KALATA YACHIŴIRI KU ŴAKORINTE

1 Ine Paulosi, mpositole wa Khristu Yesu kwizira mu khumbo la Chiuta, na Timote+ mubali withu, ku mpingo wa Chiuta uwo uli mu Korinte, pamoza na ŵatuŵa wose awo ŵali mu Akaya mose:+

2 Mphanyi lusungu lukuru na mtende vyakufuma kwa Chiuta Adada ŵithu na Fumu Yesu Khristu, vyaŵa namwe.

3 Walumbike Chiuta na Wiske wa Fumu yithu Yesu Khristu,+ Dada wa mtima walusungu+ na Chiuta wa chisangulusko chose,+ 4 uyo wakutisanguluska* mu suzgo* yithu yose,+ mwakuti nase tisanguluske+ awo ŵali mu suzgo* ya mtundu uliwose kwizira mu chisangulusko icho ise tikapokera kwa Chiuta.+ 5 Pakuti tikusangana na masuzgo ghanandi chifukwa cha Khristu,+ ntheura tikupokeraso chisangulusko chikuru kwizira mwa Khristu. 6 Sono usange tili mu suzgo,* ntchifukwa chakuti imwe musanguluskike na kuponoskeka. Ndipo usange tikusanguluskika, ntchifukwa chakuti imwe musanguluskike, mwakuti muzizipizge visuzgo vyakuyana na ivyo nase tikusuzgika navyo. 7 Chigomezgo chithu kwa imwe ntchambura kusunkhunyika, pakuti tikumanya kuti namwe mukusangana na masuzgo nga ndise, ntheura namwe muzamusanguluskika.+

8 Ŵabali, tikukhumba kuti mumanye suzgo iyo yikatiwira mu chigaŵa cha Asiya.+ Tikasangana na suzgo yikuru yakujumpha nkhongono zithu, mwakuti tikamanyanga yayi kuti tingaŵa ŵamoyo.+ 9 Nakuti tikawonanga nga kuti tapokera cheruzgo cha nyifwa. Ichi chikaŵa nthena kuti tileke kujigomezga tekha, kweni kuti tigomezge Chiuta+ uyo wakuwuska ŵakufwa. 10 Iyo wakatithaska apo tikaŵa pafupi kufwa ndipo watithaskenge, nakuti tikugomezga kuti walutilirenge kutithaska.+ 11 Namwe mungatovwira para mukutilombera na kutiŵeyelelera,+ mwakuti ŵanandi ŵawonge Chiuta chifukwa cha kuwona ivyo watichitira pa kuzgora malurombo gha ŵanthu ŵanandi.*+

12 Chinthu icho tikunotha nacho ntchakuti mu charu ichi, chomenechomene pakati pinu, talongora utuŵa na unenesko wakufuma kwa Chiuta. Tachita ivi na vinjeru vithu yayi,+ kweni Chiuta uyo wali na lusungu lukuru ndiyo watovwira. Ndipo njuŵi yithu nayo yikutichitira ukaboni. 13 Pakuti tikumulemberani vinthu vinyake yayi padera pa ivyo mungaŵazga* na kupulikiska, ndipo nkhugomezga kuti mulutilirenge kuvipulikiska makora* vinthu ivi, 14 nga umo mukumanyira kuti mukunotha chifukwa cha ise, nga umo nase tizamunothera chifukwa cha imwe mu zuŵa la Fumu yithu Yesu.

15 Ntheura na chigomezgo ichi, nkhakhumbanga kwiza dankha kwa imwe, kuti muŵe na chifukwa chachiŵiri chakuŵira ŵachimwemwe.* 16 Pakuti nkhakhumbanga kuzakamuwonani pakuluta ku Makedoniya, na kwizaso kwa imwe pakufuma ku Makedoniya, ndipo imwe muzakanipelekezge pakuluta ku Yudeya.+ 17 Apo nkhaŵa na khumbo ili, kasi nkhani iyi nkhayiwona mwakupepuka? Panji vinthu ivyo nkhakhumbanga, nkhavikhumba kuyana na thupi, mwakuti niyowoye kuti “Enya, enya” ndipo “Yayi, yayi”? 18 Kweni Chiuta ngwakugomezgeka, mwakuti para tikuyowoya namwe kuti “enya” waleke kuŵa “yayi.” 19 Pakuti Mwana wa Chiuta, Yesu Khristu, uyo tikapharazga pakati pinu, Ine na Silivano* na Timote,+ wakuŵa “enya” na kuzgoka “chara” yayi, kweni nyengo zose wakuŵa “enya.” 20 Pakuti nanga malayizgo gha Chiuta ghaŵe ghanandi wuli, ghazgoka “enya” kwizira mwa iyo.+ Ntheura pera, kwizira mwa iyo tikuti “Ameni” kwa Chiuta,+ kuti timupe uchindami Chiuta. 21 Kweni uyo wakupanikizga kuti imwe na ise tili ŵa Khristu ndiposo uyo watiphakazga ni Chiuta.+ 22 Watidindaso na chidindo chake+ ndipo watipa chikhole cha ivyo vikwiza, icho ni mzimu+ mu mitima yithu.

23 Sono nkhuchema Chiuta kuŵa kaboni wane, kuti nkhatondeka kwiza ku Korinte chifukwa nkhakhumba yayi kuti muŵe na chitima chikuru. 24 Ntchifukwa chakuti tili mafumu pa chipulikano chinu yayi,+ kweni tili ŵantchito ŵanyinu kuti muŵe ŵachimwemwe, pakuti muli ŵakukhora chifukwa cha chipulikano chinu.

2 Pakuti ichi ndicho nasankha kuti nileke kwizaso kwa imwe na chitima. 2 Pakuti usange namuchitiskani chitima, kasi ni njani uyo wanisanguluskenge padera pa uyo namuchitiska chitima? 3 Nkhalemba icho nkhachita kuti para niza, nizakaleke kuchita chitima na awo nkhwenera kusekelera chifukwa cha iwo, pakuti nili na chigomezgo kuti icho chikunipa chimwemwe ndicho mose chikumupani chimwemwe. 4 Nkhamulemberani na masozi ghanandi chifukwa cha suzgo yikuru na kukweŵeka mtima kuti muchite chitima yayi,+ kweni kuti mumanye chitemwa icho nili nacho pa imwe.

