KU ŴAFILIPI

1 Ine Paulosi na Timote, ŵazga ŵa Khristu Yesu, ku ŵatuŵa wose mwa Khristu Yesu awo ŵali mu Filipi,+ pamoza na ŵalaŵiliri na ŵateŵeti ŵakovwira:+

2 Mphanyi lusungu lukuru na mtende vyakufuma kwa Chiuta Adada ŵithu na Fumu Yesu Khristu, vyaŵa namwe.

3 Nyengo zose para namukumbukani, nkhuwonga Chiuta wane 4 mu maŵeyelero ghane ghose chifukwa cha imwe mose. Nyengo yiliyose para nkhulomba nkhuŵa na chimwemwe+ 5 chifukwa cha kovwira* pakupharazga makani ghawemi, kufuma pa zuŵa lakwamba m’paka sono. 6 Pakuti nili na chigomezgo pa chinthu ichi, chakuti uyo wakamba mulimo uwemi uwu mwa imwe, wawufiskenge+ m’paka mu zuŵa la Khristu Yesu.+ 7 Ntchakwenelera nadi kuti ine nimughanaghanirani nthena mose, chifukwa chakuti nili namwe mu mtima wane, pakuti mose mukusangana na ine mu lusungu lukuru, pose paŵiri, uku nili wakukakika mu jele+ ndiposo pakuvikilira na kukhozgera makani ghawemi mwakuyana na dango.+

8 Chiuta ni kaboni wane kuti nkhukhumba chomene kumuwonani mose chifukwa nkhumutemwani nga umo Khristu Yesu nayo wakumutemwerani. 9 Ndipo ichi ndicho nkhulutilira kulomba, kuti chitemwa chinu chilutilire kukura chomene+ pamoza na kumanya makora+ vinthu kweniso kuviŵanika chomene,+ 10 mwakuti musande ivyo ni vinthu vyakuzirwa chomene,+ ntheura kuti muŵe ŵambura kafukwa, kwambura kukhuŵazga ŵanyinu m’paka zuŵa la Khristu.+ 11 Ndipo muzuzgike na vipambi vyaurunji, ivyo vikwizira mwa Yesu Khristu, mwakuti Chiuta+ wachindikike na kulumbika.

12 Ŵabali, sono nkhukhumba kuti mumanye kuti ivyo vyanichitikira vyawovwira kuthandazga makani ghawemi. 13 Ŵasilikari wose ŵa Themba* na ŵanyake wose ŵakumanya+ kuti nili kukakika+ chifukwa cha Khristu. 14 Chifukwa chakuti nili kukakika mu jele, ŵabali ŵanandi mu Fumu ŵakulongora chikanga chomene ndipo ŵakuyowoya mazgu gha Chiuta kwambura wofi.

15 Ŵanthu ŵanyake ŵakupharazga Khristu uku ŵali na mtima wa bina na kugazgana, kweni ŵanyake ŵali na khumbo liwemi. 16 Awo ŵali na khumbo liwemi, ŵakupharazga Khristu chifukwa cha chitemwa, pakuti ŵakumanya kuti nili kusoleka kuti nivikilire makani ghawemi.+ 17 Kweni awo ŵali na mtima wa bina na kugazgana, ŵakupenja mphindano pakupharazga ndipo ŵali na chilato chiwemi yayi, pakuti ŵakukhumba kunichemera suzgo apo nili mu jele. 18 Sono vichi pera? Chakuzirwa ntchakuti munthowa yiliyose Khristu wakupharazgika, kwali ŵakupharazga mwaupusikizgi panji mwaunenesko, ine nkhusekelera. Nakuti nilutilirenge kusekelera, 19 pakuti nkhumanya kuti nisangenge chiponosko kwizira mu maŵeyelero ghinu+ na wovwiri wa mzimu wa Yesu Khristu.+ 20 Nkhulindilira mwakunweka ndiposo nili na chigomezgo chakuti nikhozgekenge soni yayi munthowa yiliyose. Kweni sono Khristu wachindikikenge chifukwa cha wanangwa wose wakuyowoya, nga umo vikaŵira nyengo zose, kwizira mu thupi lane, kwali niŵe wamoyo panji nifwe.+

