KU ŴAGALATIYA

1 Ine Paulosi, mpositole, kufuma ku ŵanthu yayi, nesi kwizira mwa munthu, kweni kwizira mwa Yesu Khristu+ na Chiuta Adada,+ uyo wakamuwuska ku ŵakufwa, 2 na ŵabali wose awo ŵali nane, ku mipingo ya mu Galatiya:

3 Mphanyi lusungu lukuru na mtende vyakufuma kwa Chiuta Adada ŵithu na Fumu Yesu Khristu, vyaŵa namwe. 4 Wakajipeleka yekha chifukwa cha zakwananga zithu+ kuti watiwombore ku nyengo iyi* yiheni+ mwakuyana na khumbo la Chiuta withu na Dada.+ 5 Kwa Chiuta kuŵe uchindami muyirayira swii. Ameni.

6 Nkhuzizwa kuti mwapatukako* luŵiro chomene kwa Uyo wakamuchemani na lusungu lukuru lwa Khristu, ndipo mukupulikizga makani ghawemi gha mtundu unyake.+ 7 Palije makani ghawemi ghanyake, kweni kuti waka pali ŵanyake awo ŵakumutimbanizgani+ ndipo ŵakukhumba kutimbanizga makani ghawemi gha Khristu. 8 Kweni usange yumoza wa ise panji mungelo wakuchanya, uyo wangamupharazgirani makani ghawemi agho ghakupambana na makani ghawemi agho tikamupharazgirani, watembeke. 9 Nga umo tayowoyera kale, ine nkhuwerezgapo kuti, Waliyose uyo wangamupharazgirani makani ghawemi agho ghakupambana na makani ghawemi agho mukapokera, watembeke.

10 Kasi sono nkhukhumba kunyengelera ŵanthu panji Chiuta? Panji, kasi nkhupenja kukondweska ŵanthu? Niŵenge kuti nichali kukondweska ŵanthu, mphanyi nili muzga wa Khristu yayi. 11 Pakuti nkhukhumba kuti mumanye ŵabali, kuti makani ghawemi agho nkhamupharazgirani ghakafuma ku ŵanthu yayi.+ 12 Pakuti nkhaghapokera kwa munthu yayi, nesi kuchita kusambizgika, kweni Yesu Khristu ndiyo wakaghavumbura kwa ine.

13 Mukapulika ivyo nkhachitanga kale apo nkhaŵa mu chisopa cha Chiyuda,+ kuti nkhatambuzganga chomene mpingo wa Chiuta na kuwuparanya.+ 14 Ndipo nkhachitanga makora chomene mu chisopa cha Chiyuda kuluska ŵanandi ŵa nthanga yane mu mtundu wane, pakuti nkhajipelekanga chomene kulondezga malango gha ŵasekuru ŵane.+ 15 Kweni apo Chiuta uyo wakanifumiska mu nthumbo ya amama na kunichema kwizira mu lusungu lwake lukuru,+ wakachiwona kuŵa chiwemi 16 kuvumbura Mwana wake kwizira mwa ine, mwakuti nipharazge makani ghawemi ghakuyowoya vya iyo ku mitundu,+ kuti nkhakumana na munthu* waliyose nyengo yeneyiyo yayi. 17 Nkhakwelera ku Yerusalemu yayi, kwa awo ŵakamba kuŵa ŵapositole pambere ine nindaŵe mpositole. Kweni nkhaluta ku Arebiya, ndipo nkhaweleraso ku Damaseko.+

18 Ndipo pakati pajumpha vyaka vitatu, nkhakwelera ku Yerusalemu+ kukawona Kefase,*+ ndipo nkhakhala nayo mazuŵa 15. 19 Nkhawonaso mpositole munyake yayi padera pa Yakobe+ munung’una wa Fumu. 20 Sono pa vinthu ivyo nkhumulemberani, nkhumusimikizgirani pamaso pa Chiuta kuti nkhuteta yayi.