5 Sono usange munthu wachita chinthu chakuchitiska chitima,+ wachitiska chitima ine yayi, kweni wachitiska chitima mose mu nthowa yinyake. Nkhukhumba kuyowoya vinandi vya nkhani iyi. 6 Ntchenyo iyo yapelekeka na ŵanthu ŵanandi njakukwana kwa munthu wanthena. 7 Sono mumugowokere na mtima wose na kumusanguluska,+ kuti waleke kuŵa* na chitima chikuru.+ 8 Ntheura, nkhumuchiskani kuti mumulongore kuti mukumutemwa.+ 9 Lekani nkhamulemberani kuti niwone usange mungalongora kuti mukupulikira nadi mu vinthu vyose. 10 Usange mukugowokera munthu na mtima wose, nane nkhugowoka. Nakuti ine, chilichose icho nagowokera (usange nagowokera kanthu) ntchifukwa cha imwe pamaso pa Khristu, 11 mwakuti Satana waleke kutichenjelera,*+ chifukwa njomba zake tikuzimanya.*+

12 Sono nkhati nafika mu Trowa+ kuti nipharazge makani ghawemi ghakuyowoya vya Khristu, mulyango ukanijulikira kuti nichite mulimo wa Fumu. 13 Mtima wane ukaŵa mu malo yayi chifukwa Tito+ mubali wane, nkhamusanga chara. Ntheura nkhaŵalayira na kunyamuka kuya ku Makedoniya.+

14 Kweni tiwonge Chiuta, uyo nyengo zose wakutilongozga pamoza na Khristu kuti tiŵe ŵakukondwa chomene. Ndipo kwizira mwa ise sungu la kumumanya iyo likupulikikwa mu malo ghalighose. 15 Pakuti tili sungu liwemi kwa Chiuta chifukwa tikupharazga vya Khristu pakati pa awo ŵakuponoskeka na pakati pa awo ŵakuparanyika. 16 Kwa awo ŵakuparanyika tili sungu la nyifwa kulongozgera ku nyifwa,+ kweni ku awo ŵakuponoskeka tili sungu la umoyo kulongozgera ku umoyo. Ndipo ni njani uyo ngwakwenelera kuchita vinthu ivi? 17 Ndise, pakuti tikusaska* mazgu gha Chiuta yayi,+ nga umo ŵanthu ŵanandi ŵakuchitira, kweni tikuyowoya na unenesko wose pakuŵa ŵalondezgi ŵa Khristu pamaso pa Chiuta, kweniso nga mbanthu awo ŵatumika na Chiuta.

3 Kasi tikwambaso kujilumba tekha? Panji kasi tikukhumbikwira makalata ghamalumbo pakwiza kwa imwe, panji ghakufuma kwa imwe, nga umo ŵanthu ŵanyake ŵakuchitira? 2 Imwe ndimwe kalata yithu,+ yakulembeka mu mitima yithu, iyo yikumanyikwa na kuŵazgika na ŵanthu wose. 3 Pakuti mukulongoreka kuti ndimwe kalata ya Khristu yakulembeka na ise pakuŵa ŵateŵeti,+ yakulembeka na inki yayi kweni na mzimu wa Chiuta wamoyo. Yili kulembeka pa malibwe ghapapati yayi,+ kweni pa malibwe ghathupi, pa mitima.+

4 Tili na chigomezgo ichi mwa Chiuta kwizira mwa Khristu. 5 Patekha tili ŵakwenelera yayi kuchita mulimo uwu, kweni Chiuta ndiyo wakutovwira kuti tiŵe ŵakwenelera.+ 6 Ndiyo watizgora ŵakwenelera kuŵa ŵateŵeti ŵa phangano liphya,+ ŵa malango ghakulembeka yayi,+ kweni ŵa mzimu. Pakuti malango ghakulembeka ghakupeleka cheruzgo cha nyifwa,+ kweni mzimu ukuzgora munthu kuŵa wamoyo.+

7 Usange Dango ilo likupeleka nyifwa ndiposo ilo likalembeka pa malibwe+ likiza mu uchindami, mwakuti ŵana ŵa Israyeli ŵakatondeka kudodoliska chisko cha Mozesi chifukwa cha uchindami wa chisko chake,+ uchindami uwo ukenera kumara, 8 asi kupelekeka kwa mzimu+ kuŵenge na uchindami ukuru?+ 9 Usange Dango ilo likuti ŵanthu mbakwananga+ likaŵa lauchindami,+ ipo milimo iyo yikovwira ŵanthu kuti ŵaŵe ŵarunji yili na uchindami ukuru.+ 10 Malango agho ghakaŵa ghauchindami ghapokeka uchindami chifukwa cha uchindami uwo ukuluska igho.+ 11 Pakuti usange malango agho ghakenera kumara ghakiza na uchindami,+ ipo phangano lasono likuŵa na uchindami ukuru.+

12 Pakuti tili na chigomezgo ichi,+ tikuyowoya na wanangwa ukuru, 13 ndipo tikuchita nga umo vikaŵira na Mozesi yayi apo wakadikanga chidiko pa chisko chake,+ mwakuti ŵana ŵa Israyeli ŵaleke kudodoliska pa malango agho ghakenera kumara. 14 Kweni maghanoghano ghawo ghakaŵa ghanonono.+ Pakuti m’paka mu zuŵa ili, chidiko chakuyana waka chikukhalilira kwambura kubenuka para ŵakuŵazga phangano lakale,+ chifukwa chikuwuskikapo kwizira mwa Khristu pera.+ 15 Nakuti m’paka muhanya uno, nyengo yiliyose para mabuku gha Mozesi ghakuŵazgika,+ chidiko chikubenekelereka pa mitima yawo.+ 16 Kweni para munthu wang’anamukira kwa Yehova,* chidiko chikuwuskikapo.+ 17 Yehova* ni Mzimu,+ ndipo apo pali mzimu wa Yehova,* pali wanangwa.+ 18 Ndipo tose na visko vyambura kudika tikuŵaliska uchindami wa Yehova* nga ni magilasi, ndipo tikuzgoreka kuŵa mu chikozgo chakuyana waka kufuma ku uchindami kuya ku uchindami, nga umo wakuchitira Yehova,* uyo ni Mzimu.*+

4 Ntheura pakuti tili na uteŵeti uwu kuyana na lusungu ulo wakatilongora, tikugongowa yayi. 2 Kweni taleka vinthu vyakubisika vyakukhozga soni, tikwenda mu uchenjezi yayi, nesi kutimbanizga mazgu gha Chiuta.+ Kweni tikujilumba tekha pamaso pa Chiuta ku njuŵi ya munthu waliyose apo tikupharazga unenesko.+ 3 Usange makani ghawemi agho tikupharazga ngakubenekelereka, ipo ngakubenekelereka pakati pa awo ŵazamuparanyika. 4 Pakati pa ŵanthu aŵa, chiuta wa nyengo iyi*+ wabulumutizga maghanoghano gha ŵambura kugomezga,+ kuti ungweru* wa makani ghawemi ghauchindami ghakuyowoya vya Khristu, uyo ntchikozgo cha Chiuta,+ uleke kuŵala pa iwo.+ 5 Pakuti tikujipharazga tekha yayi, kweni tikupharazga Khristu Yesu uyo ni Fumu, ndipo ise ndise ŵazga ŵinu chifukwa cha Yesu. 6 Pakuti Chiuta ndiyo wakati: “Ungweru uŵale kufuma mu chisi,”+ ndipo iyo waŵalira pa mitima yithu+ kuyingweruska na uchindami wa kumanya Chiuta kwizira mu chisko cha Khristu.

