ZEFANIYA
1 Mazgu gha Yehova agho ghakiza kwa Zefaniya* mwana wa Kushi, mwana wa Gedaliya, mwana wa Amariya, mwana wa Hezekiya, mu mazuŵa gha Yosiya+ mwana wa Amoni,+ themba la Yuda:
2 “Nizamuphyera chilichose icho chili pa charu chapasi,” ndimo wayowoyera Yehova.+
3 “Nizamuphyera munthu na chikoko.
Nizamuphyera viyuni vyamudera na somba zamunyanja,+
Nizamuphyera vikhuŵazgo*+ pamoza na ŵaheni,
Ndipo nizamuwuskapo ŵanthu pa charu chapasi,” ndimo wayowoyera Yehova.
4 “Nizamunyoloskera woko lane pa Yuda
Na pa wose awo ŵakukhala mu Yerusalemu,
Ndipo nizamuphyeramo mu malo agha kalikose kakukhwaskana na Baala,+
Zina la ŵasembe* ŵa ŵangoza pamoza na ŵasembe.+
5 Na awo ŵakusindamira mawumba ghakuchanya pachanya pa nyumba,+
Na awo ŵakujikama pasi na kulapa kuti ŵagomezgekenge kwa Yehova,+
Uku ŵakulapira mu zina la Malikamu.+
6 Na awo ŵaleka kulondezga Yehova+
Na awo ŵakumupenja chara Yehova nesi kufumba kwa iyo.”+
7 Khalani chete pamaso pa Fumu Yikuru Yehova, chifukwa zuŵa la Yehova laneng’enera.+
Yehova wanozga sembe, ndipo waŵatuŵiska awo waŵachema.
8 “Pa zuŵa la sembe ya Yehova nizamulanga ŵakaronga,
Ŵana ŵa themba,+ na wose awo ŵakuvwara chakuvwara chachilendo.
9 Pa zuŵa ilo, nizamulanga waliyose uyo wakukwera pa gome,*
Awo ŵakuzuzga nyumba ya fumu yawo na nkhaza ndiposo upusikizgi.”
10 Yehova wakuti: “Pa zuŵa ilo,
Ku Chipata cha Somba+ kuzamuŵa chiwawa cha kubobota,
Ku chigaŵa chachiŵiri cha msumba kuzamuŵa kutengera,+
Ndipo ku tumapiri kuzamuŵa chiwawa chikuru cha mutekenyutekenyu.
11 Bangurani imwe mukukhala mu Makiteshi,
Chifukwa ŵamalonda wose ŵamalizgika petu,*
Wose awo ŵakupima siliva ŵaparanyika.
12 Pa nyengo iyo, nizamupenjapenja mu Yerusalemu na zinyali,
Nizamulanga awo ŵakudemwera,* awo mu mtima wawo ŵakuti,
‘Yehova kuti wachitenge chiwemi chara, nesi kuchita chiheni.’+
13 Usambazi wawo uzamuphangika ndipo nyumba zawo zizamugundumulika.+
Ŵazamuzenga nyumba, kweni ŵazamukhalamo chara,
Ndipo ŵazamupanda mpheska, kweni ŵazamumwa chara vinyo lake.+
14 Zuŵa likuru la Yehova lili pafupi!+
Laneng’enera, ndipo likwiza mwaluŵiro chomene!+
Kupoma kwa zuŵa la Yehova kukuŵaŵa.+
Pa zuŵa ili, chinkhara chizamulira.+
15 Zuŵa ili ni zuŵa la kutukutwa,+
Zuŵa la suzgo na kukweŵeska mtima,+
Zuŵa la chimphepo na kuparanya,
Zuŵa la mdima na chisi,+
Zuŵa la mabingu na chimdima,+
16 Zuŵa la kulira kwa mbata na kupoma kwa nkhondo,+
Kulimbana na misumba ya malinga na vigongwe vitali vyamumakona.+
17 Nizamukweŵeska ŵanthu,
Ndipo ŵazamwenda nga mbanthu ŵachibulumutira,+
Chifukwa uyo ŵamunangira ni Yehova.+
18 Siliva lawo panji golide lawo vizamuŵathaska chara mu zuŵa la ukali wa Yehova.+
Charu chose chapasi chizamumyangulika na moto wa mwamphu wake,+
Pakuti wazamwiza na pharanyiko, enya, lakofya chomene, pa wose awo ŵakukhala pa charu chapasi.”+
2 Pambere dango lindambe kugwira ntchito,
Pambere zuŵa lindajumphe nga ni mwelero,
Pambere undize pa imwe ukali wakugolera wa Yehova,+
Pambere zuŵa la ukali wa Yehova lindize pa imwe,
3 Penjani Yehova+ imwe mose ŵakuzika* ŵa pa charu chapasi,
Imwe mukusunga dango* lake laurunji.