21 Kufuma apo, nkhaluta ku vigaŵa vya Siriya na Kilikiya.+ 22 Kweni nkhamanyikwanga yayi ku mipingo ya mu Yudeya iyo yikaŵa mu umoza na Khristu. 23 Ŵakapulikanga waka kuti: “Munthu yura kale wakatitambuzganga,+ sono wakupharazga makani ghawemi ghakuyowoya vya chipulikano icho pakwamba wakachiparanyanga.”+ 24 Ntheura ŵakamba kuchindika Chiuta chifukwa cha ine.

2 Ndipo pakati pajumpha vyaka 14 nkhakweleraso ku Yerusalemu pamoza na Baranaba,+ nkhatoraso Tito.+ 2 Nkhakwelera kura chifukwa cha ivyo Chiuta wakanivumbulira, ndipo nkhaŵalongosolera makani ghawemi agho nkhupharazga pakati pa mitundu. Nkhaŵalongosolera kumphepete, panthazi pa ŵanalume awo ŵakaŵa ŵakuchindikika, mwakuti niwone usange nkhachimbiranga mwakwenelera, panji usange nkhachimbira pawaka. 3 Ndipo nanga ni Tito,+ uyo wakaŵa nane, wakachichizgika yayi kukotoleka,+ nangauli wakaŵa Mugiriki. 4 Kweni nkhani iyi yikawuka chifukwa cha ŵabali ŵatesi awo ŵakanjira pakati pithu mwachibisibisi.+ Ŵakanjira kuti ŵanange wanangwa withu+ uwo tili nawo mu umoza na Khristu Yesu, mwakuti ŵatizgore ŵazga.+ 5 Kweni nanga ni ora limoza pera, tikathera yayi nesi kujilambika kwa iwo,+ mwakuti unenesko wa makani ghawemi ukhalilire mwa imwe.

6 Kweni awo ŵakawonekanga kuŵa ŵakuzirwa,+ manyi pakwamba ŵakaŵa ŵanthu ŵa mtundu uli, vilije kanthu kwa ine, chifukwa Chiuta wakulumba chisko yayi, nakuti palije kanthu kaphya ako ŵanalume ŵakumanyikwa aŵa ŵali kunisambizgapo. 7 M’malo mwake, ŵakati ŵawona kuti napika mulimo wa kupharazga makani ghawemi ku ŵanthu ŵambura kukotoleka,+ nga umo Petrosi nayo wakatumikira ku ŵakukotoleka—. 8 Pakuti uyo wakamupa Petrosi nkhongono za upositole ku awo mbakukotoleka, ndiyo wakanipa nkhongono za upositole ku awo mbamitundu.+ 9 Yakobe,+ Kefase* na Yohane, awo ŵakamanyikwanga kuŵa mizati, ŵakati ŵamanya lusungu lukuru ulo lukalongoreka kwa ine,+ ŵakatikora chasa ku woko lamalyero ine na Baranaba,+ kulongora kuti ŵazomerezga kuti titeŵeterenge lumoza. Ŵakachita nthena kuti ise tilute ku ŵamitundu, kweni iwo ku awo mbakukotoleka. 10 Kweni ŵakatipempha waka kuti tikumbukenge ŵakavu. Ndipo icho ndicho nayezgayezga kuchita na mtima wose.+

11 Kweni apo Kefase*+ wakiza ku Antiyoke,+ nkhamususka maso na maso, pakuti wakaŵa wakubuda. 12 Chifukwa pambere ŵandize ŵanalume ŵanyake kufuma kwa Yakobe,+ iyo wakaryanga na ŵanthu ŵamitundu.+ Kweni ŵakati ŵiza, wakamba kukhwecha na kujipatura, chifukwa cha kopa ŵakukotoleka.+ 13 Ŵayuda ŵanyake nawo ŵakakolerana nayo mu kupusikizga uku, mwakuti Baranaba nayo wakayegheka na upusikizgi wawo. 14 Kweni nkhati nawona kuti ŵakendanga mwakukolerana na unenesko wa makani ghawemi yayi,+ nkhati kwa Kefase* panthazi pa wose: “Usange iwe, nangauli ndiwe Muyuda, ukukhala nga mbamitundu, nga Mbayuda yayi, chifukwa wuli ukuchichizga ŵanthu ŵamitundu kuti ŵakhalenge mwakuyana na dango la Ŵayuda?”+

