KALATA YACHIŴIRI YA PETROSI

1 Ine Simoni Petrosi, muzga na mpositole wa Yesu Khristu, ku awo ŵasanga chipulikano chakuzirwa icho chikuyana na chithu kwizira mu urunji wa Chiuta withu na Mponoski Yesu Khristu:

2 Mphanyi lusungu lukuru na mtende vyasazgikira kwa imwe para mwamumanya makora+ Chiuta na Yesu Fumu yithu. 3 Pakuti nkhongono za Chiuta zatipa* vinthu vyose vyakukhumbikwa pa umoyo na pakusopa Chiuta mwakujipeleka. Tapokera ivi chifukwa cha kumanya makora uyo wakatichema+ mu uchindami wake na mu makhaliro ghake ghawemi. 4 Kwizira mu vinthu ivi, watipa malayizgo ghakuzirwa na ghakuru chomene,+ mwakuti kwizira mu vinthu ivi namwe muŵe na mikhaliro ya Chiuta,+ mwati mwapona ku makhaliro ghakuvunda agho ghali mu charu, agho ghakwamba na makhumbiro ghaheni.

5 Pa chifukwa ichi, fwiliranipo chomene+ kusazgako ku chipulikano chinu makhaliro ghawemi,+ ku makhaliro ghinu ghawemi kumanya,+ 6 ku kumanya kwinu kujikora, ku kujikora kwinu+ kuzizipizga, ku kuzizipizga kwinu kusopa Chiuta mwakujipeleka,+ 7 ku kusopa Chiuta mwakujipeleka kutemwa ŵabali, ku kutemwa ŵabali chitemwa.+ 8 Chifukwa usange vinthu ivi vilimo mwa imwe na kufuluka, vimovwiraninge kuti muleke kukhala waka, panji kuŵa ŵambura vipambi+ kuyana na kumanya makora Fumu yithu Yesu Khristu.

9 Usange munthu walije vinthu ivi, ngwachibulumutira. Wakujara maso ghake kuti waleke kuwona ungweru,+ ndipo waluwa kuti wakatozgeka ku zakwananga zake+ zakale. 10 Pa chifukwa ichi, ŵabali, limbikirani chomene kuti kuchemeka+ na kusoleka kwinu kuŵe kwanadi. Pakuti usange mukulutilira kuchita vinthu ivi, muzamutondeka yayi.+ 11 Kweniso muzamutumbikika chomene na kunjira mu Ufumu wamuyirayira+ wa Fumu yithu na Mponoski Yesu Khristu.+

12 Pa chifukwa ichi, niŵenge wakunozgeka nyengo zose kumukumbuskani vinthu ivi, nangauli mukuvimanya kale ndipo mwakoleska unenesko uwo muli nawo. 13 Kweni nkhuwona kuti ntchakwenelera kumukumbuskani,+ apo nichali mu chihema*+ ichi, 14 pakuti nkhumanya kuti chihema chane chili pafupi kuwuskikapo, nga umo Fumu yithu Yesu Khristu nayo yikanilongolera.+ 15 Nyengo zose niyezgenge kuchita chilichose kuti para naluta, imwe muzakakumbuke* vinthu ivi.

16 Pakumumanyiskani za nkhongono na kuŵapo kwa Fumu yithu Yesu Khristu, tikalondezga nkhani zautesi zakwatika mwaluso yayi, kweni tikaŵa ŵakaboni awo ŵakawona na maso vya ukuru wake.+ 17 Pakuti wakapokera ntchindi na uchindami kwa Chiuta Adada. Ivi vikachitika apo mweneko wa uchindami ukuru wakamuphalira kuti: “Uyu ni Mwana wane wakutemweka, uyo nkhukondwa nayo.”+ 18 Enya, ise tikapulika mazgu agha kufuma kuchanya apo tikaŵa nayo mu phiri lituŵa.

19 Ntheura tili na mazgu gha uchimi ghakugomezgeka chomene, ndipo mukuchita makora kuŵikako mahara nga nkhu nyali+ iyo yikuŵala mu malo gha chisi mu mitima yinu, (m’paka matandakucha, ndipo thondwe+ likwere.) 20 Pakuti mukumanya kuti palije uchimi wa Lemba uwo ukufuma mu maghanoghano gha munthu. 21 Chifukwa nanga nkhamoza, uchimi undizepo na khumbo la munthu,+ kweni ŵanthu ŵakayowoyanga vyakufuma kwa Chiuta pakulongozgeka na mzimu utuŵa.+

2 Kweni zikaŵako ntchimi zitesi pakati pa ŵanthu, nga umo kuŵirengeso ŵasambizgi ŵatesi pakati pinu.+ Mwachibisibisi, aŵa ŵazamwambiska magulu ghakugaluka, agho ghazamuparanya chipulikano chinu ndipo ŵazamukana nanga ni uyo wakaŵagura.+ Ŵazamujichemera pharanyiko la mwaluŵiro. 2 Kweniso ŵanandi ŵazamulondezga milimo yawo ya ukwakwa,*+ ndipo chifukwa cha aŵa nthowa ya unenesko yizamuyowoyereka uheni.+ 3 Chifukwa cha uryezi, ŵazamumuzgelerani na mazgu ghakupuluska. Kweni iwo ŵakulindilira cheruzgo cha papo kale+ icho chikuchedwa yayi, ndipo pharanyiko lawo likusiwa yayi.+

