MALAKI

1 Uthenga:

Mazgu gha Yehova kwa Israyeli kwizira mwa Malaki:*

2 Yehova wakuti: “Namulongorani chitemwa mwa ŵanthu imwe.”+

Kweni imwe mukuti: “Kasi mwatilongora wuli chitemwa?”

“Asi Esau wakaŵa mukuru wa Yakhobe?”+ wakuti Yehova. “Kweni nkhatemwa Yakhobe, 3 ndipo nkhatinkha Esau.+ Mapiri ghake nkhaghazgora mayiyi+ na kulekera chiharo chake ŵakambwe ŵa mu mapopa.”+

4 “Nangauli Edomu wakuti, ‘Tapankhuka, kweni tizamuwelera na kuzengaso mahami,’* ichi ndicho Yehova wa mawumba wayowoya, ‘Ŵazamuzenga kweni nizamubwangandulira pasi, ndipo malo agha ghazamuchemeka “chigaŵa cha uheni” ndipo iwo ŵazamuchemeka “ŵanthu awo Yehova wakwiya nawo muyirayira.”+ 5 Maso ghinu ghazamuchiwona ichi, ndipo muzamuyowoya kuti, “Yehova wakuzgike mu chigaŵa cha Israyeli.”’”

6 “‘Mwana wakuchindika wiske,+ ndipo muteŵeti wakuchindika fumu yake. Usange ine ndine wiskemwe,+ ntchindi zane zili nkhu?+ Ndipo usange ine ndine fumu* yinu, mukulekerachi kuniwopa?’* ndimo wayowoyera Yehova wa mawumba kwa imwe ŵasembe, imwe mukupepura zina lane.+

“‘Kweni imwe mukuti: “Talipepura wuli zina linu?”’

7 “‘Mukupeleka chakurya* chakukazuzgika pa jotchero lane.’

“‘Ndipo mukuti: “Kasi tamukazuzgani wuli?”’

“‘Mukuyowoya kuti: “Thebulu la Yehova+ ndakuyuyulika.” 8 Para mukupeleka sembe ya nyama yachibulumutira, mukuti: “Ntchiheni chara.” Ndipo para mukupeleka sembe ya nyama yakupendera panji yilwari, mukuti: “Ntchiheni chara.”’”+

“Yezgani kupeleka nyama izi kwa mulongozgi winu. Kasi wakondwenge namwe panji kumupokelerani makora?” wakuti Yehova wa mawumba.

9 “Sono, ŵeyelerani Chiuta kuti watichitire lusungu. Kasi wangapokelera makora waliyose wa imwe, na vyakupeleka vyantheura, ivyo vikufuma mu mawoko ghinu?” wakuti Yehova wa mawumba.

10 “Kasi ni njani pakati pinu uyo wakukhumba kujara milyango?*+ Pakuti mungapemba yayi moto pa jotchero lane kwambura malipiro.+ Ine nkhukondwa namwe yayi,” wakuti Yehova wa mawumba, “ndipo chawanangwa chilichose chakufuma mu woko linu nkhusangwa nacho chara.”+

11 “Pakuti kwamba pa kufuma kwa dazi m’paka pa kunjira kwake,* zina lane lizamuŵa likuru pakati pa mitundu.+ Mu malo ghose sembe zizamusunkhizgika, ndipo vyakupeleka vizamupelekeka ku zina lane, nga ntchawananga chituŵa, chifukwa zina lane lizamuŵa likuru pakati pa mitundu,”+ wakuti Yehova wa mawumba.

12 “Kweni imwe mukulifipiska,*+ pakuyowoya kuti, ‘Thebulu la Yehova lakazuzgika, ndipo chipambi chake na chakurya chake, vikwenera kuyuyulika.’+ 13 Mukuyowoyaso kuti, ‘Wonani! Ni vyakuvuska chomene!’ ndipo mukuvinuska mwakunyanyara,” ndimo wayowoyera Yehova wa mawumba. “Mukwiza na nyama zakwiba, zakupendera, na zakulwara. Enya, mukwiza na nyama izi nga ntchawanangwa. Kasi ningazipokelera kufuma ku woko linu?”+ wakuti Yehova.