15 Ise tili Ŵayuda, ndise ŵakwananga nga mbamitundu yayi, 16 ndipo tikumanya kuti munthu wakupimika murunji na milimo ya dango yayi, kweni pekha para wali na chipulikano+ mwa Yesu Khristu.+ Ntheura tili na chipulikano mwa Khristu Yesu, mwakuti tipimike ŵarunji na chipulikano mwa Khristu, kuti na milimo ya dango yayi, pakuti palije munthu uyo wapimikenge murunji chifukwa cha milimo ya dango.+ 17 Sono usange tasangikaso ŵakwananga apo tikukhumba kupimika ŵarunji kwizira mwa Khristu, kasi ndikuti Khristu ni muteŵeti wa kwananga? Yayi! 18 Usange vinthu ivyo nkhawiskira pasi nkhuvizengaso, nkhulongora kuti nili wakuswa dango. 19 Pakuti kwizira mu dango nkhafwa ku dango,+ kuti niŵe wamoyo kwa Chiuta. 20 Nakhomeka pa khuni pamoza na Khristu.+ Ndineso yayi nili wamoyo,+ kweni ni Khristu uyo wakukhala mu umoza na ine. Umoyo uwo nkhukhala sono, nkhukhalira chipulikano icho chili mwa Mwana wa Chiuta,+ uyo wakanitemwa ndipo wakajipeleka chifukwa cha ine.+ 21 Nkhukana* lusungu lukuru lwa Chiuta yayi.+ Pakuti usange urunji ukwizira mu dango, ipo Khristu wakafwa pawaka.+

3 Ŵagalatiya ŵakupusa imwe! Ni njani wakamulowani,+ imwe mukalongoreka makora umo Yesu Khristu wakakhomekera pa khuni?+ 2 Pali chinthu chimoza icho nkhukhumba kumanya kwa imwe: Kasi mukapokera mzimu chifukwa cha milimo ya dango panji chifukwa cha kuŵa na chipulikano mu ivyo mukapulika?+ 3 Kasi muli ŵakupusa nthena? Mukamba na milimo yauzimu,* kasi sono mukukhumba kumalizga na milimo yathupi?*+ 4 Kasi mukajumpha mu visuzgo vinandi pawaka? Nkhugomezga yayi kuti pakaŵa pawaka. 5 Ntheura kasi uyo wakumupani mzimu na kuchita milimo yankhongono+ pakati pinu, wakuchita ivi chifukwa chakuti mukulondezga dango panji chifukwa chakuti muli na chipulikano mu ivyo mukapulika? 6 Nga ni Abrahamu uyo “wakapulikana mwa Yehova,* ndipo Chiuta wakamupima kuti ni murunji.”+

7 Mukumanya kuti awo ŵakudemelera ku chipulikano ndiwo mbana ŵa Abrahamu.+ 8 Malemba ghakawonerathu kuti Chiuta wazamupima ŵanthu ŵamitundu kuŵa ŵarunji chifukwa cha chipulikano, ghakapharazgirathu makani ghawemi kwa Abrahamu, kuti: “Mitundu yose yizamutumbikika kwizira mwa iwe.”+ 9 Ntheura, awo ŵakudemelera ku chipulikano ŵakutumbikika nga ni Abrahamu, munthu uyo wakaŵa na chipulikano.+

10 Chifukwa wose awo ŵakuthemba pa milimo ya dango ŵali pasi pa nthembo, pakuti kuli kulembeka kuti: “Ngwakutembeka waliyose uyo wakuleka kusunga na kuchita vyose ivyo vili kulembeka mu mupukutu wa Dango.”+ 11 Kweniso, fundo yakuti na dango palije munthu wakupimika murunji na Chiuta+ yikuwoneka makora, pakuti “murunji waŵenge wamoyo chifukwa cha chipulikano.”+ 12 Sono Dango likuthemba chipulikano yayi, kweni “waliyose uyo wakuchita vinthu ivi waŵenge wamoyo pakuvisunga.”+ 13 Khristu wali kutigura,+ na kutifwatura+ ku nthembo ya Dango apo iyo wakazgoka nthembo m’malo mwa ise, chifukwa kuli kulembeka kuti: “Ngwakutembeka munthu waliyose uyo wapayikika pa khuni.”+ 14 Ichi chikaŵa nthena kuti thumbiko la Abrahamu lize ku mitundu kwizira mwa Yesu Khristu,+ mwakuti tipokere mzimu wakulayizgika+ kwizira mu chipulikano chithu.