21 Chifukwa kwa ine kuŵa wamoyo ni Khristu,+ ndipo kufwa ntchandulo.+ 22 Sono usange nkhwakuti nilutilire kuŵa wamoyo mu thupi, nipambikenge vipambi mu mulimo wane. Kweni icho nisankhenge niyowoyenge yayi. 23 Vinthu viŵiri ivi ndivyo vikunihangayiska, kweni icho nkhukhumba ntchakuti nifwatuke na kuŵa pamoza na Khristu,+ chifukwa kuyowoya unenesko, ichi ntchiwemi chomene.+ 24 Kweni kukhalilira mu thupi ntchakwenelera chomene kwa ine chifukwa cha imwe. 25 Ntheura pakuŵa na chigomezgo ichi, nkhumanya kuti nikhalilirenge ndipo niŵenge na imwe mose mwakuti mukure na kuŵa na chimwemwe mu chipulikano, 26 kuti munothe chomene mwa Khristu Yesu chifukwa cha ine pakuŵaso pamoza namwe.

27 Chikuru ntchakuti mukhalenge mwakwenelera makani ghawemi gha Khristu,+ mwakuti kwali niza kuzakamuwonani, kwali ine kulije, nipulikenge vya imwe kuti mukutchintha mu mzimu umoza, nga ni munthu yumoza,+ kulimbikira pamoza chifukwa cha chipulikano cha makani ghawemi. 28 Ndipo ŵalwani ŵinu mukutenthema nawo yayi munthowa yiliyose. Chinthu ichi mbukaboni wa pharanyiko kwa iwo,+ kweni kwa imwe mbukaboni wa chiponosko,+ ndipo ichi chafuma kwa Chiuta. 29 Pakuti muli kupika mwaŵi wa kuŵa na chipulikano mwa Khristu, kupulikana nayo pera yayi, kweniso kusuzgika chifukwa cha iyo.+ 30 Pakuti namwe mukukumana na masuzgo agho ine nkhukumana nagho,+ ndipo sono mukupulika kuti nichali kukumana nagho.

2 Ntheura, usange pali chikhwimisko chilichose mwa Khristu, usange pali chipembuzgo cha chitemwa, usange pali umoza wa mzimu, usange pali mtima wachitemwa ndiposo chiwuravi, 2 chitani nthena kuti niŵe na chimwemwe chikuru, pakulongora kuti muli na maghanoghano ghakuyana, chitemwa chakuyana, ndipo mukukolerana chomene* na kuŵa na maghanoghano ghamoza.+ 3 Lekani kuchita kanthu chifukwa cha mphindano+ panji chifukwa cha kujiwona,+ kweni muŵe ŵakujiyuyura na kuwona ŵanyinu kuti ŵakumuluskani.+ 4 Kulaŵiska pa ivyo imwe mukukhumba pera yayi,+ kweniso ivyo ŵanyinu ŵakukhumba.+

5 Muŵenge na maghanoghano agha, agho Khristu Yesu nayo wakaŵa nagho.+ 6 Nangauli wakaŵa mu chikozgo cha Chiuta,+ wakaghanaghanapo yayi vyakuti wayane na Chiuta.+ 7 Ndimo wakachitira yayi, kweni wakajikhutura na kuŵa nga muzga+ ndipo wakayana na ŵanthu.+ 8 Kuluska apa, wakati wayana na munthu, wakajiyuyura ndipo wakapulikira m’paka nyifwa,+ nyifwa ya pa khuni lakusuzgikirapo.*+ 9 Pa chifukwa ichi, Chiuta wakamukwezga pa malo ghapachanya+ na kumupa zina ilo lili pachanya pa zina linyake lililose,+ 10 mwakuti mu zina la Yesu, khongono lililose lijikame, la ŵakuchanya na ŵa pa charu chapasi ndiposo la awo ŵali kusi ku charu.+ 11 Ndipo lulimi lulilose luzomere pakweru kuti Yesu Khristu ni Fumu,+ kuti Chiuta Adada wachindikike.