7 Kweni tili na usambazi uwu+ mu viŵiya vyadongo,+ kuti nkhongono zakuluska zakawiro ziŵe za Chiuta, zithu yayi.+ 8 Tikufyenyeka chomene munthowa yiliyose, kweni tikutondeka kutukuluka yayi. Tikuhangayika, kweni tikusoŵerathu chakuchita yayi.+ 9 Tikutambuzgika, kweni tikujowoleka waka yayi.+ Tikuponyeka pasi, kweni tikuparanyika yayi.+ 10 Nyengo zose tikuzizipizga masuzgo mu thupi lithu ndipo umoyo withu ukuŵa pangozi nga umo vikaŵira na Yesu,+ mwakuti umoyo wa Yesu uwonekeso mu thupi lithu. 11 Pakuti ise taŵamoyo, nyengo zose umoyo withu ukuŵa pangozi+ chifukwa cha Yesu, mwakuti umoyo wa Yesu uwonekeso mu thupi lithu ilo lingafwa. 12 Nangauli umoyo withu uli pangozi, kweni imwe mukusanga umoyo.

13 Pakuti kuli kulembeka kuti: “Nkhaŵa na chipulikano lekani nkhayowoya.”+ Sono nase tili na chipulikano chakuyana waka, lekani tikuyowoya. 14 Tikumanya kuti uyo wakawuska Yesu wazamuwuskaso ise pamoza na Yesu ndipo wazamupeleka ise pamoza na imwe.+ 15 Pakuti vinthu vyose vyachitika chifukwa cha imwe, mwakuti lusungu lukuru lusazgikire chifukwa ŵanandi ŵakuwonga kuti Chiuta wachindikike.+

16 Ntheura tikugongowa chara, kweni nanga wunthu withu wakuwaro ukumara, nadi wunthu withu wamukati ukuzgoka uphya zuŵa na zuŵa. 17 Nangauli suzgo* njakanyengo na yakupepuka, yikutipa uchindami ukuru chomene ndipo ngwamuyirayira.+ 18 Pakuti tikulaŵiska pa vinthu vyakuwoneka yayi, kweni pa vinthu vyambura kuwoneka.+ Chifukwa vinthu vyakuwoneka ni vya kanyengo, kweni vinthu vyambura kuwoneka ni vyamuyirayira.

5 Chifukwa tikumanya kuti usange nyumba yithu ya pa charu chapasi, hema ili, yapankhuka,*+ Chiuta wazamutipa nyumba yamuyirayira kuchanya, nyumba yambura kuzengeka na mawoko gha ŵanthu.+ 2 Pakuti mu nyumba* iyi tikutampha nadi, tikukhumbisiska kuvwara iyo njithu yakufuma kuchanya,*+ 3 mwakuti para tayivwara, tileke kuzakasangika nkhule. 4 Nakuti ise tili mu hema ili tikutampha na kunyekezgeka, chifukwa tikukhumba kulivura yayi, kweni kuti tivware linyake,+ mwakuti umoyo wamuyirayira umire ilo likufwa.+ 5 Sono uyo wakatinozgera vinthu ivi ni Chiuta,+ wakatipa mzimu kuŵa chikhole cha ivyo vikwiza.+

6 Ntheura nyengo zose tili ŵakukhwima mtima chomene ndipo tikumanya kuti apo tili na chikaya chithu mu thupi, tili kutali na Fumu,+ 7 pakuti tikwenda mu chipulikano, mu kuwona yayi. 8 Kweni tili ŵakukhwima mtima chomene ndipo tikukhumba kuti tiŵe kutali na thupi na kuŵa na chikaya chithu pamoza na Fumu.+ 9 Ntheura kwali chikaya chithu chiŵe pamoza na iyo panji kutali na iyo, chilato chithu ntchakuti tiŵe ŵakuzomerezgeka kwa iyo. 10 Pakuti tose tikwenera kuwonekera panthazi pa chitengo* chakweruzgirapo cha Khristu, kuti waliyose wapokere njombe kuyana na vinthu ivyo wakachita apo wakaŵa mu thupi, kwali ni viwemi panji viheni.+

11 Pakuti tikumanya kuti tikwenera kopa Fumu, tikulutilira kukhorweska ŵanthu, kweni Chiuta wakutimanya makora. Ndipo nkhugomezga kuti njuŵi zinu nazo zikutimanya makora. 12 Kuti tikujilumbaso tekha kwa imwe yayi, kweni tikumupani chifukwa chakunothera mwa ise, mwakuti muŵazgore awo ŵakunotha na kawonekero kakuwaro,+ m’malo mwa ivyo vili mu mtima. 13 Usange tikazelezeka,+ chikaŵa chifukwa cha Chiuta, usange tili ŵamahara, ntchifukwa cha imwe. 14 Pakuti chitemwa icho Khristu wali nacho chikutichichizga, chifukwa ichi ndicho tadumura, chakuti munthu yumoza wakafwira wose,+ ntheura wose ŵakafwa. 15 Wakaŵafwira wose kuti awo mbamoyo ŵaleke kujikhalira ŵekha,+ kweni ŵakondweskenge uyo wakaŵafwira na kuwuskika.

16 Ntheura kufuma sono kuya munthazi, tikumanya munthu kuyana na thupi yayi.+ Nangauli tamumanya Khristu kuyana na thupi, sono tikumumanyaso munthowa iyi yayi.+ 17 Ntheura usange munthu wali mu umoza na Khristu, ntchilengiwa chiphya.+ Vinthu vyakale vili kumara, ndipo pali vinthu viphya. 18 Kweni vinthu vyose vikufuma kwa Chiuta, uyo wakatiphemaniska ise kwa iyo kwizira mwa Khristu+ ndipo wakatipa uteŵeti wa kuphemaniska.+ 19 Uteŵeti wake ngwakuti, tipharazge kuti Chiuta wakaphemaniskanga charu kwa iyo kwizira mwa Khristu,+ kwambura kukumbuka kwananga kwawo,+ ndipo wali kutipa uthenga wa kuphemaniska.+

20 Ntheura ndise ŵakazembe+ mu malo gha Khristu,+ nga ni para Chiuta wakuŵeyelera kwizira mwa ise. Pakuŵa mu malo gha Khristu tikuŵeya kuti: “Phemanani na Chiuta.” 21 Uyo wakaŵa wambura kwananga,+ Chiuta wakamuzgora wakwananga* chifukwa cha ise, mwakuti tiŵe ŵarunji pamaso pa Chiuta kwizira mwa iyo.+

6 Pakugwira ntchito pamoza na iyo,+ tikumuŵeyaniso kuti muleke kuzomera lusungu lukuru lwa Chiuta na kuwinda chilato chake.+ 2 Pakuti wakati: “Mu nyengo yakuzomerezgeka nkhakupulika, ndipo mu zuŵa la chiponosko nkhakovwira.”+ Chomene sono ndiyo nyengo yakuzomerezgeka. Wonani, sono ni zuŵa la chiponosko.

