KALATA YAKWAMBA YA PETROSI

1 Ine Petrosi, mpositole+ wa Yesu Khristu, ku ŵalendo ŵambura kukhaliska, imwe muli kumbininikira ku Ponto, Galatiya, Kapadokiya,+ Asiya, na Bitiniya, ku ŵakusoleka 2 mwakuyana na kumanyirathu kwa Chiuta Adada,+ na kutuŵiskika mwa mzimu+ na khumbo lakuti muŵe ŵakupulikira, na kumijika na ndopa za Yesu Khristu:+

Mphanyi lusungu lukuru na mtende vyasazgikira kwa imwe.

3 Walumbike Chiuta, Wiske wa Fumu yithu Yesu Khristu, chifukwa mwakuyana na lusungu lwake lukuru, wakatipa kubabika kuphya+ kuti tiŵe na chigomezgo chamoyo+ kwizira mu chiwuka cha Yesu Khristu ku ŵakufwa,+ 4 kuti tiŵe na chiharo chambura kuvunda, kufipirwa ndiposo kutchujuka.+ Chiharo ichi chili kusungikira imwe kuchanya,+ 5 imwe mukusungika na nkhongono ya Chiuta kwizira mu chipulikano kuti muponoskeke. Chiponosko ichi chanozgekera kuzakavumbukwa mu nyengo zaumaliro. 6 Mukusekelera chomene chifukwa cha fundo iyi, nangauli sono mu nyengo yichoko waka mungaŵa na chitima chifukwa cha viyezgo vyakupambanapambana,+ 7 mwakuti kuyezgeka kwa chipulikano chinu,+ icho ntchakuzirwa chomene kuluska golide ilo likunangika nangauli likuyezgeka* na moto, chiŵe chifukwa chakupelekera malumbo na uchindami na ntchindi pakuvumbukwa kwa Yesu Khristu.+ 8 Nangauli mundamuwonepo, kweni mukumutemwa. Nangauli pasono mukumulaŵiska yayi, kweni muli na chipulikano mwa iyo ndipo mukusekelera chomene na chimwemwe chikuru chambura mayowoyeko, 9 apo mukupokera chiponosko chinu,* iyo ni njombe ya chipulikano chinu.+

10 Pakuyowoya za chiponosko ichi, ntchimi izo zikachima vya lusungu lukuru, ulo lukenera kwiza kwa imwe, zikafumbilira na kusanda makora.+ 11 Zikalutilira kupenjerezga ivyo vizamuchitika kweniso nyengo iyo mzimu uwo ukaŵa mwa izo ukalongoranga vya Khristu.+ Mzimu uwu ukapanikizgiranga pambere nyengo yindafike, kuti Khristu wazamusuzgika+ ndipo pamanyuma wazamupokera uchindami. 12 Kukavumbukwa ku ntchimi izi kuti zikajiteŵeteranga zekha yayi kweni zikamuteŵeteraninge. Zikayowoyanga vinthu ivyo sono vyapharazgika kwa imwe kwizira mwa awo ŵakamupharazgirani makani ghawemi mwakovwirika na mzimu utuŵa uwo ukatumizgika kufuma kuchanya.+ Mu vinthu ivi, ŵangelo ŵakukhumba chomene kulingizgamo.

13 Ntheura vwarani zikhore mu maghanoghano ghinu kunozgekera ntchito.+ Sungilirani chomene maghanoghano ghinu.+ Ŵikani chigomezgo chinu pa lusungu lukuru ulo muzamupokera pakuvumbukwa kwa Yesu Khristu. 14 Pakuŵa ŵana ŵakupulikira, lekani kulondezga* makhumbiro agho kale mukaŵa nagho kwambura kumanya. 15 Kweni mwakuyana na Mutuŵa uyo wakamuchemani, namwe muŵe ŵatuŵa mu makhaliro ghinu ghose.+ 16 Pakuti kuli kulembeka kuti: “Muŵenge ŵatuŵa, chifukwa ine nili mutuŵa.”+