Penjani urunji, penjani kuzika.*
Panyake mungazakabisika pa zuŵa la ukali wa Yehova.+
4 Pakuti msumba wa Gaza uzamuŵa mahami,
Ashikeloni wazamuŵa mayiyi.+
5 “Soka kwa awo ŵakukhala mumphepete mwa nyanja, mtundu wa Ŵakereti!+
Mazgu gha Yehova ghimikana namwe.
Imwe Ŵakenani, charu cha Ŵafilisiti, nizamumuparanyani,
Mwakuti pazamuŵavya na yumoza uyo wazamukhalapo.
6 Malo gha mumphepete mwa nyanja ghazamuŵa ghakuliskako viŵeto,
Ghazamuŵa na visimi vya ŵaliska ndiposo viŵaya vyamalibwe vya mberere.
7 Chizamuŵa chigaŵa cha ŵakukhalapo ŵa nyumba ya Yuda,+
Ŵazamurya kwenekura.
Namise ŵazamugona mu nyumba za Ashikeloni.
8 “Napulika msinjiro wa Mowabu+ na kutuka kwa Ŵaamoni,+
Awo ŵanyoza ŵanthu ŵane na kujitukumura kwimikana na charu chawo.+
9 Ntheura, umo ine niliri wamoyo,” ndimo wayowoyera Yehova wa mawumba, Chiuta wa Israyeli,
“Mowabu waŵenge nga ni Sodomu,+
Ndipo Ŵaamoni nga ni Gomora,+
Malo gha nkhunga, khululu la mchere, na mayiyi ghamuyirayira.+
Ŵanthu ŵane awo ŵakhalapo ŵazamuŵaphanga vinthu vyawo,
Ndipo ŵakukhalapo ŵa mtundu wane ŵazamuŵapoka malo.
10 Ivi ndivyo vizamunjira m’malo mwa kujikuzga kwawo,+
Chifukwa chakuti ŵakanyoza na kujikwezga pa ŵanthu ŵa Yehova wa mawumba.
11 Yehova wazamuŵa wakofya kwa iwo,
Chifukwa wazamumara* ŵachiuta wose ŵa pa charu chapasi,
Ndipo virwa vyose vya mitundu ya ŵanthu vizamumusindamira,*+
Chilichose kufuma pa malo ghake.
12 Imwe Ŵaetiyopiya, namwe muzamukomeka na lupanga lwane.+
13 Wazamunyoloskera woko lake kumpoto na kuparanya Asiriya,
Ndipo wazamuzgora Nineve kuŵa mayiyi,+ kuŵa charu chakomira nga ntchipalamba.
14 Vyakuŵeta vizamugona pasi mukati mwake, vinyama vyamuthengere vyamtundu uliwose.
Nyangenyange na chinungu vizamukhala pa ntchindamiro zake usiku wose.
Mazgu ghazamwimba pa windo.
Pa mulyango pazamuŵa pharanyiko,
Pakuti wazamuŵika pakweru mathabwa gha sidara.
15 Uwu ni msumba wakujikuzga uwo ukakhalanga mwakufwasa,
Uwo mu mtima wake ukatenge: ‘Ndine pera, kulijeso munyake.’
Sono wazgoka chinthu chakuchitiska wofi,
Malo ghakugonamo vinyama vyamuthengere!
Waliyose uyo wakujumpha pafupi wazamulizga lukhweru na kusunkhunya woko lake.”+
3 Soka ku msumba wakugaluka, wakukazuzgika, na wakuyuzga!+
2 Msumba uwu undapulikire mazgu,+ undazomere kulangika.+
Ukugomezga Yehova chara,+ ukusendelera pafupi chara na Chiuta wake.+
3 Ŵakaronga awo ŵali mukati mwake ŵakubangura nga ni nkhalamu.+
Ŵeruzgi ŵake ni mphumphi zakwenda usiku,
Izo zikulekako nanga ntchiwangwa chara chakuti zimemene m’paka namulenji.
4 Ntchimi zake mbanalume ŵamsinjiro, na ŵaryarya.+
5 Yehova ni murunji mukati mwake,+ ndipo wakuchita kaheni chara.
Mulenji uliwose wakupharazga vyeruzgo vyake,+
Nga mbungweru, vikutondeka yayi.
Kweni wambura urunji wakumanya soni chara.+
6 “Nkhaparanya mitundu, ndipo vigongwe vyawo vyamumakona vikapasuka.
Nkhaparanya misewu yawo, mwakuti pakaŵavya na yumoza uyo wakendamo.