3 Tikuchita chinthu chilichose yayi chakukhuŵazga mwakuti uteŵeti withu uleke kusangika na kafukwa.+ 4 Kweni munthowa yiliyose tikulongora kuti ndise ŵateŵeti ŵa Chiuta.+ Tikuzizipizga vinthu vinandi, masuzgo, ukavu, maunonono,+ 5 kutimbika, kuŵikika mu jele,+ vivulupi, kugwira ntchito zinonono, kutchezera usiku wose, na kukhala kwambura chakurya.+ 6 Tikulongora kuti ndise ŵateŵeti ŵa Chiuta chifukwa ndise ŵatuŵa, tikumanya vinthu, ndise ŵakuzikira,+ ndise ŵalusungu,+ tili na mzimu utuŵa, tili na chitemwa chambura upusikizgi,+ 7 tikuyowoya unenesko, tili na nkhongono ya Chiuta.+ Kweniso tili na vilwero vyaurunji+ ku woko lamalyero na lamazere, 8 tikuchindikika na kuyuyulika, ŵakutiyowoyera viheni na viwemi. Ŵanthu ŵakutiwona nga ndise ŵapusikizgi kweni tikuneneska, 9 nga mbambura kumanyikwa kweni ndise ŵakumanyikwa, nga mbakufwa* kweni tili ŵamoyo,+ nga mbakulangika kweni tikukomeka yayi,+ 10 nga mbachitima kweni tikukondwa nyengo zose, nga mbakavu kweni tikovwira ŵanandi kuŵa ŵasambazi, nga mbambura kanthu kweni tili na vinthu vyose.+

11 Tajura mulomo withu kuti tiyowoye na imwe,* Ŵakorinte, ndiposo tajura mtima withu. 12 Palije chakutijandizga kuti timutemwani,+ kweni imwe mukujandizgika kuti mulongore chitemwa kwa ise. 13 Ntheura nkhuyowoya namwe nga ŵana ŵane kuti namwe julani mitima yinu* nga umo ise tachitira kwa imwe.+

14 Mungakakikanga mu joko* pamoza na ŵambura kugomezga yayi.+ Pakuti urunji ukukolerana wuli na uchikanamalango?+ Panji ungweru ukukolerana wuli na chisi?+ 15 Kweniso pali kukolerana wuli pakati pa Khristu na Beliyali?*+ Panji kasi pali kukolerana wuli pakati pa munthu wakugomezga* na wambura kugomezga?+ 16 Kasi tempile la Chiuta likukolerana wuli na vikozgo?+ Pakuti ise tili tempile la Chiuta wamoyo,+ nga umo Chiuta wakayowoyera kuti: “Nizamukhala pakati pawo+ na kwenda pakati pawo, nizamuŵa Chiuta wawo, ndipo iwo ŵazamuŵa ŵanthu ŵane.”+ 17 “Yehova* wakuti: ‘Fumanipo pakati pawo, ndipo jipaturani kwa iwo, lekani kukhwaska chinthu chaukazuzi,+ ndipo nizamumupokelerani.’”+ 18 “Yehova* Wankhongonozose wakuti: ‘Nizamuŵa wiskemwe,+ ndipo imwe muzamuŵa ŵana ŵane ŵanalume na ŵanakazi.’”+

7 Ŵakutemweka, pakuti tili na malayizgo agha,+ tiyeni tijitozge ku ukazuzi wose wa thupi na wauzimu,+ mwakuti tilutilire kuŵa ŵatuŵa apo tikopa Chiuta.

2 Mutipe malo mu mitima yinu.+ Ise tindabudirepo munthu, tindanangirepo munthu, ndipo palije uyo tili kumulyerapo masuku pa mutu.+ 3 Nkhuyowoya nthena kuti nimususkani yayi. Pakuti nayowoya kale kuti muli mu mitima yithu, kwali tifwe kwali tiŵe ŵamoyo, tili namwe lumoza. 4 Nili na wanangwa ukuru wa kuyowoya kwa imwe. Nkhunotha chomene chifukwa cha imwe. Mtima wane wakhozgeka chomene. Nili na chimwemwe chikuru chomene mu visuzgo vithu vyose.+

5 Tikati tafika mu Makedoniya,+ thupi lithu likapumura yayi, kweni tikalutilira kusuzgika munthowa yiliyose, kuwaro kukaŵa mbembe, mukati mwithu mukaŵa wofi. 6 Kweni Chiuta uyo wakusanguluska ŵakusokwa,+ wakatisanguluska Tito wakati wiza. 7 Tikasanguluskika na kwiza kwake pera yayi kweniso nayo wakasanguluskika chifukwa cha imwe. Pakuti wakatiphalira kuti mukukhumba chomene kuniwona, mukaŵa na chitima chikuru, kweniso kuti mukanifipira mtima chomene. Ntheura nane nkhakondwa chomene.

8 Nangauli nkhamuchitiskani chitima na kalata yane,+ nkhudandawura yayi. Pakwamba nkhadandawura (nkhuwona kuti kalata yira yikamuchitiskani chitima, kweni nyengo yichoko waka), 9 sono nkhusekelera, chifukwa chakuti mukachita waka chitima yayi, kweni chifukwa chakuti mukachita chitima na kung’anamuka mtima. Mukachita chitima chakuyana na khumbo la Chiuta, mwakuti muleke kupwetekeka chifukwa cha ise. 10 Pakuti chitima chakukolerana na khumbo la Chiuta chikupangiska kuti munthu wang’anamuke mtima na kuponoskeka, ndipo munthu wakudandawura yayi.+ Kweni chitima cha charu chikubaba nyifwa. 11 Wonani, chitima icho chikukolerana na khumbo la Chiuta chamovwirani kuti muŵe na chitatata, kuti mujiphate ku mulandu, mukwenyelere, muŵe na wofi, muŵe na khumbo, muŵe na mwamphu na kunozga icho chabudika.+ Munthowa yiliyose mukajilongora kuti muli ŵatuŵa* pa nkhani iyi. 12 Nangauli nkhamulemberani, nkhachita nthena chifukwa cha uyo wakabuda yayi,+ nesi chifukwa cha uyo wakabudilika, kweni kuti chitatata chinu pakupulikira mazgu ghithu chiwoneke pakati pinu na pamaso pa Chiuta. 13 Lekani tasanguluskika.

Kweni padera pa chisangulusko chithu tikasekelera chomene chifukwa Tito wakaŵa na chimwemwe, pakuti mose mukasanguluska mtima wake. 14 Pakuti usange nkhanotha kwa iyo pakuyowoya za imwe, nindakhozgeke soni. Kweni vinthu vyose ivyo tikamuphalirani vikaŵa vyaunenesko, ntheura kunotha kwithu pamaso pa Tito kukaŵa kwaunenesko. 15 Kweniso wakumutemwani chomene, wakukumbuka kuti mose ndimwe ŵakupulikira,+ ndipo mukamupokelera na wofi na kutenthema. 16 Nkhusekelera kuti munthowa yiliyose nkhukhozgeka* chifukwa cha imwe.