17 Ndipo usange mukuchema Adada awo ŵakweruzga kwambura kutemwera+ mwakuyana na mulimo wa waliyose, muchitenge vinthu na wofi+ mu nyengo iyo mukukhala nga mbalendo. 18 Imwe mukumanya kuti siliva panji golide, vinthu ivyo vikunangika, vikamufwaturani* yayi+ ku makhaliro ghinu ghawakawaka agho mukapokera ku ŵasekuru ŵinu. 19 Kweni mukawomboleka na ndopa zakuzirwa,+ nga ni ndopa za mwana wa mberere+ wambura kalema ndiposo wambura kabanga, za Khristu.+ 20 Mbunenesko kuti wakamanyikwirathu pambere charu chindaŵeko,+ kweni wakawoneka paumaliro wa zinyengo chifukwa cha imwe.+ 21 Kwizira mwa iyo mukugomezga Chiuta,+ uyo wakamuwuska ku ŵakufwa+ na kumupa uchindami,+ mwakuti chipulikano chinu na chigomezgo viŵe mwa Chiuta.

22 Sono pakuti mwajitozga* mwa kupulikira unenesko, lekani mukutemwa ŵabali kwambura upusikizgi,+ ntheura mutemwanenge chomene kufumira mu mtima.+ 23 Pakuti mwapika kubabika kuphya,+ na mbuto iyo yikuvunda yayi, kweni na mbuto yambura kuvunda,+ kwizira mu mazgu gha Chiuta wamoyo na wakukhalilira.+ 24 Chifukwa “ŵanthu wose ŵali nga mbutheka, ndipo uchindami wawo wose uli nga ni luŵa lamuthondo. Utheka ukufota, ndipo luŵa likulakata, 25 kweni mazgu gha Yehova* ghakukhalilira muyirayira.”+ Ndipo agha ni “mazgu,” agho ghapharazgika kwa imwe nga ni makani ghawemi.+

2 Ntheura wuskaniko uheni wose,+ uryarya wose, upusikizgi, bina, na mtundu wose wa kusesa. 2 Nga mbabonda ŵakubabika sono,+ nwekerani mkaka wambura kusungunura* wa mazgu, mwakuti kwizira mu mkaka uwu, mukure kufika ku chiponosko,+ 3 pakuti mwacheta* kuti Fumu njalusungu.

4 Apo mukwiza kwa iyo, uyo ni libwe lamoyo, ilo ŵanthu ŵakalikana,+ kweni ndakusoleka na lakuzirwa kwa Chiuta,+ 5 imwe namwe pakuŵa malibwe ghamoyo, mukuzengeka kuŵa nyumba yauzimu+ kuti muŵe ŵasembe* ŵatuŵa, mwakuti mupelekenge sembe zauzimu+ zakuzomerezgeka kwa Chiuta kwizira mwa Yesu Khristu.+ 6 Pakuti Lemba likuti: “Wonani, nkhuŵika libwe mu Ziyoni, libwe lakusoleka, libwe lakuzirwa lapakona pa fawundeshoni, ndipo waliyose uyo wakupulikana mwa ilo wakhuŵarenge* yayi.”+

7 Ntheura ndakuzirwa kwa imwe, chifukwa chakuti muli ŵakugomezga. Kweni ku awo ŵakugomezga yayi, “libwe ilo ŵakuzenga ŵakalikana+ lazgoka libwe lakuzirwa la pakona”*+ 8 na “libwe lakukhuŵazga kweniso jalawe lakuwiska.”+ Aŵa ŵakukhuŵara chifukwa chakuti ŵakupulikira yayi mazgu. Ŵimikika chifukwa cha umaliro uwu. 9 Kweni imwe ndimwe “mtundu wakusoleka, ŵasembe na mafumu,* mtundu utuŵa,+ ŵanthu awo ŵakwenera kuŵa ŵapadera,+ kuti mupharazge kutali makhaliro ghapachanya”*+ gha uyo wakamuchemani kufuma mu chisi kwiza ku ungweru wake wakuzizwiska.+ 10 Pakuti nyengo yinyake mukaŵa ŵanthu yayi, kweni sono muli ŵanthu ŵa Chiuta.+ Mukaŵa ŵanthu ŵambura kulongoreka lusungu, kweni sono mwalongoreka lusungu.+

