KALATA YACHIŴIRI KU ŴATESALONIKA

1 Ine Paulosi, Silivano,* kweniso Timote,+ ku mpingo wa Ŵatesalonika mwa Chiuta, Adada ŵithu na Fumu Yesu Khristu:

2 Mphanyi lusungu lukuru na mtende vyakufuma kwa Chiuta Adada ŵithu na Fumu Yesu Khristu, vyaŵa namwe.

3 Tikwenera kuwonga Chiuta nyengo zose chifukwa cha imwe ŵabali. Ichi ntchakwenelera chifukwa chipulikano chinu chikukura chomene, ndipo chitemwa cha waliyose wa imwe kwa yumoza na munyake chikusazgikira.+ 4 Ntheura tikunotha mwa imwe+ pakati pa mipingo ya Chiuta, chifukwa cha kuzizipizga kwinu na chipulikano mu nthambuzgo zinu zose na visuzgo ivyo mukukumana navyo.*+ 5 Uwu mbukaboni wakuti Chiuta wakweruzga mwaurunji, ivyo vyawovwira kuti imwe mupimike ŵakwenelera Ufumu wa Chiuta, uwo mukusuzgikirapo.+

6 Chiuta ni murunji, chifukwa wakuwezgera suzgo awo ŵakumusuzgani.+ 7 Kweni kwa imwe mukusuzgika na visuzgo muzamupumuzgika pamoza na ise apo Fumu Yesu yizamuvumbukwa+ kufuma kuchanya pamoza na ŵangelo ŵake ŵankhongono+ 8 mu moto wakugolera, apo yizenge na nduzga pa awo ŵakumumanya yayi Chiuta na awo ŵakuleka kupulikira makani ghawemi ghakuyowoya vya Fumu yithu Yesu.+ 9 Ŵanthu aŵa ŵazamupokera chilango cha pharanyiko lamuyirayira, ŵazamufumapo panthazi pa Fumu na panthazi pa uchindami wa nkhongono zake.+ 10 Para yiza yizamupokera uchindami pamoza na ŵatuŵa ŵake. Pa zuŵa ili, wose awo ŵakapulikana ŵazamuyiwona kuti njakuzizwiska. Chifukwa mukapulikana na ukaboni uwo tikapeleka pakati pinu.

11 Pa chifukwa ichi, tikumulomberani nyengo zose, kuti Chiuta withu wamupimani ŵakwenelera ntchemo yake.+ Ndipo na nkhongono zake wafiske uwemi wose uwo ukumukondweska na mulimo wa chipulikano 12 mwakuti zina la Fumu yithu Yesu lichindikike mwa imwe, ndiposo imwe mu umoza na iyo, kuyana na lusungu lukuru lwa Chiuta withu na Fumu Yesu Khristu.

2 Kweni ŵabali, vya kuŵapo kwa Fumu yithu Yesu Khristu+ na kuwunganyika kwithu kuti tikaŵe pamoza na iyo,+ tikumupemphani 2 kuti muleke kusunkhunyika luŵiro maghanoghano nesi kutenthema na mazgu agho ghakuyowoyeka nga kuti ghafuma kwa Chiuta+ panji uthenga wa pa mulomo, nesi kalata iyo yingaŵa nga yafuma kwa ise, yakuti zuŵa la Yehova*+ lafika.

3 Munthu wangamupuluskaninge* yayi munthowa yiliyose, chifukwa zuŵa ili lizenge yayi m’paka chigaluka+ chize dankha ndipo chikanamalango+ wavumbukwe, mwana wa pharanyiko.+ 4 Uyu ngwakususka ndipo wakujikwezga pachanya pa waliyose uyo wakuchemeka chiuta panji icho chikusopeka, ntheura wakukhala pasi mu tempile la Chiuta ndipo wakujilongora pakweru nga ni chiuta. 5 Kasi mukukumbuka yayi kuti apo nkhaŵa namwe, nkhamuphaliraninge vinthu ivi?

6 Ndipo mukumanya icho chikujandizga kuti sono waleke kuwonekera, mwakuti wazakavumbukwe pa nyengo yake yakwenelera. 7 Mbunenesko, chisisi cha uchikanamalango uwu chili kwamba kale kugwira ntchito.+ Kweni chigwirenge ntchito yake m’paka uyo wakujandizga nthowa wafumepo. 8 Kufuma apo, chikanamalango uyu wazamuvumbulika. Fumu Yesu yizamumuparanya na mzimu wa mulomo wake,+ na kumuzgora wawaka, ndipo ivi vizamulongora+ kuŵapo kwa Fumu. 9 Kweni muheni uyu walipo chifukwa cha mulimo wa Satana,+ wakuchita mulimo uliwose wankhongono na vimanyikwiro vyautesi na minthondwe*+ 10 na upusikizgi uliwose wambura urunji,+ iyo wakuchitira awo ŵazamuparanyika. Ichi chizamuŵa chilango chawo chifukwa chakuti ŵakana kutemwa unenesko kuti ŵaponoskeke. 11 Lekani Chiuta walekelera upusikizgi kuti ŵapuluskike, mwakuti ŵagomezge utesi,+ 12 kuti wose ŵeruzgike chifukwa ŵakagomezga unenesko yayi, kweni ŵakakondwa na ubendezi.