8 Ŵabali, sono tikukhumba kuti mumanye kuti Chiuta walongora lusungu lwake lukuru ku mipingo ya mu Makedoniya.+ 2 Mu nyengo iyo ŵakaŵa mu chiyezgo chikuru na visuzgo, ŵakalongora chimwemwe chikuru kweniso ŵakalongora kuti ŵali na mtima wakupeleka, ndipo ŵakachita ivi nangauli ŵakaŵa ŵakavu chomene. 3 Pakuti nkhuŵachitira ukaboni kuti ŵakapeleka kuyana na ivyo ŵangafiska,+ ŵakapeleka vinandi kuluska ivyo iwo ŵakasanganga.+ 4 Mu khumbo lawo ŵakalutilira kutiŵeyelera chomene kuti ŵapeleke vyawanangwa kuti ŵawovwire ŵatuŵa.+ 5 Ndipo ŵakachita waka ivyo tikagomezganga yayi, kweni chakwamba ŵakajipeleka kwa Fumu na kwa ise kwizira mu khumbo la Chiuta. 6 Ntheura tikamukhozga Tito+ kuti wakwenera kumalizga kuwunjika vyawanangwa vinu pakuti ndiyo wakambiska mulimo uwu pakati pinu. 7 Mukuchita makora vinthu vyose. Muli na chipulikano chakukhora. Mukuyowoya mwaluso. Mukumanya vinthu vinandi. Mukuchita vinthu mwachitatata. Mukutemwa ŵanthu nga umo ise tikumutemwerani. Ntheura lutilirani kupeleka vyawanangwa na mtima wose.+

8 Nkhuyowoya ivi kuti nimuŵikirani dango yayi, kweni kuti mumanye chitatata icho ŵanyake ŵakulongora ndiposo kuti nimuyezgani usange chitemwa chinu ntchanadi. 9 Pakuti mukumanya lusungu lukuru lwa Fumu yithu Yesu Khristu, kuti nangauli wakaŵa musambazi wakazgoka mukavu chifukwa cha imwe,+ mwakuti imwe muzgoke ŵasambazi kwizira mu ukavu wake.

10 Pa nkhani iyi nkhupeleka maghanoghano ghane:+ Nkhani iyi njachandulo kwa imwe, pakuwona kuti muli kwambapo kale kuchita mulimo uwu chaka chamara kweniso mukalongora kuti mukukhumbisiska kuwuchita. 11 Ipo sono, fiskani ivyo mukamba kuchita mwakuti ivyo mukukhumba kuchita vifiskike. Ndipo muchite mwakuyana na ivyo muli navyo. 12 Chawanangwa icho munthu wakupeleka kufumira pasi pa mtima ndicho Chiuta wakukondwa nacho, chifukwa Chiuta wakukhumba kuti munthu wapelekenge ivyo wangafiska,+ ivyo wangatondeka kufiska yayi. 13 Chifukwa nkhukhumba yayi kuti chiŵe chipusu ku ŵanyake, kweni chinonono kwa imwe. 14 Kweni nkhukhumba kuti ivyo vyakhalapo kwa imwe visazgike pa kupeleŵera kwawo, mwakuti ivyo vyakhalapo kwa iwo visazgikeso pa kupeleŵera kwinu, mwakuti kuyana kuŵepo. 15 Nga umo kuli kulembekera, kuti: “Munthu uyo wakaŵa na vinandi wakaŵa na vinandi chomene yayi, ndipo uyo wakaŵa na vichoko, wakaŵa na vichoko chomene yayi.”+

16 Sono tikuwonga Chiuta chifukwa cha kuŵika mu mtima wa Tito+ chitatata chakuyana na icho tili nacho chifukwa cha imwe, 17 pakuti wachita nga umo tikamukhozgera. Kweniso nayo wakaŵa wakukhumbisiska chomene, ntheura wakwiza kwa imwe mu khumbo lake. 18 Kweni tikumutuma pamoza na mubali uyo walumbika na mipingo yose chifukwa cha makani ghawemi. 19 Ni apo pera yayi, kweniso wali kusoleka na mipingo kuti wendenge nase apo tikukapeleka chawanangwa ichi mwakuti Fumu yichindikike kweniso kuti tilongore kuti tili na mtima wakukhumba kovwira. 20 Ntheura tikukhumba yayi kuti munthu munyake watisange kafukwa chifukwa cha chawanangwa ichi, icho tamupeleka ku ŵatuŵa.+ 21 Chifukwa ‘tikuchita chilichose mwakugomezgeka, pamaso pa Yehova* pera yayi, kweniso pamaso pa ŵanthu.’+

22 Ndiposo, pamoza na iwo tikutuma mubali withu uyo tamuyezga mu vinandi ndipo tamusanga kuti ngwakukhumbisiska kuchita milimo yinandi, kweni sono ngwakukhumbisiska chomene chifukwa chakuti wakumugomezgani chomene. 23 Kweni usange pali fumbo lililose pakuyowoya vya Tito, iyo ni munyane na wantchito munyane uyo tikuteŵetera lumoza kuti timovwirani. Panji para muli na mafumbo pakuyowoya vya ŵabali ŵithu, iwo mbapositole ŵa mipingo na uchindami wa Khristu. 24 Ntheura muŵalongore chitemwa chinu+ kweniso mulongore mipingo chifukwa icho tikunothera namwe.

9 Sono pakuyowoya vya uteŵeti wakovwira ŵatuŵa,+ ntchakukhumbikwa yayi kuti nichite kumulemberani. 2 Pakuti nkhumanya mtima winu wakovwira uwo muli nawo uwo ukunipangiska kunotha ku Ŵamakedoniya. Ŵabali ŵa ku Akaya ŵanozgeka kovwira kwa chaka sono, ndipo mwamphu winu wakhukiska ŵanandi ŵa iwo. 3 Kweni nkhutuma ŵabali, kuti kunotha kwithu chifukwa cha imwe kuleke kuŵa kwawaka pa nkhani iyi, kweni kuti muŵe ŵakunozgeka nadi, nga umo nkhayowoyera kuti muŵenge ŵakunozgeka. 4 Usange ningiza na Ŵamakedoniya na kusanga kuti mundanozgeke, ise na imwe wuwo tingakhozgeka soni chifukwa tikamugomezgani. 5 Ntheura nkhaghanaghana kuti ntchakwenelera kukhuŵilizga ŵabali kuti ŵadangireko kwa imwe na kuzakatora chawanangwa chinu icho mukalayizga. Para tikwiza muŵe kuti mwanozgerathu, apa vizamulongora kuti mwapeleka mwakuchichizgika yayi, kweni mwapeleka na mtima wose.