11 Ŵakutemweka, nkhumuchiskani nga mbalendo na ŵambura kukhaliska mu charu+ kuti muziŵizgenge makhumbiro gha thupi+ agho ghakulimbana namwe.+ 12 Sungilirani makhaliro ghinu ghawemi pakati pa mitundu,+ mwakuti para ŵakumunenani kuti mukuchita uheni, ŵapeleke uchindami kwa Chiuta mu zuŵa lake ilo wazamwendera, chifukwa cha milimo yinu yiwemi+ iyo iwo mbakaboni ŵakuwona na maso.

13 Chifukwa cha Fumu, jilambikani ku wose awo ŵali na mazaza,+ kwali nkhwa themba+ pakuŵa mulara 14 panji ku ŵakazembe awo ŵakutumika na iyo kuti ŵalange awo ŵakuchita uheni, kweni kulumba awo ŵakuchita uwemi.+ 15 Pakuti ili ndilo khumbo la Chiuta, kuti mwa kuchita uwemi, muchetamiske* kayowoyero kawakawaka ka ŵanthu ŵazeleza.+ 16 Muŵe ŵanthu ŵanangwa,+ kweni wanangwa winu uleke kuŵa chakubisira uheni,+ kweni muchitenge nga mbazga ŵa Chiuta.+ 17 Chindikani ŵanthu ŵa mtundu uliwose,+ mutemwenge ŵabali wose,+ mopenge Chiuta,+ muchindikenge themba.+

18 Ŵateŵeti ŵajilambikenge kwa mabwana ghawo na wofi wose wakwenelera,+ kwa awo mbawemi na ŵakupulikiska pera yayi, kweniso kwa awo mbakusuzga kuŵakondweska. 19 Ntchiwemi usange munyake wakuzizipizga vyakuŵinya na kusuzgika kwambura chifukwa kuti waŵe na njuŵi yiwemi kwa Chiuta.+ 20 Kasi pali uwemi wuli usange mukuzizipizga kutimbika chifukwa chakuti mukunanga?+ Kweni ntchiwemi kwa Chiuta usange mukuzizipizga masuzgo chifukwa chakuti mukuchita viwemi.+

21 Nakuti ichi ndicho mukachemekera, chifukwa nanga ni Khristu wakasuzgika chifukwa cha imwe,+ wali kumulekerani chakuwonerapo kuti mulondezgenge mendero ghake mwakugomezgeka.+ 22 Wakachitapo kwananga yayi,+ nesi upusikizgi ukasangikamo mu mulomo wake yayi.+ 23 Apo wakatukikanga,+ wakawezgera kutuka yayi.+ Apo wakayuzgikanga,+ wakafingiranga yayi, kweni wakajipeleka kwa uyo wakweruzga+ mwaurunji. 24 Iyo wakayegha zakwananga zithu+ mu thupi lake pa khuni,+ mwakuti tifwe ku zakwananga na kuŵa ŵamoyo kuti tichitenge urunji. Ndipo “mukachizgika na vilonda vyake.”+ 25 Pakuti mukaŵa nga ni mberere zakupuluka,+ kweni sono mwawelera kwa muliska+ na mulaŵiliri wa umoyo winu.