15 Ŵabali, nipeleke chiyelezgero cha ivyo ŵanthu ŵakuchita: Para phangano lakhozgeka, nanga lingaŵa la munthu, palije uyo wakulimazga panji kusazgirako kanthu kanyake. 16 Sono malayizgo ghakayowoyeka kwa Abrahamu na mphapu* yake.+ Lemba lindayowoyepo kuti, “ku mphapu* zako,” nga ni para ni zinandi. Kweni likuti, “ku mphapu* yako,” kung’anamura yimoza, uyo ni Khristu.+ 17 Kweniso nkhuyowoya kuti: Dango ilo likiza pakati pajumpha vyaka 430+ kufuma apo phangano likachitikira, lingasukuluska yayi phangano ilo likakhozgeka kale na Chiuta, panji kumazga layizgo. 18 Pakuti usange chiharo chikwizira mu dango, ipo chikwiziraso mu layizgo yayi. Kweni Chiuta wachita lusungu ndipo wachipeleka kwa Abrahamu kwizira mu layizgo.+

19 Kasi Dango likaŵa la ntchito wuli? Likasazgikako kuti kwananga kuwonekere,+ m’paka mphapu* iyo yikapika layizgo yize.+ Ndipo likapelekeka kwizira mu ŵangelo+ kwendera mu woko la muphemaniski.+ 20 Pakuŵavya muphemaniski usange phangano likukhwaska munthu yumoza pera, kweni Chiuta wakachita yekha phangano. 21 Ntheura, kasi Dango likususkana na malayizgo gha Chiuta? Yayi! Chifukwa kuŵenge kuti dango la kupa umoyo likapelekeka, mphanyi urunji ukaŵako kwizira mu dango. 22 Kweni Malemba ghakapeleka vinthu vyose ku wuzga wa kwananga, mwakuti layizgo ilo likuŵapo chifukwa cha kuŵa na chipulikano mwa Yesu Khristu lipelekeke ku awo ŵali na chipulikano.

23 Kweni pambere chipulikano chindize, tikalongozgekanga na dango, ndipo tikapelekeka ku wuzga. Panyengo iyi tikalindiliranga chipulikano icho chikaŵa pafupi kuwoneka.+ 24 Ntheura, Dango likaŵa mulinda withu wakutilongozgera kwa Khristu,+ mwakuti tipimike ŵarunji chifukwa cha chipulikano.+ 25 Kweni sono pakuti chipulikano chafika,+ tiliso pasi pa mulinda yayi.+

26 Mose muli ŵana ŵa Chiuta+ kwizira mu chipulikano chinu mwa Khristu Yesu.+ 27 Pakuti mose imwe mukabatizika mwa Khristu, mwavwara Khristu.+ 28 Palije Muyuda nesi Mugiriki,+ palije muzga nesi mwanangwa,+ palije mwanalume nesi mwanakazi,+ pakuti mose ndimwe munthu yumoza mwa Khristu Yesu.+ 29 Kweniso, usange muli ŵa Khristu, muli mphapu* ya Abrahamu nadi,+ ŵahaliri+ mwakuyana na layizgo.+

4 Sono nkhuyowoya kuti para muhaliri wachali mwana muchoko, wakupambana yayi na muzga, nangauli iyo ni fumu ya vinthu vyose. 2 Kweni wakuŵa pasi pa awo ŵakumupwelelera kweniso pasi pa ŵateŵeti ŵalara m’paka likwane zuŵa ilo awiske ŵakatemerathu. 3 Ntheura nase apo tikaŵa ŵana ŵachoko, tikaŵa ŵazga ŵa vinthu vya charu.+ 4 Kweni nyengo yikati yakwana, Chiuta wakatuma Mwana wake, uyo wakababika mu mwanakazi+ ndipo wakaŵa pasi pa dango,+ 5 mwakuti wafwature na kugura awo ŵali pasi pa dango,+ kuti nase tizgoke ŵana ŵa Chiuta.+