6 Kweni manyani kuti uyo wakuseŵa pachoko wazamuvunaso pachoko, ndipo uyo wakuseŵa pakuru wazamuvunaso pakuru.+ 7 Waliyose wachite umo wadumulira mu mtima wake, mwakukwenyelera* yayi panji mwakuchichizgika,+ chifukwa Chiuta wakutemwa uyo wakupeleka mwakukondwa.+

8 Kweniso, Chiuta wakumanya kuzgora lusungu lwake lose kuŵa lukuru kwa imwe, kuti nyengo zose muŵe na vyakukwana mu chilichose, muŵe na vinandi vyakuchitira mulimo uliwose uwemi.+ 9 (Nga umo kuli kulembekera kuti: “Wagaŵizga mwawanangwa, wapeleka ku ŵakavu. Urunji wake ukukhalilira muyirayira.”+ 10 Sono uyo wakupeleka mbuto zinandi kwa wakuseŵa na chingwa kuti ŵanthu ŵarye, wazamumupani na kwandaniska mbuto kuti museŵe ndipo wazamusazgirako vipambi vya urunji winu.) 11 Mu chilichose mukusambazgika kuti mupelekenge mwawanangwa, ndipo ŵanthu ŵawongenge Chiuta chifukwa cha chawanangwa chinu icho tamupeleka ku ŵanyake. 12 Chifukwa mulimo uwu ngwa kupeleka waka ivyo vikukhumbikwa ku ŵatuŵa yayi,+ kweni kuti ŵanthu ŵanandi ŵawonge Chiuta. 13 Ŵanthu ŵakuchindika Chiuta, chifukwa wovwiri uwo mukapeleka ukalongora kuti mukujilambika ku makani ghawemi gha Khristu agho mukupharazga.+ 14 Ŵakumuŵeyelerani kwa Chiuta ndipo ŵakumutemwani chomene chifukwa cha lusungu lukuru lwa Chiuta ulo luli pa imwe.

15 Tikuwonga Chiuta chifukwa cha chawanangwa chake chambura mayowoyeko.

10 Sono ine Paulosi, nkhumuŵeyani na kuzika na lusungu lwa Khristu,+ nangauli nili wakuyuyuka para nili pakati pinu,+ kweni nili wachikanga para nili kutali namwe.+ 2 Nkhulomba kuti para niza kwa imwe nizakaleke kukhwima mtima na kuchitapo kanthu mwachikanga pakususkana na awo ŵakutiwona nga tikwenda mwakuyana na makhumbiro ghacharu. 3 Nangauli tikuchita vinthu nga mbanthu wose kweni tikurwa nkhondo mwakuyana na umo charu chikughanaghanira yayi. 4 Chifukwa vilwero vya nkhondo yithu ni vya charu yayi,+ kweni ni vyakufuma kwa Chiuta,+ ni vyankhongono ndipo vikugadabura vinthu vyakukhora chomene. 5 Pakuti tikugadabura maghanoghano na chinthu chilichose icho chikutondeska ŵanthu kumanya Chiuta,+ ndipo tikuthereska maghanoghano gha mtundu uliwose na kughazgora kuti ghapulikire Khristu. 6 Para mwalongora waka kuti mukupulikira mu vyose, ndise ŵakunozgeka kupeleka chilango kwa munthu waliyose uyo wakuleka kupulikira.+

7 Mukuwona vinthu kuyana na kawonekero kake kakuwaro. Usange munyake wakujigomezga kuti ngwa Khristu, wamanyeso fundo iyi yakuti: Umo iyo waliri wa Khristu, nase ndimo tiliri. 8 Pakuti Fumu yili kutipa mazaza kuti timuzengani, kumuwiskirani pasi yayi,+ ntheura nanga ninganotha mwakujumphizga, ningakhozgeka soni yayi. 9 Mungaghanaghananga kuti nkhukhumba waka kumofyani na makalata ghane yayi. 10 Chifukwa iwo ŵakuti: “Makalata ghake ngazito na ghankhongono, kweni para wali pakati pithu wakuwoneka wakulopwa ndipo kayowoyero kake nkhambura fundo.” 11 Munthu wanthena wamanye kuti, ivyo tikuyowoya mu makalata para kulije, ndivyo tizamuchita para tili pakati pinu.+ 12 Pakuti tikukhumba yayi kujiwona nga umo ŵanthu ŵanyake ŵakujiwonera panji kujiyaniska na awo ŵakujilumba ŵekha.+ Kweni para ŵakujipima ŵekha kuyana na kawonero kawo na kujiyaniska ŵekha kuyana na kawonero kawo, ŵakulongora kuti ŵakupulikiska chilichose yayi.+

13 Kweni ise tinothenge m’paka kujumpha mphaka izo tili kupika yayi, kweni tikhalenge mu chigaŵa icho Chiuta wali kutipa,* icho chikufika m’paka kwa imwe.+ 14 Tikujumpha mphaka yayi nga ni para ise tindafikeko kwa imwe, pakuti tikaŵa ŵakwamba kwiza kwa imwe na makani ghawemi ghakuyowoya vya Khristu.+ 15 Tikunotha kujumpha mphaka izo tili kupika yayi. Tikunotha na milimo ya munthu munyake yayi, kweni tikugomezga kuti apo chipulikano chinu chikukura, milimo iyo tachita mu chigaŵa chithu yisazgikirenge. Kufuma apo tilutilirenge kuchita vyakusazgikira, 16 mwakuti tipharazge makani ghawemi ku vyaru vinyake kujumpha kwinu uko, mwakuti tileke kunotha mu chigaŵa cha munthu munyake uko mulimo uwu uli kufika kale. 17 “Kweni uyo wakunotha, wanothe mwa Yehova.”*+ 18 Pakuti uyo wakujilumba yekha ngwakuzomerezgeka yayi,+ kweni uyo Yehova* wakumulumba ndiyo.+

11 Nakhumbanga kuti munizizipizgire pa uzeleza wane uchoko waka. Nakuti mukunizizipizgira kale. 2 Pakuti nkhumuchitirani sanji nga ni sanji ya Chiuta, chifukwa ine nkhamulayizgani nthengwa kwa mwanalume yumoza kuti nimupelekani kwa Khristu nga ni mwali mutuŵa.+ 3 Kweni nkhopa kuti panyake nga umo njoka yikapusikira Eva na uchenjezi wake,+ maghanoghano ghinu ghanganangika na kufumako ku unenesko na utuŵa ivyo vikwenelera Khristu.+ 4 Usange munthu wakwiza kwa imwe na kupharazga Yesu munyake padera pa uyo ise tikapharazga, panji usange mzimu unyake ukumulongozgani padera pa uwo mukapokera, panji munthu wiza na makani ghawemi padera pa agho mukazomera,+ imwe mukumuzizipizgira kwambura suzgo. 5 Chifukwa nkhuwona kuti palije icho nkhupeleŵera ku ŵapositole ŵinu ŵapachanya.+ 6 Kweni nanga ningaŵa mulemwa mu kayowoyero,+ kweni nkhumanya vinthu vinandi. Munthowa yiliyose tikamulongorani makora kuti tikumanya vinthu.