13 Kweni tikwenera kuwonga Chiuta nyengo zose chifukwa cha imwe, ŵabali ŵakutemweka na Yehova,* chifukwa Chiuta wakamusorani+ pakwamba kuti muponoskeke, mutuŵiskike na mzimu,+ kweniso muŵe na chipulikano mu unenesko. 14 Kwizira mu makani ghawemi agho tikupharazga wakamuchemerani ichi, na khumbo lakuti musange uchindami wa Fumu yithu Yesu Khristu.+ 15 Ntheura ŵabali, yimilirani nganganga+ na kukoleska vinthu ivyo mukasambizgika,+ kwali kwizira mu uthenga uwo tikamuphalirani panji mu kalata yithu. 16 Kweniso, mphanyi Fumu yithu Yesu Khristu na Chiuta, Adada ŵithu, awo ŵakatitemwa+ na kutipa chisangulusko chamuyirayira na chigomezgo chiwemi+ kwizira mu lusungu lukuru, 17 ŵasanguluska mitima yinu na kumukhozgani kuti nyengo zose muchitenge na kuyowoya icho ntchiwemi.

3 Paumaliro ŵabali, lutilirani kutilombera+ kuti mazgu gha Yehova* ghalutilire kuthandazgika mwaluŵiro+ na kuchindikika, nga umo imwe mukuchitira, 2 ndiposo kuti tithaskike ku ŵanthu ŵaheni na ŵakwananga,+ chifukwa chipulikano chili na ŵanthu wose yayi.+ 3 Kweni Fumu njakugomezgeka, ndipo yimukhozganinge na kumuvikilirani kwa muheni. 4 Ise pakuŵa ŵalondezgi ŵa Fumu, tikumugomezgani kuti mukuchita makora ndipo mulutilirenge kuchita ivyo tikamuphalirani. 5 Mphanyi Fumu yalutilira kulongozga makora mitima yinu kuti mutemwenge Chiuta+ na kuzizipizga+ chifukwa cha Khristu.

6 Sono ŵabali, tikumupani ulongozgi mu zina la Fumu Yesu Khristu, kuti mufumeko kwa mubali waliyose uyo wakwenda mwambura kwenelera,+ mwakupambana na ulongozgi uwo mukapokera kwa ise.+ 7 Pakuti imwe mukumanya umo mungatiyezgera,+ chifukwa tikachita mwambura kwenelera yayi pakati pinu, 8 nesi kurya chakurya cha munthu kwambura kulipira.+ Kweni tikafukafuka, tikagwiranga ntchito usiku na muhanya kuti tileke kuŵika mphingo yikuru pa yumoza wa imwe.+ 9 Tikachita nthena chifukwa chakuti tilije mazaza yayi,+ kweni tikakhumba kuti ise tiŵe chiyelezgero chakuti imwe mulondezgenge.+ 10 Nakuti nanga ni apo tikaŵa namwe, tikamuphaliraninge dango ili, lakuti: “Usange munthu wakukhumba yayi kugwira ntchito, kurya nako waleke.”+ 11 Chifukwa tikupulika kuti ŵanyake ŵakwenda mwambura kwenelera pakati pinu,+ ŵakugwira ntchito yiliyose yayi, kweni ŵakunjilirapo pa nkhani izo zikuŵakhwaska yayi.+ 12 Ŵanthu ŵanthena tikuŵachiska na kuŵapempha kwizira mwa Fumu Yesu Khristu kuti ŵagwirenge ntchito na kufwasa na kurya chakurya icho ŵachigwilira ntchito.+

13 Ndipo imwe ŵabali, mungalekanga yayi kuchita viwemi. 14 Kweni usange munyake wakupulikira yayi mazgu ghithu gha mu kalata iyi, mumuŵanike munthu wanthena, ndipo muleke kwendezgana nayo,+ mwakuti wakhozgeke soni. 15 Ndipouli, kumuwona nga ni mulwani yayi, kweni lutilirani kumuchenjezga+ pakuŵa mubali.

16 Sono mphanyi munthowa yiliyose, Fumu yamtende yalutilira kumupani mtende.+ Fumu yiŵe namwe mose.

17 Ine Paulosi nkhumutawuzgani, nkhulemba na woko lane,+ icho ntchimanyikwiro cha makalata ghane ghose, umu ndimo nkhulembera.

18 Lusungu lukuru lwa Fumu yithu Yesu Khristu luŵe namwe mose.