3 Mwakuyana waka, imwe ŵawoli, mujilambikenge ku ŵafumu ŵinu,+ mwakuti usange ŵanyake mbambura kupulikira mazgu, ŵawojeke kwambura mazgu kwizira mu makhaliro gha ŵawoli ŵawo,+ 2 chifukwa cha kuŵa ŵakaboni ŵakuwona na maso makhaliro ghinu ghatuŵa+ pamoza na ntchindi zikuru. 3 Ndipo kujitozga kwinu kuleke kuŵa kwa kuwaro, kuluka sisi, kuvwara vitoweskero vyagolide+ panji kuvwara malaya ghakudura, 4 kweni kuŵe kwa munthu wakubisika wa mu mtima mu chakuvwara chambura kwanangika cha mzimu wakufwasa na wakuzika,+ uwo ngwakuzirwa chomene pamaso pa Chiuta. 5 Pakuti ndimo kale ŵanakazi ŵatuŵa awo ŵakagomezganga Chiuta ŵakajitozgeranga. Ŵakajilambikanga ku ŵafumu ŵawo, 6 nga umo Sara wakapulikiranga Abrahamu, wakamuchemanga fumu.+ Ndipo imwe mwazgoka ŵana ŵake, chikuru mukulutilira kuchita viwemi na kuleka kopa chilichose.+

7 Mwakuyana waka, imwe ŵafumu lutilirani kuŵamanya makora* ŵawoli ŵinu. Muŵapenge ntchindi+ ŵanakazi nga ntchiŵiya chambura kukhora, mwakuti malurombo ghinu ghaleke kujandizgika. Pakuti nawo ŵazamuhara+ chawanangwa chikuru cha umoyo pamoza na imwe.

8 Paumaliro, imwe mose muŵe ŵakuyana maghanoghano,+ ŵakulengerana chitima,+ ŵakutemwa ŵabali, ŵa mtima wa chiwuravi, na ŵakujiyuyura.+ 9 Lekani kuwezgera uheni pa uheni,+ nesi kutuka pa kutuka.+ Kweni mutumbikenge ŵanthu,+ chifukwa Chiuta wakamuchemani kuti mutumbikenge ŵanthu mwakuti muzakahare thumbiko.

10 Pakuti “uyo wakukhumba kukondwa na umoyo na kuwona mazuŵa ghawemi, wawezgeko lulimi lwake ku icho ntchiheni+ ndipo milomo yake yileke kuyowoya upusikizgi. 11 Wapatukeko ku viheni+ na kuchita viwemi.+ Wapenje mtende na kuwulondezga.+ 12 Chifukwa maso gha Yehova* ghali pa ŵarunji, ndipo makutu ghake ghakupulikizga maŵeyelero ghawo,+ kweni chisko cha Yehova* chikususkana na awo ŵakuchita viheni.”+

13 Ni njani uyo wangamupwetekani usange mukulimbikira kuchita viwemi?+ 14 Nanga musuzgike chifukwa cha urunji, muŵenge ŵakukondwa.+ Kweni lekani kopa chinthu icho iwo ŵakopa,* nesi kwenjerwa nacho.+ 15 Zomerezgani mu mitima yinu kuti Khristu ni Fumu kweniso kuti ni mutuŵa. Nyengo zose muŵe ŵakunozgeka kujivikilira panthazi pa waliyose uyo wakukhumba kumanya chigomezgo icho muli nacho. Kweni muchitenge nthena mwakuzika+ ndiposo na ntchindi zikuru.+

16 Lutilirani kuŵa na njuŵi yiwemi,+ mwakuti para ŵakumunenani pa chilichose, awo ŵakumunenani ŵakhozgeke soni+ chifukwa cha makhaliro ghinu ghawemi pakuŵa ŵalondezgi ŵa Khristu.+ 17 Pakuti usange Chiuta wazomerezga, ntchiwemi kuti musuzgike chifukwa chakuti mukuchita viwemi,+ kuluska kuti musuzgike chifukwa chakuti mukuchita viheni.+ 18 Pakuti Khristu wakafwira zakwananga kamoza pera.+ Munthu murunji wakafwira ŵambura urunji,+ mwakuti wamulongozgerani kwa Chiuta.+ Wakakomeka mu thupi,+ kweni wakazgoka wamoyo mu mzimu.+ 19 Ntheura wakaluta na kukapharazga ku mizimu iyo yili mu jele,+ 20 iyo yikaŵa yambura kupulikira apo Chiuta wakalindilira mwakuzikira* mu mazuŵa gha Nowa,+ apo chingalaŵa chikapangikanga,+ icho chikaponoska ŵanthu ŵachoko waka pa maji,+ ŵanthu aŵa ŵakaŵa 8.

