KALATA YACHIŴIRI KWA TIMOTE

1 Ine Paulosi, mpositole wa Khristu Yesu mu khumbo la Chiuta mwakuyana na layizgo la umoyo kwizira mwa Khristu Yesu,+ 2 kwa Timote, mwana wane wakutemweka:+

Mphanyi lusungu lukuru, lusungu na mtende vyakufuma kwa Chiuta Adada na Khristu Yesu Fumu yithu, vyaŵa nawe.

3 Nkhuwonga Chiuta, uyo nkhumuchitira uteŵeti wakupatulika nga umo ŵasekuru ŵane ŵakachitira na njuŵi yituŵa, ndipo usiku na muhanya nkhuleka yayi kukukumbuka mu maŵeyelero ghane. 4 Para nkhukumbuka masozi ghako, nkhukhumbisiska kukuwona mwakuti niŵe na chimwemwe chikuru. 5 Pakuti nkhukumbuka chipulikano chako chambura upusikizgi,+ icho chikamba kuŵa mwa buya wako Loyisi na nyoko Yunike, ndipo nkhugomezga kuti ndicho nawe uli nacho.

6 Pa chifukwa ichi, nkhukukumbuska kuti usonkhezge nga ni moto chawanangwa cha Chiuta icho ukapokera nkhati naŵika mawoko ghane pa iwe.+ 7 Pakuti Chiuta wakatipa mzimu wawofi yayi,+ kweni wankhongono+ na wachitemwa ndiposo wamahara. 8 Ntheura ungakhozgekanga soni yayi kupharazga vya Fumu yithu,+ nesi kuyowoya vya ine kayidi chifukwa cha iyo, kweni nawe usuzgike+ chifukwa cha makani ghawemi ndipo ugomezge nkhongono za Chiuta.+ 9 Iyo wakatiponoska na kutichema na ntchemo yituŵa,+ chifukwa cha milimo yithu yayi, kweni chifukwa cha khumbo lake na lusungu lukuru.+ Lusungu ulu lukapika kwa ise mwa Khristu Yesu kale chomene, 10 kweni sono lwalongoreka makora mwa kuwoneka kwa Mponoski withu, Khristu Yesu,+ uyo wamazga nyifwa+ ndipo wavumbura umo tingaŵira na umoyo+ na kuŵa ŵambura kuvunda+ kwizira mu makani ghawemi,+ 11 agho nkhasolekera kuŵa mupharazgi na mpositole ndiposo msambizgi.+

12 Lekani nane nkhusuzgika na vinthu ivi,+ kweni nkhukhozgeka soni yayi.+ Pakuti nkhumanya uyo namugomezga, ndipo nkhugomezga kuti wasungilirenge icho naŵikizga mwa iyo m’paka zuŵa lira.+ 13 Lutilira kukoleska mazgu ghaunenesko*+ agho ukapulika kwa ine pamoza na chipulikano na chitemwa ivyo vili mwa Khristu Yesu. 14 Mzimu utuŵa uwo ukukhala mwa ise ukovwire kusungilira usambazi uwu.+

15 Ukumanya kuti ŵanthu wose mu chigaŵa cha Asiya+ ŵafumako kwa ine. Ŵamoza ŵawo ni Fugelo na Heremogene. 16 Mphanyi Fumu yalongora lusungu ku ŵamunyumba ya Onesiforo,+ chifukwa kanandi wakizanga kuzakanisanguluska, ndipo wakakhozgeka soni yayi na simbi zane. 17 Kweni apo wakaŵa mu Romu, wakanipenja chomene ndipo wakanisanga. 18 Mphanyi Fumu yamuzomerezga kuti Yehova* wazakamulongore lusungu mu zuŵa lira. Ndipo iwe ukumanya makora mauteŵeti ghose agho wakachita mu Efeso.