12 Ntheura ŵakutemweka, umo mwaŵira ŵakupulikira nyengo zose, para nilipo pera yayi, kweni chomene sono apo ine kulije, lutilirani kunozga chiponosko chinu mwawofi na kumbwambwantha. 13 Pakuti Chiuta, chifukwa cha khumbo lake liwemi, ndiyo wakumuchiskani, wakumupani khumbo kweniso nkhongono kuti muchite vyose ivyo wakukhumba. 14 Lutilirani kuchita vinthu vyose kwambura kudinginyika+ na kukwesana,+ 15 mwakuti muŵe ŵambura kafukwa na ŵambura mulandu, ŵana ŵa Chiuta+ ŵambura kalema pakati pa muwiro uwu wakubendera na wakunyongoloka,+ pakati pa uwo mukuŵala nga ni miliko mu charu,+ 16 ŵakukoleska mazgu gha umoyo.+ Mwakuti nizakaŵe na chifukwa chakukondwera mu zuŵa la Khristu, pakuwona kuti nkhachimbira pawaka yayi nesi kufukafuka pawaka. 17 Nangauli nkhujipeleka nga ni sembe ya chakumwa+ iyo yikupungulika pa sembe+ ndiposo pa uteŵeti wakupatulika, ivyo namwe mukuchita pakuŵa na chipulikano, nkhukondwa na kusekelera pamoza na imwe mose. 18 Mwakuyana waka, namwe mukondwenge na kusekelera pamoza na ine.

19 Nkhugomezga mwa Fumu Yesu kutuma Timote+ kwa imwe sonosono, mwakuti nikhozgeke para napulika vya imwe. 20 Pakuti nilije munyake uyo wali na maghanoghano ghakuyana na ghake, uyo wazamupwelelera nadi vya imwe. 21 Chifukwa ŵanyake wose ŵakupenja vyakukhumba vyawo, vya Yesu Khristu yayi. 22 Kweni mukumanya ukaboni uwo wakalongora, kuti nga ni mwana na wiske,+ wakateŵetera pamoza na ine pakupharazga makani ghawemi. 23 Ntheura, uyu ndiyo nkhugomezga kumutumirani mwaluŵiro, usange nawona umo vinthu vyaŵira kwa ine. 24 Nkhugomezga mu Fumu kuti nane nizenge sonosono.+

25 Kweni sono, nkhuwona kuti ntchakwenelera kumutumirani Epafurodito, uyo ni mubali wane na wantchito munyane na msilikari munyane, kweni ni thenga linu na muteŵeti wane wakunovwira pa ivyo nkhusoŵa.+ 26 Pakuti wakukhumba chomene kumuwonani imwe mose, ndipo wakusuzgika maghanoghano chifukwa mukapulika kuti wakalwara. 27 Wakalwara nadi, wakakhala pachoko kufwa. Kweni Chiuta wakamuchitira lusungu, iyo pera yayi kweni na ine wuwo kuti nileke kuŵa na chitima pa chitima chinyake. 28 Ntheura nkhumutuma kwa imwe mwaluŵiro chomene, mwakuti para mwamuwona, musekelereso ndipo ine nane chitima chichepeko. 29 Ntheura mupokelerani umo mukuchitira mu Fumu na chimwemwe chose, ndipo lutilirani kuwona ŵanthu ŵanthena kuŵa ŵakutemweka chomene.+ 30 Pakuti wakaŵa pafupi kufwa chifukwa cha mulimo wa Khristu.* Wakaŵika umoyo wake pangozi, mwakuti waniteŵetere m’malo mwa imwe, apo imwe kukaŵavya.+

3 Paumaliro ŵabali ŵane, lutilirani kusekelera mu Fumu.+ Kumulemberani vinthu vimoza pera ni suzgo yayi kwa ine, kweni ntchivikiliro kwa imwe.

2 Chenjerani na ntcheŵe. Chenjerani na awo ŵakuchita vyakupweteka. Chenjerani na awo ŵakukhozgera ukotoli.+ 3 Pakuti ise ndise ŵakukotoleka zanadi,+ ise tikuchita uteŵeti wakupatulika mwa mzimu wa Chiuta ndipo tikunotha mwa Khristu Yesu+ ndiposo tikugomezga vinthu ivyo ŵanthu ŵakuviwona kuti ni vyakuzirwa yayi. 4 Usange waliko uyo wali na vifukwa vyakugomezgera vinthu ivyo ŵanthu ŵakuviwona kuti ni vyakuzirwa, ndine.

