova!+
Kasi ulekenge kukhala chete m’paka pawuli?
Welera mu malo ghako.
Pumura na kukhala chete.
7 Kasi lungakhala wuli chete,
Apo Yehova walulangura?
Kwimikana na Ashikeloni na vyaru vya mumphepete mwa nyanja,+
Uku ndiko walutuma.”