6 Sono chifukwa chakuti ndimwe ŵana, Chiuta watuma mzimu+ wa Mwana wake mu mitima yithu+ ndipo ukuchemerezga kuti: “Abba,* Adada!”+ 7 Ntheura ndiweso muzga yayi kweni mwana, ndipo usange ndiwe mwana, ndiweso muhaliri mwa Chiuta.+

8 Apo mukamumanyanga yayi Chiuta, mukaŵa ŵazga ŵa awo mbachiuta nadi yayi. 9 Kweni sono pakuti mwamumanya Chiuta, panji titi, pakuti sono Chiuta wamumanyani, kasi mukuweleraso wuli ku vinthu vya charu,+ vyawakawaka na vyambura ntchito na kukhumba kuŵaso ŵazga ŵa vinthu ivi?+ 10 Mukusunga mazuŵa, myezi,+ zinyengo na vyaka. 11 Nkhumufipirani mtima, kuti panyake naphyoka pawaka chifukwa cha imwe.

12 Nkhumupemphani ŵabali, muŵe nga ndine, chifukwa nane nkhaŵa nga ndimwe.+ Mukanibudira kanthu yayi. 13 Kweni mukumanya kuti nyengo yakwamba nkhapharazga makani ghawemi kwa imwe chifukwa chakuti nkhalwara. 14 Ndipo nangauli ulwari wane ukaŵa chiyezgo kwa imwe, mukaninyanyara yayi panji kuseluka nane.* Kweni mukanipokelera nga ni mungelo wa Chiuta, nga ni Khristu Yesu. 15 Kasi kukondwa uko mukaŵa nako kuli nkhu? Chifukwa nkhumuchitirani ukaboni kuti chiŵenge chamachitiko, mphanyi mukakolowora maso ghinu na kunipa.+ 16 Kasi sono nazgoka mulwani winu pakuti nkhumuphalirani unenesko? 17 Iwo ŵakumupenjani chomene kuti ŵamukopani, ŵakumupenjerani viwemi yayi. Ŵakukhumba kumupatuskani kwa ine, mwakuti mulondezgenge iwo na mtima winu wose. 18 Ntchiwemi kuti munthu walimbikirenge kumupenjani pa chifukwa chiwemi, para nili na imwe pera yayi kweni wamupenjaninge nyengo zose. 19 Mwatwana twane,+ chifukwa cha imwe niliso na vyakuŵinya vya kubaba m’paka Khristu wapangike mwa imwe. 20 Kweni nangutemwa kuŵa namwe sono nthena, na kuyowoya mu nthowa yinyake, chifukwa natindikika namwe.

21 Muniphalire, imwe mukukhumba kuŵa pasi pa dango, kasi mukupulika yayi ivyo Dango likuyowoya? 22 Mwachiyelezgero, kuli kulembeka kuti Abrahamu wakaŵa na ŵana ŵaŵiri, yumoza mwa muteŵeti mwanakazi+ ndipo munyake mwa mwanakazi mwanangwa.+ 23 Kweni wa muteŵeti mwanakazi wakababika mwakuyana na thupi+ ndipo wa mwanakazi mwanangwa wakababika kwizira mu layizgo.+ 24 Vinthu ivi vili na ng’anamuro linyake, chifukwa ŵanakazi aŵa ŵakwimira mapangano ghaŵiri, limoza lakufuma pa Phiri la Sinayi,+ ilo likubabira ŵana ku wuzga, ilo ni Hagara. 25 Sono Hagara uyu wakwimira Sinayi,+ phiri ilo lili mu Arebiya, ndipo wakuyana na Yerusalemu wa muhanya uno, chifukwa wali mu wuzga pamoza na ŵana ŵake. 26 Kweni Yerusalemu wakuchanya ni mwanangwa, ndipo ndiyo ni mama withu.