2 Ntheura iwe mwana wane,+ lutilira kusanga nkhongono kwizira mu lusungu lukuru ulo luli mwa Khristu Yesu. 2 Ndipo vinthu ivyo nkhakuphalira ivyo ŵakaboni ŵanandi ŵakakhozgera+ uvipeleke ku ŵanthu ŵakugomezgeka, awo ŵaŵengeso ŵakwenelera kusambizga ŵanyawo. 3 Pakuŵa msilikari muwemi+ wa Khristu Yesu, nawe usuzgike.+ 4 Palije munthu uyo wakugwira ntchito ya usilikari wakuchitaso* malonda* mu umoyo uwu, mwakuti wakondweske uyo wakamulemba usilikari. 5 Kweniso, usange munthu wakuchita chiphalizgano mu maseŵero, wakuvwalikika mphumphu yayi kwambura kuti wachita chiphalizgano mwakulondezga malango.+ 6 Mulimi uyo wakulimbikira chomene, ndiyo wakwenera kuŵa wakwamba kuryako vipambi. 7 Nyengo zose ughanaghanirenge ivyo nkhuyowoya. Fumu yikovwirenge kupulikiska vinthu vyose.

8 Kumbuka kuti Yesu Khristu wakawuskika ku ŵakufwa,+ ndipo wakaŵa wa mphapu* ya Davide,+ mwakuyana na makani ghawemi agho nkhupharazga.+ 9 Nkhusuzgika na kukakika mu jele nga ntchigeŵenga chifukwa cha makani agha.+ Kweni mazgu gha Chiuta ngakukakika yayi.+ 10 Ntheura nkhulutilira kuzizipizga vinthu vyose chifukwa cha ŵakusoleka,+ mwakuti nawo ŵasange chiponosko icho chili mwa Khristu Yesu pamoza na uchindami wamuyirayira. 11 Mazgu agha ngakugomezgeka: Usange tikafwa pamoza, tizamuŵaso ŵamoyo pamoza.+ 12 Usange tikulutilira kuzizipizga, tizamuwusa pamoza nayo nga ni mathemba.+ Usange tikumukana, nayo wazamutikana.+ 13 Usange tili ŵambura kugomezgeka, iyo ngwakugomezgeka nipera, chifukwa wangajikana yayi.

14 Lutilira kuŵakumbuska vinthu ivi, uŵasambizge* panthazi pa Chiuta kuti ŵaleke kupindana pa mazgu, chinthu icho chilije ntchito napachoko chifukwa chikupweteka* awo ŵakupulikizga. 15 Yezga chomene kujilongora wakuzomerezgeka kwa Chiuta, wantchito wambura kukhozgeka soni na chilichose, wakuchita mwakwenelera na mazgu gha unenesko.+ 16 Kweni kana mazgu ghawakawaka agho ghakuyuyura vyakupatulika,+ pakuti ŵalutilirenge nipera kususkana na khumbo la Chiuta, 17 ndipo mazgu ghawo ghathandazgikenge nga ntchilonda cha zoza. Ŵamoza ŵawo ni Himenayo na Fileto.+ 18 Ŵanthu aŵa ŵapatukako ku unenesko, ŵakuti chiwuka chili kuchitika kale,+ ndipo ŵakubwangandura chipulikano cha ŵanyake. 19 Nangauli vili nthena, fawundeshoni* yakukhora ya Chiuta yichali waka, yili na chidindo chakuti: “Yehova* wakuŵamanya awo mbake,”+ ndiposo kuti: “Waliyose uyo wakuchema pa zina la Yehova*+ waleke ubendezi.”

20 Sono mu nyumba yikuru mukuŵa viŵiya* vyagolide na vyasiliva pera yayi, kweni mukuŵaso vyakhuni na vyadongo, ndipo vinyake vya mulimo wakuzirwa, kweni vinyake vya mulimo wambura kuzirwa. 21 Ntheura usange munyake wakupatukako ku viŵiya vya mulimo wambura kuzirwa, waŵenge chiŵiya cha mulimo wakuzirwa, chakutuŵiskika, chakovwira kwa mwenecho, icho chanozgekera mulimo uliwose uwemi. 22 Ntheura chimbirako ku makhumbiro ghauwukirano, kweni londezga urunji, chipulikano, chitemwa, mtende pamoza na awo ŵakuchema Fumu na mtima wakutowa.