Usange munthu munyake wakughanaghana kuti wali na vifukwa vyakugomezgera vinthu ivyo ŵanthu ŵakuviwona kuti ni vyakuzirwa, ine nkhumuluska. 5 Nkhakotoleka pa zuŵa la 8,+ ndine wa mbumba ya Israyeli, wa fuko la Benjamini, Muhebere wakubabika ku Ŵahebere.+ Kuyana na dango ndine Mufarisi.+ 6 Nkhajipeleka pakutambuzga mpingo.+ Pakuyowoya vya urunji uwo ukwizira mu dango, nkhaŵa wambura kafukwa. 7 Kweni vinthu ivyo vikaŵa vyachandulo kwa ine, nkhuviwona kuti ni vyambura ntchito* chifukwa cha Khristu.+ 8 Chakuluska vyose ntchakuti nkhuwona vinthu vyose kuŵa vyambura ntchito chifukwa cha chandulo chikuru cha kumumanya Khristu Yesu Fumu yane. Chifukwa cha iyo, vyose nkhuviwona kuŵa vyambura ntchito ndipo nkhuviwona kuti ni viswaswa* pera, mwakuti niŵe paubwezi na Khristu, 9 ndiposo kuti nizakasangike mu umoza na iyo, chifukwa cha urunji wane pakulondezga Dango yayi, kweni chifukwa cha urunji uwo ukwizira mu chipulikano+ mwa Khristu,+ urunji uwo ukufuma kwa Chiuta chifukwa cha chipulikano.+ 10 Nkhukhumba kuti nimumanye iyo ndiposo kuti nimanye nkhongono za chiwuka chake+ na kusangana nayo mu visuzgo vyake,+ kujipeleka ku nyifwa yakuyana na yake,+ 11 kuti mulimose umo vingaŵira, niwone usange ningazakawuka ku ŵakufwa pa chiwuka chakwambilira.+

12 Kuti napokera kale chinthu ichi yayi, nesi kuzgoka wakufikapo, kweni nkhulimbikira+ kuti niwone usange ningasanga icho Khristu Yesu wakasankhira ine.+ 13 Ŵabali, nkhujiwona kuti nachisanga kale yayi. Kweni pali chinthu chimoza icho nkhuchita chakuti: Nkhuluwa vinthu vyakumasinda+ na kulimbikira kuti nisange vinthu vyakunthazi.+ 14 Nkhuchimbira na chilato chakuti nkhapokere njombe+ ya ntchemo yakuchanya+ iyo Chiuta wakupeleka kwizira mwa Khristu Yesu. 15 Ndipo ise tili ŵakukhwima,+ tiŵe na maghanoghano agha. Ndipo usange muli na maghanoghano ghanyake munthowa yiliyose, Chiuta wazamuvumbura maghanoghano ghakwenelera kwa imwe. 16 Mulimose umo talutira panthazi, tiyeni tilutilire kwenda mwakwenelera munthowa yeneyiyi.

17 Ŵabali, mulondezgenge ine mwakukolerana,+ ndipo laŵiskani awo ŵakwenda mu nthowa iyo yikuyana na chakuwonerapo icho tikamulongorani. 18 Pakuti pali ŵanandi awo nkhaŵazunuranga kanandi, kweni sono nkhuŵazunura uku nkhulira, awo ŵakwenda nga mbalwani ŵa khuni lakusuzgikirapo* la Khristu. 19 Umaliro wawo ni pharanyiko, chiuta wawo ni nthumbo zawo, uchindami wawo ni vyasoni vyawo, nakuti ŵakuŵika maghanoghano ghawo pa vinthu vya pa charu chapasi.+ 20 Kweni ise, chikaya chithu+ chili kuchanya,+ ku malo agho kuli mponoski withu, Fumu Yesu Khristu,+ uyo tikumulindilira mwakunweka. 21 Iyo wazamuzgora mathupi ghithu ghakuyuyulika agha kuti ghayane na thupi lake lauchindami+ mwakuyana na nkhongono zake zikuru izo wali nazo izo zikumovwira kuti walambike vinthu vyose kwa iyo yekha.+

4 Ntheura, ŵabali ŵane ŵakutemweka, imwe nkhumunwekerani, ndimwe chimwemwe chane na mphumphu yane,+ tchinthani+ mwanthowa iyi mu Fumu.