27 Chifukwa kuli kulembeka kuti: “Kondwa mwanakazi, iwe uli chumba, iwe ukubaba chara. Chemerezga na chimwemwe, iwe mwanakazi wambura vyakuŵinya vya kubaba, pakuti ŵana ŵa mwanakazi wakujowoleka mbanandi chomene kuluska ŵa uyo wali na mfumu wake.”+ 28 Sono imwe ŵabali, muli ŵana ŵa layizgo nga umo wakaŵira Yisake.+ 29 Kweni nga umo vikaŵira nyengo yira, uyo wakababika mwakuyana na thupi wakamba kutambuzga uyo wakababika mwakuyana na mzimu,+ sono napo nthena pera.+ 30 Kasi lemba likuti wuli? “Muchimbizga muteŵeti mwanakazi na mwana wake, chifukwa mwana wa muteŵeti mwanakazi waŵenge muhaliri pamoza na mwana wa mwanakazi mwanangwa yayi.”+ 31 Ntheura ŵabali, tili ŵana ŵa muteŵeti mwanakazi yayi, kweni ŵana ŵa mwanakazi mwanangwa.

5 Khristu wakatifwatura kuti tiŵe na wanangwa uwu. Ntheura mwimilire nganganga,+ ndipo mungazomerezganga yayi kukakikaso mu joko la wuzga.+

2 Wonani, ine Paulosi, nkhumuphalirani kuti usange mukukhumba kukotoleka, Khristu waŵenge wambura phindu kwa imwe.+ 3 Kweniso, nkhuchitira ukaboni munthu waliyose uyo wakukotoleka kuti wakwenera kuchita vyose ivyo Dango likuyowoya.+ 4 Mwawukako kwa Khristu, imwe mukukhumba kupimika ŵarunji kwizira mu dango.+ Mwawira kutali na lusungu lwake lukuru. 5 Kweni ise tikulindilira kuŵa ŵarunji pamaso pa Chiuta kwizira mu mzimu utuŵa ndiposo chifukwa cha chipulikano chithu. 6 Chifukwa kwa Khristu Yesu, kukotoleka nkhanthu yayi nesi kuleka kukotoleka,+ kweni chipulikano icho chikugwira ntchito kwizira mu chitemwa.

7 Mukachimbiranga makora chomene.+ Kasi wakamujandizgani ni njani kuti muleke kulutilira kupulikira unenesko? 8 Mwakopeka na Uyo wakamuchemani yayi. 9 Kanthukumusi kachoko waka kakutukumuska bulunga lose.+ 10 Nkhugomezga kuti imwe muli mu umoza na Fumu,+ mughanaghanenge vinyake yayi. Kweni uyo wakumutimbanizgani+ wazamupokera cheruzgo chake, nanga wangaŵa njani. 11 Kweni ine ŵabali, usange nichali kupharazga ukotoli, chifukwa wuli nichali kutambuzgika? Ipo chikhuŵazgo cha khuni lakusuzgikirapo*+ chamara. 12 Ningatemwa kuti ŵanalume awo ŵakukhumba kumutimbanizgani mphanyi ŵajithena ŵekha.*

13 Ŵabali, imwe mukachemeka kuti muŵe ŵanangwa. Muleke kuzgora wanangwa winu uwu kuŵa mwaŵi wa kuchitira makhumbiro gha thupi,+ kweni chitemwa chimuchiskani kuti muteŵeteranenge.+ 14 Chifukwa malango ghose ghakufiskika na dango limoza lakuti: “Utemwenge mzengezgani wako nga umo ukujitemwera wamwene.”+ 15 Kweni usange mukulumana na kuryana,+ chenjerani kuti muleke kumalizgana.+

16 Kweni nkhuti, lutilirani kwenda mwa mzimu,+ ndipo muchitenge yayi makhumbiro gha thupi.+ 17 Chifukwa makhumbiro gha thupi ghakulimbana na mzimu, ndipo mzimu ukulimbana na thupi. Vinthu ivi vikususkana, ntheura vinthu ivyo mukukhumba kuchita ndivyo mukuchita yayi.+ 18 Kweniso, usange mukulongozgeka na mzimu, muli pasi pa dango yayi.

