KWA TITO

1 Ine Paulosi, muzga wa Chiuta na mpositole wa Yesu Khristu kuyana na chipulikano cha ŵakusoleka ŵa Chiuta. Nkhumanya makora unenesko wakukhwaskana na kusopa Chiuta mwakujipeleka, 2 ndipo ukujintha pa chigomezgo cha umoyo wamuyirayira+ uwo Chiuta uyo wakuteta yayi,+ wakalayizga kale chomene. 3 Kweni mu nyengo yake wakavumbura mazgu ghake kwizira mu upharazgi uwo nkhaŵikizgika+ kuyana na dango la Chiuta, Mponoski withu. 4 Nkhulembera iwe Tito, mwana wane mwenecho mu chipulikano icho tili nacho:

Mphanyi lusungu lukuru na mtende vyakufuma kwa Chiuta, Adada na Khristu Yesu Mponoski withu, vyaŵa nawe.

5 Nkhakuleka mu Kerete kuti unozge vinthu vyakubudika na kwimika ŵalara mu msumba na msumba, nga umo nkhakuphalilira kuti: 6 Mulara wakwenera kuŵa mwanalume wambura kafukwa, mfumu wa muwoli yumoza, uyo wali na ŵana ŵakugomezga awo ŵalije mulandu wa makhaliro ghaheni panji kugaluka.+ 7 Pakuti ni muteŵeti mulara wa Chiuta, mulaŵiliri wakwenera kuŵa wambura kafukwa, wakwendera vyake pera yayi,+ wakuthukira luŵiro yayi,+ muloŵevu yayi, wankhaza yayi, wakusanga chandulo munthowa yauryarya yayi. 8 Kweni waŵenge wakupokelera ŵalendo,+ wakutemwa uwemi, wamahara,+ murunji, wakugomezgeka,+ na wakujikora.+ 9 Waŵenge munthu wakukoleska mazgu ghakugomezgeka* na kusambizga mwaluso,+ mwakuti wachiske* na chisambizgo chaunenesko*+ kweniso kuchenya+ awo ŵakususka.

10 Chifukwa pali ŵanalume ŵanandi ŵakugaluka, ŵakuyowoya vyambura fundo, na ŵakupusika, chomene awo ŵakukosera pa ukotoli.+ 11 Ntchakwenelera kujara milomo yawo, chifukwa ŵanalume aŵa ŵakunanga mbumba zamsuma pakusambizga vinthu ivyo ŵakwenera yayi kusambizga kuti ŵasange chandulo munthowa yauryarya. 12 Yumoza wawo uyo ni ntchimi yawo, wakati: “Ŵakerete mbatesi nyengo zose, ni vikoko vyakuparanya, mbankharye* ŵakata.”

13 Ukaboni uwu ngwaunenesko. Pa chifukwa ichi, ulutilire kuŵachenya chomene kuti ŵaŵe ŵakukhora mu chipulikano. 14 Ŵaleke kuŵika mahara ku vidokoni vya Ŵayuda na malango gha ŵanthu awo ŵakupatukako ku unenesko. 15 Vinthu vyose ni vyakutowa ku ŵanthu ŵakutowa.+ Kweni ku ŵakufipirwa na ŵambura chipulikano kulije chakutowa, chifukwa maghanoghano ghawo na njuŵi zawo, vyose ni vyakufipirwa.+ 16 Ŵakuzomera pakweru kuti ŵakumanya Chiuta, kweni ŵakumukana na milimo yawo,+ chifukwa mbanyankhasi na ŵambura kupulikira, mbambura kwenelera mulimo uliwose uwemi.

2 Kweni iwe lutilira kuyowoya vinthu ivyo vikuyana na chisambizgo chaunenesko.*+ 2 Ŵanalume ŵalara ŵaŵenge ŵakujikora mu vyakuchita, ŵambura mawara, ŵamahara, ŵakukhora mu chipulikano, ŵachitemwa, na ŵakuzizipizga. 3 Ŵanakazi ŵalara nawo ŵaŵenge na nkharo yakwenelera ŵanthu ŵakusopa, ŵakusesa yayi, ŵazga ŵa vinyo yayi, ŵasambizgi ŵa ivyo ni viwemi, 4 mwakuti ŵasambizgenge* ntchembere kutemwa ŵafumu ŵawo, kutemwa ŵana ŵawo, 5 kuŵa ŵamahara, ŵatuŵa mu makhaliro, ŵagwirenge ntchito pa nyumba,* ŵawemi, ŵakujilambika ku ŵafumu ŵawo,+ mwakuti ŵanthu ŵaleke kuyowoyera uheni mazgu gha Chiuta.