7 Panji kasi nkhananga kujiyuyura kuti imwe mukwezgeke, chifukwa chakuti nkhamupharazgirani makani ghawemi gha Chiuta mwakukondwa kwambura kulipiliska?+ 8 Nkhazomera kupoka wovwiri ku mipingo yinyake mwakuti nimuteŵeterani.+ 9 Apo nkhaŵa na imwe pa nyengo ya kusoŵerwa kwane nkhapeleka mphingo kwa munthu yayi, pakuti ŵabali awo ŵakiza kufuma ku Makedoniya ŵakanovwira.+ Munthowa yiliyose nkhapeleka mphingo yayi kwa imwe ndipo nilutilirenge kuchita nthena.+ 10 Umo unenesko wa Khristu uliri mwa ine, nilekenge yayi kunotha+ mu vigaŵa vya Akaya. 11 Chifukwa wuli nkhuchita nthena? Kasi ntchifukwa chakuti nkhumutemwani yayi? Chiuta wakumanya kuti nkhumutemwani.

12 Kweni nilutilirenge kuchita icho nkhuchita,+ mwakuti niwuskepo icho awo ŵakukhumba kuyana na ise ŵakupusikizgira, awo ŵakunotha na mulimo* wawo. 13 Pakuti ŵanthu ŵanthena mbapositole ŵatesi, ŵantchito ŵaryarya, ŵakujizgora ŵekha nga mbapositole ŵa Khristu.+ 14 Ndipo ntchakuzizika yayi, chifukwa Satana nayo wakujizgora nga ni mungelo wa ungweru.+ 15 Ntheura ntchakuzizika yayi usange ŵateŵeti ŵake nawo ŵakujizgora nga mbateŵeti ŵaurunji. Kweni umaliro wawo uzamuŵa wakuyana na milimo yawo.+

16 Nkhuyowoyaso kuti: Paŵavye munthu waghanaghane kuti nili muzeleza. Kweni usange ndimo mukughanaghanira, nanga ningaŵa nga ni munthu muzeleza, munizomerezge kuti nane ninothepo pachoko waka. 17 Icho nkhuyowoya, nkhuyowoya pakutolera chiyelezgero cha Fumu yayi, kweni nkhujigomezga nga umo munthu muzeleza wakunothera mwakujumphizga. 18 Pakuti ŵanandi ŵakunotha mwakuyana na charu,* ipo nane ninothenge. 19 Chifukwa mukuzizipizgira mwakukondwa ŵanthu ŵazeleza, pakuwona kuti imwe muli ŵakupulikiska. 20 Mukuzizipizgira waliyose uyo wakumuzgorani ŵazga, waliyose uyo wakumilimitizga ivyo muli navyo, waliyose uyo wakuphanga ivyo muli navyo, waliyose uyo wakujikwezga pa imwe, na waliyose uyo wakumupamanthani ku maso.

21 Ntchakukhozga soni kwa ise kuyowoya ichi, nga ni para tilije nkhongono.

Nkhuyowoya mwauzeleza, kweni usange ŵanyake ŵakuchita chikanga, nane nkhuchita chikanga. 22 Kasi iwo Mbahebere? Ndimo nane niliri.+ Kasi iwo Mbaisrayeli? Na ine wuwo. Kasi iwo ni mphapu* ya Abrahamu? Ndimo niliri.+ 23 Kasi iwo mbateŵeti ŵa Khristu? Nkhuzgora nga ni munthu wakufuntha kuti ine nkhuŵaluska: Nachita milimo yinandi,+ nakakikapo kanandi waka,+ natimbikapo kanandi waka, ndiposo kanandi nkhaŵa pafupi kufwa.+ 24 Kankhondi, Ŵayuda ŵakanithyapura vikoti 39.+ 25 Katatu nkhadupulika na zindodo,+ kamoza nkhadinyika na malibwe,+ katatu ngalaŵa yikanibwangasukira,+ usiku umoza na muhanya nkhaŵa pa nyanja. 26 Pa maulendo ghane ghanandi, nkhaŵa mu ulwani wa milonga, ulwani wa vigeŵenga, ulwani wakufuma ku ŵanthu ŵakwithu,+ ulwani wakufuma ku ŵanthu ŵamitundu,+ ulwani wa mu msumba,+ ulwani wa mu mapopa, ulwani wa mu nyanja, ulwani pakati pa ŵabali ŵatesi, 27 mu mulimo unonono na wakuvuska, mu kutchezera usiku wose kanandi,+ mu njara na nyota,+ mu kusoŵa chakurya nyengo zinandi,+ mu kupima na mphepo ndiposo na kusoŵa vyakuvwara.*

28 Padera pa vinthu vyakuwaro ivi, kwenjelwera mipingo yose, ndipo ichi chikunisuzga maghanoghano* zuŵa na zuŵa.+ 29 Ni njani wakulopwa, ndipo ine nindalopwe? Ni njani wakhuŵazgika, ndipo ine nindaphye mtima?

30 Usange nkhwenera kunotha, ine ninothenge na vinthu ivyo vikulongora kuti ndine wakulopwa. 31 Chiuta na Wiske wa Fumu Yesu, Uyo wakwenera kulumbika muyirayira, wakumanya kuti nkhuteta yayi. 32 Mu Damaseko, kazembe uyo wali pasi pa themba Areta wakalindanga msumba wa Ŵadamaseko kuti wanikore. 33 Kweni nkhakhizgikira pasi mu chitete kufumira pa windo la linga,+ ndipo nkhapona mu mawoko ghake.

12 Nkhwenera kunotha. Nangauli nkhumanya kuti kunotha kulije chandulo, kweni niyowoyenge mboniwoni+ na ivyo Fumu yanivumbulira.+ 2 Nkhumanya munthu munyake uyo wakaŵa mu umoza na Khristu vyaka 14 ivyo vyajumpha, wakatolekera ku machanya ghachitatu. Apo wakatolekanga kwali wakaŵa mu thupi nkhumanya yayi, kwali wakaŵa kuwaro kwa thupi nkhumanya yayi. Chiuta ndiyo wakumanya. 3 Nkhumumanya munthu uyu. Kweni kuti wakaŵa mu thupi panji kuwaro kwa thupi, nkhumanya yayi. Chiuta ndiyo wakumanya. 4 Wakatolekera ku paradiso ndipo wakapulika mazgu agho ghangayowoyeka yayi, ndipo munthu wakuzomerezgeka yayi kughayowoya. 5 Ninothenge chifukwa cha munthu uyu, kweni ninothenge chifukwa cha namwene yayi kupatulako mu kulopwa kwane. 6 Pakuti usange ningakhumba kunotha, niŵenge muzeleza yayi, chifukwa niyowoyenge unenesko. Kweni nkhujikanizga, mwakuti paŵavye munthu wanilumbe chomene kuluska ivyo wakuwona mwa ine panji ivyo wakupulika kwa ine, 7 chifukwa cha vinthu vinandi ivyo Chiuta wanivumbulira.