2 Nkhuchiska Yuwodiya na Sintike kuti ŵayane maghanoghano mu Fumu.+ 3 Nkhukulomba iwe muteŵeti munyane mwenecho, lutilira kovwira ŵanakazi aŵa, awo ŵalimbikira* pamoza na ine chifukwa cha makani ghawemi pamoza na Kilementi kweniso ŵantchito ŵanyane wose, awo mazina ghawo ghali mu buku la umoyo.+

4 Sekelerani mu Fumu nyengo zose. Nkhuwerezgaso kuti, Sekelerani!+ 5 Mahara ghinu+ ghamanyikwe ku ŵanthu wose. Fumu yili pafupi. 6 Lekani kwenjerwa na chinthu chilichose,+ kweni mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta.+ 7 Ndipo mtende+ wa Chiuta uwo ukuluska maghanoghano ghose,* uvikilirenge mitima yinu+ na maghanoghano ghinu kwizira mwa Khristu Yesu.

8 Paumaliro ŵabali, vinthu vyose vyaunenesko, vinthu vyose vyakuzirwa, vinthu vyose vyaurunji, vinthu vyose vituŵa, vinthu vyose vyakutemweka, vinthu vyose vya mbiri yiwemi, nkharo yiliyose yiwemi, na vinthu vyose vyakulumbika, lutilirani kughanaghanira vinthu ivi.+ 9 Vinthu ivyo mwasambira na kuzomera kweniso kupulika na kuwona mwa ine, ndivyo muchitenge,+ ndipo Chiuta wa mtende waŵenge namwe.

10 Nkhusekelera chomene mu Fumu pakuti sono mwambaso kunighanaghanira.+ Nangauli mukaghanaghananga vya ine, kweni mukaŵavya m’pata wakulongolera kuti mukunighanaghanira. 11 Nkhuyowoya ichi chifukwa cha ukavu yayi, pakuti nasambira kukhorwa na vinthu ivyo nili navyo.+ 12 Nkhumanya umo ningakhalira na tuchoko waka+ ndiposo umo ningakhalira para nili na vinandi. Namanya chisisi cha kuŵa wakukhorwa mu vyose ndiposo kuyana na umo vinthu vyaŵira, kuŵa wakukhuta na kuŵa wanjara, kuŵa na vinandi na kusoŵa pakukora. 13 Mu vinthu vyose, nkhusanga nkhongono mwa uyo wakunipa nkhongono.+

14 Ndipouli, mukachita makora kunovwira pa suzgo yane. 15 Nakuti, imwe Ŵafilipi, mukumanya makora kuti mukati mwapulika kakwamba makani ghawemi, apo nkhafumanga ku Makedoniya, pakaŵavya mpingo uwo ukanovwira pa nkhani ya kupeleka na kupokera, kweni imwe pera.+ 16 Chifukwa apo nkhaŵa mu Tesalonika mukanitumira kanthu pakusoŵa kwane. Mukanitumira kamoza pera yayi kweni kaŵiri. 17 Nkhupenja chawanangwa yayi, kweni nkhupenja vipambi vyakuti visazgikire pa ivyo muli navyo. 18 Kweni nili na vinthu vyose ivyo nkhukhumba ndipo ni vinandi. Sono napika vyakukwana, pakuti napokera kwa Epafurodito+ vinthu ivyo vyafuma kwa imwe, ivyo vili nga ni sungu liwemi,+ sembe yakuzomerezgeka, yakukondweska Chiuta. 19 Chiuta wane nayo kwizira mwa Khristu Yesu, wamupaninge vyose vyakukwana pakusoŵa kwinu+ kuyana na usambazi wake wauchindami. 20 Sono Chiuta uyo ni Dada withu, wachindikike muyirayira swii. Ameni.

21 Munitawuzgireko mutuŵa waliyose mwa Khristu Yesu. Ŵabali awo ŵali na ine ŵakumutawuzgani. 22 Ŵatuŵa wose, kweni chomene ŵamunyumba ya Kesare,+ ŵakumutawuzgani.

23 Lusungu lukuru lwa Fumu Yesu Khristu luŵe namwe chifukwa cha mzimu uwo mukulongora.