21 Ubatizo ndiwo ukuyana na ichi, uwo ukumuponoskani sono, (kuwuskako malikho gha thupi yayi, kweni kulomba njuŵi yiwemi kwa Chiuta),+ kwizira mu chiwuka cha Yesu Khristu. 22 Iyo wali kuluta kuchanya, wali ku woko lamalyero la Chiuta.+ Ndipo ŵangelo na ŵamazaza na ŵankhongono ŵali pasi pake.+

4 Khristu wakasuzgika mu thupi,+ namweso muvware zikhore mu maghanoghano ghinu, chifukwa munthu uyo wasuzgika mu thupi waleka zakwananga,+ 2 mwakuti nyengo iyo yakhalako ya umoyo wake, waleke kulondezgaso makhumbiro gha ŵanthu,+ kweni khumbo la Chiuta.+ 3 Pakuti nyengo iyo yajumpha yikaŵa yakukwana kwa imwe kuchitira makhumbiro gha ŵamitundu.+ Mukachitanga milimo ya ukwakwa,* makhumbiro ghaheni, kumwa vinyo mwakujumphizga, kwenda mu viphikiro ivyo mukuŵa vyongo, kuphalizgana pa kumwa, na kusopa vikozgo kwaunyankhasi.+ 4 Ŵakuzizwa kuti mwaleka kuchimbira nawo lumoza mu nthowa ya makhaliro ghaheni, ndipo ŵakumunenani.+ 5 Kweni ŵanthu aŵa, ŵazamupatawura kwa uyo ngwakunozgeka kweruzga ŵamoyo na ŵakufwa.+ 6 Lekani makani ghawemi ghakapharazgika na ku ŵakufwa wuwo,+ mwakuti ŵakweruzgika mwakuyana na thupi umo ŵanthu ŵakuwonera, kweni ŵaŵe ŵamoyo mwakukolerana na mzimu umo Chiuta wakuwonera.

7 Umaliro wa vinthu vyose waneng’enera. Ntheura muŵe ŵamahara,+ ndipo muŵe maso pa nkhani ya kulomba.+ 8 Kuluska vyose mutemwanenge chomene,+ chifukwa chitemwa chikubenekelera zakwananga zinandi.+ 9 Mupokeleranenge kwambura kudinginyika.+ 10 Mwakuyana na umo waliyose wali kupokera chawanangwa, muteŵeteranenge nacho pakuŵa ŵateŵeti ŵalara ŵawemi ŵa lusungu lukuru lwa Chiuta, lwakulongoreka munthowa zakupambanapambana.+ 11 Usange munyake wakuyowoya, wayowoyenge mazgu ghakupatulika gha Chiuta. Usange munyake wakuteŵeta, pakuteŵeta wagomezgenge nkhongono izo Chiuta wakupeleka,+ mwakuti mu vinthu vyose, Chiuta wachindikike+ kwizira mwa Yesu Khristu. Uchindami na nkhongono ni vyake muyirayira swii. Ameni.

12 Ŵakutemweka, mungazizwanga usange mukukumana na viyezgo ivyo vili nga ni moto pakati pinu,+ nga ni para chinthu chachilendo chikumuchitikirani. 13 Kweni musekelerenge+ chifukwa mukusuzgika nga umo Khristu wakasuzgikira,+ mwakuti muzakasekelereso na chimwemwe chikuru apo wazamuwonekera mu uchindami wake.+ 14 Usange mukutombozgeka* chifukwa cha zina la Khristu, ndimwe ŵakukondwa+ chifukwa mzimu wa uchindami, uwo ni mzimu wa Chiuta, ukukhala pa imwe.