19 Sono milimo ya thupi yikuwonekera, ndipo ni uzaghali,*+ ukazuzi, ukwakwa,*+ 20 kusopa vikozgo, kuchita vyamizimu,*+ maulwani, zawe, sanji, kukalipa, mphindano, kugaŵikana, kugaluka, 21 bina, uloŵevu,+ kwenda mu viphikiro ivyo mukuŵa vyongo, na vinyake vyanthena.+ Pa vinthu ivi nkhumuchenjezgeranithu, nga umo nkhamuchenjezgerani kale, kuti awo ŵakuchita vinthu ivi ŵazamuhara yayi Ufumu wa Chiuta.+

22 Kweni vipambi vya mzimu ntchitemwa, chimwemwe, mtende, kuzikira, lusungu,+ uwemi, chipulikano, 23 kuzika, na kujikora.+ Palije dango lakususkana na vinthu ivi. 24 Kweniso, awo mba Khristu Yesu, ŵali kukhoma pa khuni thupi pamoza na chilakolako chake* na makhumbiro ghake.+

25 Usange tikukhala mwa mzimu, tiyeni tilutilireso kwenda mwakuyana na mzimu.+ 26 Tingaŵanga ŵakujiwona yayi,+ ŵakwambiska kuphalizgana,+ nesi kuchitirana bina.

6 Ŵabali, usange munthu wapuluka kwambura kumanya, imwe muli ŵakwenelera mwauzimu yezgani kumovwira munthu wanthena na mzimu wakuzika.+ Kweni muŵe maso+ kuti namwe muleke kuyezgeka.+ 2 Lutilirani kuyegherana vizito,+ ndipo usange mukuchita nthena mufiskenge dango la Khristu.+ 3 Chifukwa usange munthu wakujiwona kuti nkhanthu apo iyo nkhanthu yayi,+ wakujipusika yekha. 4 Kweni waliyose wapime mulimo wake,+ apo ndipo waŵenge na chifukwa chakukondwera pa iyo yekha, kwambura kujiyaniska na munthu munyake.+ 5 Chifukwa waliyose wayeghenge katundu wake.+

6 Kweniso, uyo wakusambizgika* mazgu wagaŵane vinthu vyose viwemi na uyo wakumusambizga.*+

7 Mungapuluskikanga yayi: Chiuta wakupusikika yayi. Chifukwa icho munthu wakuseŵa, ndicho wazamuvuna.+ 8 Pakuti uyo wakuseŵa vyathupi wazamuvuna kuvunda kufuma ku thupi lake, kweni uyo wakuseŵa vyamzimu wazamuvuna umoyo wamuyirayira kufuma ku mzimu.+ 9 Ntheura, tileke kuvuka pakuchita icho ntchiwemi, chifukwa mu nyengo yake tizamuvuna usange tikuvuka yayi.+ 10 Ipo, chikuru tili na mwaŵi wa kuchitira* ichi, tiyeni tichite icho ntchiwemi kwa wose, kweni chomene kwa awo mbamoza na ise mu chipulikano.

11 Wonani namulemberani mu malemba ghakurughakuru na woko lane na lane.

12 Wose awo ŵakukhumba kuwoneka nga mbawemi mu thupi* ndiwo ŵakuyezga kumuchichizgani kuti mukotoleke, mwakuti ŵaleke kutambuzgika chifukwa cha khuni lakusuzgikirapo* la Khristu. 13 Chifukwa nanga ŵaŵe awo ŵakukotoleka ŵakusunga Dango yayi,+ kweni ŵakukhumba kuti imwe mukotoleke mwakuti ŵaŵe na chifukwa chakunothera mu thupi linu. 14 Kweni nileke kunotha na kanthu kanyake padera pa khuni lakusuzgikirapo* la Fumu yithu Yesu Khristu,+ mwa uyo charu chakomeka* chifukwa cha ine, ndipo ine chifukwa cha charu. 15 Chifukwa kukotoleka nkhanthu yayi nesi kuleka kukotoleka,+ kweni kulenga kuphya ndiko nkhanthu.+ 16 Ndipo wose awo ŵalondezgenge dango la kakhaliro ili, awo mba Israyeli wa Chiuta,+ ŵaŵenge na mtende na lusungu.

17 Kufuma sono, munthu wanganisuzganga yayi, chifukwa mu thupi lane nili na mabamba gha chimanyikwiro cha kuŵa muzga wa Yesu.+

18 Lusungu lukuru lwa Fumu yithu Yesu Khristu luŵe pa imwe ŵabali chifukwa cha mzimu uwo mukulongora. Ameni.