14 “Ngwakutembeka mupusikizgi, uyo wali na nyama yanalume yiwemi pa mskambo wake, kweni wakulapa na kupeleka sembe yachilema* kwa Yehova. Pakuti ine ndine Themba likuru,+ ndipo zina lane lizamuŵa lakofya pakati pa mitundu,”+ wakuti Yehova wa mawumba.

2 “Sono imwe ŵasembe,* dango ili ndinu.+ 2 Usange mukukana kupulikira na kuliŵika mu mtima winu kuti muchindike zina lane,” wakuti Yehova wa mawumba, “nitumenge nthembo pa imwe,+ ndipo nizgorenge vitumbiko vinu kuŵa nthembo.+ Enya, nazgora vitumbiko kuŵa nthembo chifukwa mukuliŵika mu mtima chara.”

3 “Wonani! Chifukwa cha imwe,+ nizamuparanya* mbuto zinu izo mwaseŵa, nizamumija ulongwe pa visko vinu, ulongwe wa viphikiro vinu. Ndipo muzamunyamulika na kukatayika pa ulongwe.* 4 Penepapo muzamumanya kuti namupani dango ili, kuti phangano lane na Levi lilutilire,”+ wakuti Yehova wa mawumba.

5 “Phangano lane na iyo likaŵa la umoyo na mtende, ilo nkhapeleka kwa iyo, pamoza na wofi. Wakanopanga, enya, zina lane wakachitanga nalo wofi. 6 Dango* launenesko likaŵa mu mulomo wake,+ ndipo ubendezi ukasangikapo chara pa milomo yake. Wakenda nane mwamtende ndiposo mwakunyoloka,+ wakawezga ŵanandi ku kwananga. 7 Pakuti milomo ya wasembe* yikwenera kusungilira mahara, ndipo ŵanthu ŵakwenera kupenja dango* ku mulomo wake,+ chifukwa ni thenga la Yehova wa mawumba.

8 “Kweni imwe mwapatuka mu nthowa. Mwakhuŵazga ŵanandi chifukwa cha ivyo mukuchita na dango.*+ Mwananga phangano la Levi,”+ wakuti Yehova wa mawumba. 9 “Ntheura, nizamumuyuyurani na kumuzgorani ŵapasi panthazi pa ŵanthu wose, chifukwa mukasunga yayi nthowa zane, kweni mukalongora kutemwera pakulondezga dango.”+

10 “Asi tose tili na dada yumoza?+ Asi Chiuta njumoza uyo wali kutilenga? Chifukwa wuli pera tikuchitirana mwaupusikizgi yumoza na munyake,+ kufipiska phangano la ŵasekuru ŵithu? 11 Yuda wachita upusikizgi, ndipo chinthu chaukazuzi chachitika mu Israyeli na mu Yerusalemu, pakuti Yuda wafipiska utuŵa* wa Yehova,+ uwo Chiuta wakuwutemwa. Yuda watora mwana msungwana wa chiuta wachilendo kuŵa muwoli wake.+ 12 Yehova wazamudumuramo mu mahema gha Yakhobe waliyose uyo wakuchita ichi, kwali waŵe njani,* nanga wangaŵa kuti wakupeleka sembe ya wanangwa kwa Yehova wa mawumba.”+