23 Kweniso, kana kususkana vinthu vyauchindere na vyambura ntchito+ ivyo vikwambiska waka mbembe. 24 Muzga wa Fumu wakwenera kuchita mbembe yayi, kweni wakwenera kuŵa wakuzika ku wose,+ wakumanya kusambizga, wakujiwezga para ŵamubudira.+ 25 Wakulongozga mwakuzika awo ŵakususkana nayo.+ Panji Chiuta wangaŵapa mwaŵi kuti ŵang’anamuke mtima,* na kumanya makora unenesko.+ 26 Ndiposo kuti ŵajinyumwe na kufumamo mu chipingo cha Dyabulosi, pakuwona kuti waŵakora ŵamoyo kuti ŵachite khumbo lake.+

3 Kweni umanye ichi, kuti mu mazuŵa ghaumaliro+ kuzamuŵa nyengo zinonono na zakusuzga. 2 Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, 3 ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, 4 ŵakwendera mphiska, ŵakajilangi, ŵakujitukumura na kunotha, ŵakutemwa vyakusanguluska m’malo mwa kutemwa Chiuta, 5 ŵakuwoneka nga ŵakusopa Chiuta mwakujipeleka kweni ŵakukana nkhongono zake,+ ndipo upatukeko ku ŵanthu aŵa. 6 Pakuti mukati mwawo mukufuma ŵanalume awo ŵakugwentha na kunjira mu zinyumba umo ŵakukora wuzga ŵanakazi ŵakulopwa awo ŵali na zakwananga zinandi ndipo ŵakulongozgeka na makhumbiro ghakupambanapambana. 7 Nyengo zose ŵakusambira kweni unenesko ŵakuwumanya makora yayi.

8 Umo Yane na Yambure ŵakachitira pakulimbana na Mozesi, aŵa nawo ŵakulutilira kulimbana na unenesko. Ŵanalume aŵa maghanoghano ghawo ghali kutimbanizgika chomene, ndipo Chiuta wakuŵakana chifukwa ŵalije chipulikano. 9 Kweni ŵalutenge patali yayi, pakuti uzeleza wawo uwonekenge ku wose, umo ukawonekera wa ŵanthu ŵaŵiri ŵara.+ 10 Kweni iwe walondezga makora chisambizgo chane, makhaliro ghane,+ khumbo lane, chipulikano chane, kuzikira kwane, chitemwa chane, chizizipizgo chane, 11 nthambuzgo zane, visuzgo vyane, vinthu ivyo vikanichitikira mu Antiyoke,+ mu Ikoniya,+ na mu Lisitira.+ Nkhazizipizga nthambuzgo izi, ndipo Fumu yikanithaska ku vyose ivi.+ 12 Wose awo ŵakukhumba kusopa Chiuta mwakujipeleka mwakulondezga Khristu Yesu, nawo ŵatambuzgikenge.+ 13 Kweni ŵanthu ŵaheni na ŵakupusika ŵalutilirenge kuŵa ŵaheni, kupuluska na kupuluskika.+

14 Kweni iwe lutilira kulondezga vinthu ivyo ukasambira ndipo ukakhorwa na kuvigomezga,+ pakumanya ŵanthu awo ukasambirako vinthu ivi 15 ndiposo kuti kufuma pa ubonda,+ wamanya malemba ghatuŵa+ agho ghakukovwira kuŵa wavinjeru, kuti uponoskeke kwizira mu chipulikano mwa Khristu Yesu.+ 16 Malemba ghose ngakupelekeka na Chiuta+ kwizira mwa mzimu ndipo ngachandulo pa kusambizga,+ kuchenya, kunyoloska* vinthu, na kulanga mu urunji,+ 17 mwakuti munthu wa Chiuta waŵenge wakukwana, wakunozgeka kuchita mulimo uliwose uwemi.