Kuti nileke kujikwezga mwakujumphizga, nkhapika munga mu thupi,+ mungelo wa Satana, kuti wanitimbenge,* mwakuti nileke kukwezgeka mwakujumphizga. 8 Nkhaŵeya Fumu katatu kuti munga ufumeko kwa ine. 9 Kweni wakati kwa ine: “Lusungu lwane lukuru ulo nakulongora ndakukwana, pakuti para iwe walopwa ndipo nkhongono zane zikuŵa zakufikapo.”+ Ntheura, mwakukondwa chomene, ninothenge mu kulopwa kwane, mwakuti nkhongono za Khristu zikhalilire pa ine nga ni hema. 10 Ntheura nkhukondwa para nkhuŵa wakulopwa, ŵanyake ŵakunichitira msinjiro, nkhusoŵa pakukora, nkhutambuzgika na kusangana na maunonono chifukwa cha Khristu. Pakuti para nili wakulopwa, apo ndipo nkhuŵa wankhongono.+

11 Nazgoka muzeleza. Mukanichichizga ndimwe, pakuti nkhenera kulumbika na imwe. Pakuti munthowa yiliyose nkhaŵa wapasi yayi ku ŵapositole ŵinu ŵapachanya, nangauli nili kanthu yayi.+ 12 Imwe mukawona vimanyikwiro vyakuti ndine mpositole, mukawona umo nkhazizipizgira,+ ndiposo mukawona vimanyikwiro na minthondwe* na milimo yankhongono.+ 13 Chifukwa ni mpha apo imwe mukapambanapo na mipingo yinyake yose, padera pa fundo yakuti ine nkhaŵa mphingo yayi kwa imwe?+ Munigowokere na mtima wose kwananga uku.

14 Wonani, aka nkhachitatu nili wakunozgeka kwiza kwa imwe, kweni nizamuŵa mphingo yayi. Pakuti nkhupenja ivyo muli navyo yayi,+ kweni imwe. Chifukwa ŵana+ ŵakwenera kusungira ŵapapi ŵawo yayi, kweni ŵapapi ndiwo ŵakwenera kusungira ŵana ŵawo. 15 Ndipo ine nili wakunozgeka kutaya vyane vyose na kujipeleka nkhanira chifukwa cha umoyo winu.+ Usange nkhumutemwani chomene, kasi ine nkhwenera kutemweka pachoko? 16 Kweni nanga viŵe nthena, nkhamuphyorani yayi.+ Kweni imwe mukuti, nkhaŵa “muryarya,” ndipo nkhamukorani “na uchenjezi.” 17 Kasi nkhasangirapo mwaŵi pa imwe kwizira mwa waliyose uyo nkhamutumirani? 18 Nkhachiska Tito kuti wize kwa imwe pamoza na mubali yumoza. Kasi Tito wakasangirapo mwaŵi pa imwe?+ Asi tikenda mu mzimu wakuyana? Asi tikenda mu mendero ghakuyana?

19 Kasi nyengo yose iyi mwaghanaghananga kuti tajivikiliranga kwa imwe? Tikuyowoya panthazi pa Chiuta pakuŵa ŵa Khristu. Kweni ŵakutemweka, tikuchita vinthu vyose kuti imwe muzengeke. 20 Pakuti nkhopa kuti para niza, ningazakamusangani umo nkhukhumbira yayi, ndipo ine ningazakaŵa umo mukukhumbira yayi. M’malo mwake, panji pangazakaŵa zawe, sanji, maukali, mphindano, kusesa, mphwepwerezga, kujitukumura, na mautimbanizgi. 21 Panyake para nizaso, Chiuta wane wangazakanikhizga pakati pinu, ndipo ningazakatengera chifukwa cha ŵanandi awo ŵakananga, kweni ŵandang’amuke mtima kuti ŵaleke maukazuzi ghawo na uzaghali* na ukwakwa* ivyo ŵakuchita.

13 Aka nkhachitatu kwiza kwa imwe. “Nkhani yiliyose yikhozgeke na mulomo wa ŵakaboni ŵaŵiri panji ŵatatu.”+ 2 Nangauli nili kutali na imwe, kweni muniwone nga ni para nili namwe kachiŵiri, ndipo nkhuchenjezgerathu awo ŵakananga pakwamba na ŵanyake wose, kuti usange ningizaso nizamuŵalekelera yayi. 3 Pakuti mukupenja ukaboni wakuti Khristu wakuyowoya kwizira mwa ine, Khristu uyo ngwakulopwa yayi kwa imwe kweni ngwankhongono pakati pinu. 4 Pakuti mbunenesko nadi kuti wakapayikika pa khuni chifukwa cha kulopwa, kweni ngwamoyo chifukwa cha nkhongono za Chiuta.+ Kweniso mbunenesko kuti tili ŵakulopwa pamoza na iyo,+ kweni tizamuŵa ŵamoyo pamoza na iyo chifukwa cha nkhongono ya Chiuta iyo yili pa imwe.+

5 Lutilirani kupima usange muli mu chipulikano, lutilirani kuyezga umo imwe muliri.+ Panji kasi mukumanya yayi kuti muli mu umoza na Yesu Khristu? Mukwenera kumanya, pekha usange muli ŵakukanika. 6 Nkhugomezga nadi kuti mumanyenge kuti ise tili ŵakukanika yayi.

7 Sono tikulomba Chiuta kuti muleke kwananga, chifukwa chakuti ise tiwoneke ŵakuzomerezgeka yayi, kweni kuti imwe muchitenge icho ntchiwemi, nangauli ise tingawoneka ŵakukanika. 8 Pakuti palije icho tingachita kususkana na unenesko, kweni chekha icho chikukolerana na unenesko. 9 Tikusekelera nadi para tili ŵakulopwa kweni imwe muli ŵankhongono. Ndipo ichi ndicho tikulomba kuti musinthe. 10 Lekani nkhulemba vinthu ivi apo nili kutali na imwe, mwakuti para nazakaŵa namwe, nizakaleke kuchita mwankhongono mwakuyana na mazaza agho Fumu yili kunipa.+ Nkhukhumba kuzakazenga, kupankhura yayi.

11 Paumaliro ŵabali, lutilirani kusekelera, kusintha maghanoghano, kusanguluskika,+ kuŵa na maghanoghano ghakuyana,+ kukhala mwamtende,+ ndipo Chiuta wa chitemwa na wa mtende+ waŵenge namwe. 12 Tawuzganani na mufyofyontho utuŵa. 13 Ŵatuŵa wose ŵakumutawuzgani.

14 Lusungu lukuru lwa Fumu Yesu Khristu, na chitemwa cha Chiuta ndiposo mzimu utuŵa uwo ukumovwirani viŵe na imwe mose.