13 “Pali chinthu chinyake* icho mukuchita, icho chikuchitiska kuti jotchero la Yehova lizure na masozi, kulira, na kutampha, lekani iyo walekerathu kuŵikako mahara ku sembe yinu ya wanangwa, nesi kukondwa na chilichose icho chikufuma mu woko linu.+ 14 Ndipo mukuti, ‘Chifukwa wuli?’ Chifukwa ntchakuti Yehova wakaŵa kaboni pakati pa iwe na muwoli wa pa uwukirano wako, uyo wamuchitira upusikizgi, nangauli ni munyako ndiposo muwoli wako uyo ukachita nayo phangano.+ 15 Kweni pakaŵa munyake uyo wakachitako yayi ichi, pakuti wakaŵa na mzimu uwo ukakhalako. Kasi iyo wakapenjanga vichi? Mphapu* ya Chiuta. Ntheura muŵe maso na mzimu winu, ndipo mungachitanga upusikizgi chara na muwoli wa pa uwukirano winu. 16 Pakuti nkhutinkha* kupatana,”+ wakuti Yehova Chiuta wa Israyeli, “ndiposo uyo wakubenekelera chakuvwara chake na nkhaza,”* wakuti Yehova wa mawumba. “Muŵe maso na mzimu winu, ndipo mungachitanga upusikizgi chara.+

17 “Mwavuska Yehova na mazgu ghinu.+ Kweni mukuti, ‘Tamuvuska wuli?’ Pakuyowoya kuti, ‘Waliyose uyo wakuchita uheni ni muwemi mu maso gha Yehova, ndipo wakukondwa nayo,’+ panji pakuyowoya kuti, ‘Chiuta waurunji wali nkhu?’”

3 “Wonani, nkhutuma thenga lane, ndipo lizamunozga nthowa panthazi pane.+ Ndipo Fumu yanadi iyo mukupenja, yizamwiza ku tempile lake+ mwamabuchi. Ndipo thenga la phangano ilo mukukondwa nalo, lizamwiza. Wonani! Lizamwiza nadi,” ndimo wayowoyera Yehova wa mawumba.

2 “Kweni kasi ni njani uyo wazamuzizipizga pa zuŵa ilo thenga ili likwizira, ndipo ni njani wazamwima para lazakawoneka? Chifukwa lizamuŵa nga ni moto wa munthu wakwenga ndiposo nga ni sopo*+ ya awo ŵakuchapa. 3 Lizamukhala pasi nga ni munthu wakwenga na wakusuka siliva+ ndipo lizamutozga ŵana ŵa Levi. Lizamuŵatozga* nga ni golide ndiposo nga ni siliva, ndipo kwa Yehova ŵazamuŵa nadi ŵanthu awo ŵakupeleka sembe ya wanangwa mu urunji. 4 Sembe za wanangwa izo Yuda na Yerusalemu ŵazamupeleka zizamumukondweska Yehova, nga umo vikaŵiranga mu mazuŵa ghakale, na umo vikaŵiranga mu vyaka vyakale.+

5 “Nizamusendelera kwa imwe kuti neruzge. Mwaluŵiro nizamuŵa kaboni kwimikana na ŵafwiti,+ kwimikana na ŵaleŵi, kwimikana na awo ŵakulapa vilapo vyautesi,+ kwimikana na awo ŵakuchitira uryarya waganyu,+ chokoro, na mwana wambura wiske,*+ ndiposo kwimikana na awo ŵakukana kovwira mulendo.+ Aŵa ŵakunopa chara,” ndimo wayowoyera Yehova wa mawumba.

6 “Chifukwa ine ndine Yehova, nkhusintha chara.*+ Imwe ndimwe ŵana ŵa Yakhobe, muchali mundamare. 7 Malango ghane mukaghaŵika pamphete na kuleka kughasunga kufuma mu mazuŵa gha ŵasekuru ŵinu.+ Welerani kwa ine, ndipo ine niwelerenge kwa imwe,”+ ndimo wayowoyera Yehova wa mawumba.

Kweni imwe mukuti: “Kasi tiwelerenge wuli?”

8 “Kasi munthu wangibira Chiuta? Kweni imwe mukunibira.”

Ndipo mukuti: “Kasi tamwibirani wuli?”