Misumba yawo yikazgoka mahami, yambura munthu, yambura kukhalamo munthu nanga njumoza.+
7 Nkhati: ‘Uzamuniwopa nadi, ndipo uzamuzomera kulangika,’*+
Kweni wose ŵakakhumbisiska chomene kuchita upusikizgi.+
8 Yehova wakuti: ‘Ntheura lutilirani kunilindilira,+
M’paka pa zuŵa ilo nizamuwuka kuti niphange,*
Pakuti cheruzgo chane ntchakuti niwunjike mitundu, kuti niwunganye maufumu,
Kuti nipungulire kutukutwa kwane pa iwo, na ukali wane wose uwo ukugolera,+
Pakuti charu chose chapasi chizamumyangulika na moto wa mwamphu wane.+
9 Pa nyengo iyo, nizamusintha kayowoyero ka ŵanthu kuŵa kayowoyero katuŵa,
Kuti wose ŵachemenge pa zina la Yehova,
10 Kufuma ku chigaŵa cha milonga ya ku Etiyopiya,
Awo ŵakuniŵeyelera, mwana mwanakazi wa ŵanthu ŵane awo ŵakambininika, ŵizenge na chawanangwa kwa ine.+
11 Pa zuŵa ilo, uzamukhozgeka soni chara
Chifukwa cha milimo yako yose iyo ukachita pakunigalukira,+
Pakuti ŵakujikuzga awo ŵakujiŵikamo nizamuŵafumiskapo pakati pako,
Ndipo uzamuŵaso wakujikuzga chara mu phiri lane lituŵa.+
12 Ŵanthu ŵakujiyuyura na ŵakuzika ndiwo nizamuŵasida mukati mwako.+
Ndipo ŵazamubisama mu zina la Yehova.
13 Ŵaisrayeli ŵakukhalapo+ ŵazamuchita ubendezi chara,+
Ŵazamuyowoya utesi chara, lulimi lwakupusika luzamusangikamo chara mu milomo yawo.
Ŵazamurya na kugona pasi, ndipo pazamuŵavya na yumoza wakuŵawofya.”+
14 Chemerezga mwachimwemwe, iwe mwana mwanakazi wa Ziyoni!
Chemerezga mwakusangwa, iwe Israyeli!+
Kondwa na kusekelera na mtima wako wose, iwe mwana mwanakazi wa Yerusalemu!+
15 Yehova wawuskapo vyeruzgo pa iwe.+
Iyo wawezga mulwani wako.+
Themba la Israyeli, Yehova, lili mukati mwako.+
Soka uliwopengeso chara.+
16 Pa zuŵa ilo, Yerusalemu wazamuphalirika kuti:
“Ungopanga chara, iwe Ziyoni.+
Mawoko ghako kughalopweska chara.
17 Yehova Chiuta wako wali mukati mwako,+
Pakuti ngwankhongono, wakuthaskenge.
Wazamuzaya na chimwemwe chikuru chifukwa cha iwe.+
Wazamukhala chete* chifukwa cha chitemwa chake.
Wazamusekelera na kuchemerezga mwachimwemwe chifukwa cha iwe.
18 Nizamuwunjika pamoza awo ŵali na chitima chifukwa chakuti ŵakaŵapo chara pa viphikiro vyako,+
Iwo ŵakaŵa nawe chara chifukwa ŵakaŵa ku wuzga uko ŵakatombozgekanga.+
19 Wona! Pa nyengo iyo, nizamwimikana na wose awo ŵakakuyuzganga.+
Ndipo nizamuthaska uyo wakugontha,+
Na kuwunjika pamoza awo ŵambininika.+
Nizamuŵazgora kuŵa chinthu chakulumbika na chakumanyikwa*
Mu charu chose icho ŵakakhozgeka soni.
20 Pa nyengo iyo, nizamukunjizga mukati,
Pa nyengo iyo, nizamukuwunjika pamoza.
Pakuti nizamukuzgora kuŵa chinthu chakumanyikwa* na chakulumbika+ pakati pa ŵanthu wose ŵa pa charu chapasi,
Para ŵanthu ŵako awo ŵakakoleka wuzga nazakaŵawunjikaso pamoza pamaso pako,” ndimo wayowoyera Yehova.+
Kung’anamura kuti, “Yehova Wabisa (Wasunga).”
Vikwenera kuti ni vinthu panji vyakuchita vyakukhwaskana na kusopa vikozgo.
Mazgu ghanyake, “ŵasofi.”
Panji kuti, “pulatifomu; luŵaza.” Panji ŵakunena gome la chitengo cha themba.
Mazgu gheneko, “ŵachetamiskika.”
Mazgu gheneko, “awo ŵakuwunjikana pa skayira zawo,” nga ni vinyo.
Mazgu gheneko, “matumbo ghawo.”
Panji kuti, “ŵakujiyuyura.”
Mazgu gheneko, “cheruzgo chake.”
Panji kuti, “kujiyuyura.”
Panji kuti, “muhanya pakati.”
Panji kuti, “wazamuŵapwelelera.”
Panji kuti, “wazamuŵazgora vinthu vyawaka.”
Panji kuti, “vizamumusopa.”
Panji kuti, “kuchenyeka.”
Panji kuti, “Nizamumulanga.”
Pangayowoyekaso kuti, “nizamuwuka nga ni kaboni.”
Mazgu gheneko, “kumuteŵetera chiŵegha na chiŵegha.”
Panji kuti, “Wazamukhala fwase; Wazamukhorwa.”
Panji kuti, “chalumbiri.” Mazgu gheneko, “zina.”
Panji kuti, “chalumbiri.” Mazgu gheneko, “zina.”