4 Panthazi pa Chiuta na Khristu Yesu, uyo wazamweruzga+ ŵamoyo na ŵakufwa,+ para wazakawonekera+ ndiposo para wiza mu Ufumu wake,+ nkhukuchiska kuti: 2 Pharazga mazgu.+ Upharazge mwaluŵiro, mu nyengo yiwemi na nyengo ya suzgo. Uchenye,+ uchenjezge, na kuchiska. Pakuchita ivi uŵe wakuzikira na kusambizga mwaluso.+ 3 Pakuti yizamuŵapo nyengo iyo ŵanthu ŵazamuleka kutegherezga chisambizgo chaunenesko,*+ kweni mwakuyana na makhumbiro ghawo, ŵazamujiwunjikira ŵasambizgi kuti ŵapulike ivyo vikukondweska makutu ghawo.*+ 4 Ŵazamuleka kutegherezga ku unenesko, ndipo ŵazamuzgokera ku nkhani zautesi. 5 Kweni iwe sungilira maghanoghano ghako mu vinthu vyose, uzizipizge masuzgo,+ uchite mulimo wa mupharazgi,* ufiske uteŵeti wako mwakukwana.+

6 Pakuti nkhupungulika kale nga ni sembe ya chakumwa,+ ndipo nyengo ya kufwatuka+ kwane yili pafupi. 7 Narwa nkhondo yiwemi,+ nachimbira mu chiphalizgano m’paka kuumaliro,+ nasungilira chipulikano. 8 Kufuma sono, mphumphu ya urunji+ yanisungikira, iyo Fumu, mweruzgi murunji,+ yizamupeleka kwa ine nga ni njombe mu zuŵa ilo,+ ndipo yizamupeleka kwa ine pera yayi, kweniso ku wose awo ŵakunweka kuti iyo yiwoneke.

9 Yezga chomene kuti wize kwa ine luŵiro. 10 Pakuti Dema+ wali kunileka chifukwa watemwa vinthu vya mu nyengo iyi,* ndipo wali kuluta ku Tesalonika, Kiresensi ku Galatiya, Tito ku Dalamatiya. 11 Luka pera ndiyo wali na ine. Tora Mariko ndipo wize nayo, pakuti wakunovwira pa uteŵeti. 12 Kweni Tikiko+ namutuma ku Efeso. 13 Para ukwiza uniyeghere chakuvwara cha mphepo icho nkhachileka ku Trowa kwa Karapo, na mipukutu, chomenechomene yavikumba.

14 Alekizanda, uyo wakapanganga vinthu vyamkuŵa,* wakanichitira viheni vinandi chomene. Yehova* wazamumuwezgera kuyana na milimo yake.+ 15 Nawe uchenjere nayo, chifukwa wakasuska chomene uthenga withu.

16 Apo nkhajivikiliranga kakwamba, pakaŵavya munthu uyo wakaŵa nane, kweni wose ŵakanileka, uwu uleke kuŵa mulandu kwa iwo. 17 Kweni Fumu yikimilira pafupi nane ndipo yikanipa nkhongono, kuti kwizira mwa ine upharazgi uchitike mwakukwana kuti mitundu yose yipulike.+ Nkhathaskika ku mulomo wa nkhalamu.+ 18 Fumu yizamunithaska ku mulimo uliwose uheni ndipo yizamuniponoska na kunitolera ku Ufumu wake wakuchanya.+ Ndipo iyo yichindikike muyirayira swii. Ameni.

19 Unitawuzgireko Prisika na Akwila+ na ŵamunyumba ya Onesiforo.+

20 Erasito+ wakakhalira mu Korinte, kweni Tirofimo+ nkhamuleka kuti ni mulwari pa Mileto. 21 Yezga chomene kuti wize pambere nyengo ya chiwuvi yindize.

Yubulo wakukutawuzga, kweniso Pude, Lino, Kilaudiya, na ŵabali wose.

22 Fumu yiŵe nawe chifukwa cha mzimu uwo ukulongora. Lusungu lwake lukuru luŵe namwe.