15 Paŵavye yumoza wa imwe wasuzgike chifukwa chakuti wakukoma ŵanthu panji ni munkhungu panji wakuchita uheni panji wakunjilirapo pa nkhani zaŵene.+ 16 Kweni usange munthu wakusuzgika chifukwa chakuti ni Mkhristu, waleke kukhozgeka soni,+ kweni walutilire kupeleka uchindami kwa Chiuta na kulondezga Khristu. 17 Chifukwa iyi ni nyengo yakutemeka kuti cheruzgo chambe pa nyumba ya Chiuta.+ Sono usange chikwamba pa ise,+ kasi umaliro wa awo ŵakupulikira yayi makani ghawemi gha Chiuta, uzamuŵa wuli?+ 18 “Usange munthu murunji wakuponoskeka mwakusuzgikira, kasi chizamuchitika ntchivichi kwa munthu wambura kopa Chiuta na wakwananga?”+ 19 Ntheura awo ŵakusuzgika chifukwa cha khumbo la Chiuta, ŵajiŵikizge* kwa Mlengi wakugomezgeka, uku ŵakuchita uwemi.+

5 Pakuti ndine mulara munyinu kweniso kaboni wa visuzgo vya Khristu ndiposo yumoza wa awo ŵazamupokera uchindami uwo uzamuvumbukwa,+ nkhupempha* ŵalara pakati pinu kuti: 2 Liskani mskambo wa Chiuta+ uwo uli mu mawoko mwinu. Muteŵetere nga mbalaŵiliri, mwakuchichizgika yayi, kweni muteŵetenge mwakukhumbisiska pamaso pa Chiuta.+ Mungakhumbanga kusanga chandulo munthowa yauryarya yayi,+ kweni muteŵetenge na mtima wose. 3 Kuchita ufumu yayi pa awo ntchiharo cha Chiuta,+ kweni muŵenge vyakuwonerapo ku mskambo.+ 4 Ndipo para muliska mukuru+ wazakawoneka, muzamupokera mphumphu ya uchindami yambura kufota.+

5 Mwakuyana waka, imwe ŵanyamata mujilambikenge ku ŵanalume ŵalara.*+ Kweni imwe mose mujivwalike mtima wa kujiyuyura, chifukwa Chiuta wakususka ŵakujikuzga, kweni ŵakujiyuyura wakuŵapa lusungu lukuru.+

6 Ntheura, jiyuyurani pasi pa woko lankhongono la Chiuta, mwakuti wamukwezgani mu nyengo yakwenelera.+ 7 Muthulirani vyose ivyo mukwenjerwa navyo,+ chifukwa wakumupwelelerani.+ 8 Sungilirani maghanoghano ghinu, muŵe maso.+ Mulwani winu Dyabulosi wakuyingayinga nga ni nkhalamu yakuwuluma, wakupenja munthu wakuti wamumilimitizge.*+ 9 Kweni mikanani nayo,+ muŵe ŵakukhora mu chipulikano, pakumanya kuti visuzgo vyakuyana waka vikuŵachitikira ŵabali ŵinu wose awo ŵali mu charu.+ 10 Kweni para mwasuzgikapo kanyengo, Chiuta uyo wakupeleka lusungu lukuru mu nthowa zose, uyo wakamuchemerani ku uchindami wake wamuyirayira+ mwa Khristu, wazamumalizga kumusambizgani. Wazamumukhozgani,+ wazamumuzgorani ŵankhongono+ kuti muleke kusunkhunyika. 11 Kwa iyo kuŵenge nkhongono muyirayira. Ameni.

12 Kwizira mwa Silivano,*+ uyo nkhumuwona kuti ni mubali wakugomezgeka, namulemberani mazgu ghachoko waka, kuti nimukhozgani na kumupani ukaboni waunenesko wakuti ili ndilo ni lusungu lukuru lwa Chiuta. Mukoleske lusungu ulu. 13 Mwanakazi wakusoleka nga ndimwe, uyo wali mu Babuloni, wakumutawuzgani pamoza na mwana wane Mariko.+ 14 Tawuzganani na mufyofyontho wa chitemwa.

Mose imwe mukulondezga Khristu muŵe na mtende.