6 Ntheura pera, lutilira kuchiska ŵanyamata kuti ŵaŵenge ŵamahara,+ 7 mu vyose ujilongore kuŵa chakuwonerapo cha milimo yiwemi. Usambizgenge vyanadi na mtima wose.+ 8 Mazgu ghako ghaŵenge ghaunenesko* ghambura kususkika,+ mwakuti awo ŵakususka ŵakhozgeke soni, ŵasoŵe chakuyowoya.*+ 9 Ŵazga ŵajilambikenge ku mabwana ghawo mu vinthu vyose,+ ŵaŵakondweskenge, ŵaleke kuŵachitira nkhwesa 10 nesi kuŵabira,+ kweni ŵalongore kugomezgeka, mwakuti mu vinthu vyose ŵatozge chisambizgo cha Chiuta, Mponoski withu.+

11 Chiuta walongora lusungu lwake lukuru kuti ŵanthu ŵa mitundu yose ŵaponoskeke.+ 12 Lusungu lwake lukutisambizga kuti tikane nkharo iyo yikususkana na khumbo la Chiuta kweniso kukana makhumbiro ghacharu,+ kuti tiŵenge ŵamahara, ŵarunji na ŵakujipeleka pakusopa Chiuta mu nyengo iyi.*+ 13 Tichite ivi apo tikulindilira chigomezgo chakukondweska+ na kuwoneka kwauchindami kwa Chiuta mukuru na kwa Mponoski withu, Yesu Khristu, 14 uyo wakajipeleka kuti watifwature*+ ku mtundu uliwose wa uchikanamalango na kutitozga kuti tiŵe ŵanthu ŵake ŵapadera, ŵakujipeleka pa milimo yiwemi.+

15 Lutilira kuyowoya vinthu ivi, kuchiska,* na kuchenya na mazaza ghose.+ Paŵavye munthu wakudelere.

3 Lutilira kuŵakumbuska kuti ŵajilambikenge na kupulikira maboma na ŵamazaza,+ ŵaŵenge ŵakunozgeka kuchita mulimo uliwose uwemi. 2 Ŵangayowoyeranga munthu waliyose viheni yayi, ŵamphindano yayi, kweni ŵaŵenge ŵakupulikiska,+ ŵalongorenge kuzika ku ŵanthu wose.+ 3 Pakuti kale nase tikaŵa ŵambura mahara, ŵambura kupulikira, ŵakupuluskika, ŵazga ŵa makhumbiro ghakupambanapambana na vyakusanguluska, tikachitanga viheni na bina, tikaŵa ŵakunyanyisa, ndipo tikatinkhananga.

4 Kweni Chiuta Mponoski withu wakati walongora lusungu+ na chitemwa ku ŵanthu 5 (chifukwa cha milimo yaurunji iyo tikachita yayi,+ kweni chifukwa cha lusungu lwake),+ wakatiponoska chifukwa wakatigeziska na kutitolera ku umoyo+ ndipo wakatizgora ŵaphya kwizira mu mzimu utuŵa.+ 6 Wakatipungulira mzimu uwu mwawanangwa* kwizira mwa Yesu Khristu Mponoski withu,+ 7 mwakuti para tapimika ŵarunji chifukwa cha lusungu lwake lukuru,+ tiŵe ŵahaliri+ kuyana na chigomezgo cha umoyo wamuyirayira.+

8 Mazgu agha ngakugomezgeka, ndipo nkhukhumba kuti ulutilire kudidimizgapo vinthu ivi, mwakuti awo ŵagomezga Chiuta ŵakoleske milimo yiwemi. Vinthu ivi ni viwemi na vyachandulo ku ŵanthu.

9 Kweni unganjilirangapo yayi pa mphindano zauchindere, kujimana mikoka, kupindana na kulimbana chifukwa cha Dango, pakuti ni vyambura chandulo na vyawaka.+ 10 Munthu uyo wakwambiska kugaluka,+ umukane+ para wamuchenjezga* kakwamba na kachiŵiri,+ 11 pakumanya kuti munthu wanthena wapatuka mu nthowa, ngwakwananga ndipo wakujisuska yekha.

12 Para nakutumira Aritema panji Tikiko,+ yezga chomene kuti uzakanisange ku Nikapoli, chifukwa ndiko naghanaghana kuti nkhakhale mu nyengo ya chiwuvi. 13 Zenasi, munthu wakumanya Dango, na Apolo uŵape vinthu vyakukhumbikwa mwakuti ŵaleke kusoŵa kanthu paulendo wawo.+ 14 Kweni ŵanthu ŵithu nawo ŵasambire kukoleska milimo yiwemi kuti ŵawovwirengepo para pawuka suzgo,+ mwakuti ŵaleke kuŵa ŵambura vipambi.+

15 Wose awo ŵali nane ŵakukutawuzga. Unitawuzgireko awo ŵakutitemwa mu chipulikano.

Lusungu lukuru luŵe namwe mose.