“Pa nkhani ya vyakhumi na vyakupeleka. 9 Muli ŵakutembeka nadi,* pakuti mukunibira, enya, mtundu wose ukuchita nthena. 10 Zaninge navyo vyakhumi vyose mu nyumba yakusungiramo,+ kuti mu nyumba yane muŵe chakurya.+ Niyezgani pa nkhani iyi,” ndimo wayowoyera Yehova wa mawumba, “muwone usange nilekenge kumujulirani vipata vyakuchanya+ na kumupungulirani* vitumbiko m’paka musoŵe pakusunga.”+

11 “Chifukwa cha imwe, nizamuchenya uyo wakurya,* ndipo wazamunanga chara chipambi cha mu charu chinu, nesi mpheska za m’munda winu kuti zileke kupambika,”+ ndimo wayowoyera Yehova wa mawumba.

12 “Mitundu yose yizamumuchemani kuti ndimwe ŵakutumbikika,+ chifukwa muzamuŵa charu chakukondweska,” ndimo wayowoyera Yehova wa mawumba.

13 “Mazgu ghinu agho mukuniyowoyera ngankhongono,” ndimo wayowoyera Yehova.

Ndipo mukuti: “Kasi tayowoyeskana mazgu wuli kwimikana namwe?”+

14 “Mukuti: ‘Kuteŵetera Chiuta kulije chandulo.+ Tasanga chandulo wuli chifukwa cha kusunga malango ghake na kwenda ŵachitima panthazi pa Yehova wa mawumba? 15 Ŵanthu ŵakujiŵikamo ndiwo sono tikuŵawona kuti mbakutumbikika. Kweniso awo ŵakuchita viheni ndiwo vinthu vikuŵayendera makora.+ Ŵakumuyezga Chiuta kweni ŵakulangika chara.’”

16 Pa nyengo yira, awo ŵakopa Yehova ŵakayowoyeskananga, waliyose na munyake, ndipo Yehova wakaŵikangako khutu lake na kutegherezga. Ndipo buku la chikumbusko la awo ŵakopa Yehova na awo ŵakughanaghanira* zina lake+ likalembeka pamaso pake.+

17 “Ŵazamuŵa ŵane,”+ ndimo wayowoyera Yehova wa mawumba, “mu zuŵa ilo nizamuŵazgora kuŵa chuma chane chapadera.+ Nizamuŵalongora chiwuravi, nga umo dada wakulongolera chiwuravi ku mwana wake uyo wakumuteŵetera.+ 18 Ndipo muzamuwonaso mphambano pakati pa munthu murunji na munthu muheni,+ pakati pa uyo wakuteŵetera Chiuta na uyo wakuleka kumuteŵetera.”

4 “Pakuti wonani! zuŵa likwiza, lakotcha nga ni ng’anjo,+ apo wose awo ŵakujiŵikamo na wose awo ŵakuchita viheni ŵazamuŵa nga ntchipundwe. Zuŵa ilo likwiza lizamuŵamyangura, mwakuti lizamuŵalekera msisi chara nesi munthavi,” ndimo wayowoyera Yehova wa mawumba. 2 “Kweni imwe mukuchindika* zina lane, dazi laurunji lizamumuŵalirani. Malazi* ghake ghazamuŵa ghakuchizga, ndipo muzamudukaduka nga ni matholi* ghakututuŵa.”

3 “Ndipo ŵaheni muzamuŵakandira pasi, pakuti ŵazamuŵa nga ni fuvu kusi ku vikandiro vinu pa zuŵa ilo nizamuchitirapo kanthu,” wakuti Yehova wa mawumba.

4 “Kumbukani Dango la muteŵeti wane Mozesi, malango na vyeruzgo ivyo nkhalangura pa Horebu kuti Israyeli yose wapulikirenge.+

5 “Wonani, nkhumutumirani ntchimi Eliya+ pambere zuŵa likuru na lakofya la Yehova lindize.+ 6 Iyo wazamuzgora mitima ya ŵadada kuti yiwelereso ku ŵana ŵawo,+ na mitima ya ŵana kuti yiwelereso kwa awiskewo, mwakuti nileke kwiza na kutimba charu chapasi, kuchipeleka ku pharanyiko.”

(Apa mphaumaliro wa Malemba Ghachihebere na Ghachiaramu. Ghakulondezgapo ni Malemba Ghachigiriki)