4 Chiuta wakaleka yayi kulanga ŵangelo awo ŵakananga,+ kweni wakaŵaponya mu Tatarasi,*+ na kuŵakaka mu* chisi chakofya kuti ŵasungike m’paka zuŵa la cheruzgo.+ 5 Nakuti wakaleka yayi kulanga charu chakale,+ kweni wakasungilira Nowa, mupharazgi wa urunji,+ na ŵanyake 7+ apo wakiza na chigumula pa charu cha ŵanthu ŵambura kopa Chiuta.+ 6 Wakalanga misumba ya Sodomu na Gomora na kuyizgora vyoto.+ Ichi chikaŵa chilongolero cha vinthu ivyo vizenge pa ŵanthu ŵambura kopa Chiuta.+ 7 Kweni wakathaska Loti,+ munthu murunji, uyo wakakweŵekanga chomene na nkharo ya ukwakwa* ya ŵanthu ŵakwananga. 8 Pakuti munthu murunji yura, zuŵa na zuŵa apo wakakhalanga pakati pawo, umoyo wake waurunji ukayuzgikanga chifukwa cha milimo yawo yiheni iyo wakawonanga na kupulika. 9 Yehova* wakumanya kuŵathaska ku chiyezgo ŵanthu awo ŵakumusopa mwakujipeleka,+ kweni ŵambura urunji wakuŵasungira zuŵa la cheruzgo kuti ŵazakaparanyike,*+ 10 chomene awo ŵakupenja kukazuzga mathupi gha ŵanyawo+ na kudelera ŵamazaza.*+

Ŵalije wofi, ŵakwendera vyawo, ŵakopa yayi kuyuyura awo Chiuta waŵachindika. 11 Kweni ŵangelo, nangauli ŵali na nkhongono chomene, ŵakuŵasuska na mazgu ghaheni yayi ŵasambizgi ŵatesi aŵa. Ŵangelo ŵakuchita nthena chifukwa ŵakuchindika Yehova.*+ 12 Kweni ŵanthu aŵa ŵali nga ni vinyama vyambura kughanaghana, ivyo mwakawiro vili kubabikira kukoleka na kuparanyika.+ Ŵakuyowoyera uheni vinthu ivyo ŵakuvimanya yayi. Ŵazamuparanyika chifukwa cha vyakuchita vyawo viheni. 13 Ŵakujipweteka ŵekha ndipo iyi yikuŵa njombe yawo ya vyakuchita vyawo viheni.

Ŵakuwona kuti ntchakukondweska kukhala mwakuzaya+ nyengo ya muhanya. Iwo ŵali nga ni mabanga na vilema, ŵakukondwa chomene kumupuluskani na visambizgo vyautesi apo ŵakurya namwe pamoza.+ 14 Ŵali na maso ghakuzura uleŵi,+ ndipo ŵakutondeka kuleka kwananga, nakuti ŵakukopa ŵanthu ŵambura kukhazikika. Mtima wawo uli kusambizgika uryezi. Mbana ŵakutembeka. 15 Ŵali kuyileka nthowa yakunyoloka ndipo ŵali kupuluka. Ŵalondezga nthowa ya Balamu,+ mwana wa Beyori, uyo wakatemwa kupokera njombe pa vinthu viheni,+ 16 kweni wakachenyeka chifukwa chakuti wakanangira dango.+ Mbunda iyo yikuyowoya yayi, yikayowoya na mazgu gha munthu, yikajandizga ntchimi yira ku nthowa yake yavifusi.+

17 Aŵa ni visimi vyambura maji, na nyakhuŵinda uyo wakuputa na mphepo yankhongono, ndipo chisi cha biii chikuŵalindilira.+ 18 Pakuti ŵakuyowoya mazgu ghakujilumba ghambura chandulo. Na makhumbiro gha thupi+ ndiposo nkharo yaukwakwa,* ŵakukopa awo ŵathaskika waka ku ŵanthu ŵakwananga.+ 19 Ŵakuŵalayizga wanangwa, uku iwo ŵeneko mbazga ŵa makhaliro ghaheni.+ Chifukwa yose uyo wathera kwa munyake wakuzgoka muzga wa uyo wamuthereska.*+ 20 Usange ŵanthu ŵaleka vyakufipiska vya charu+ chifukwa cha kumanya makora Fumu na Mponoski Yesu Khristu, kweni para ŵakuweleraso ku vinthu ivi na kuthereskeka, umaliro wawo ukuŵa uheni chomene kuluska pakwamba.+ 21 Mphanyi chikaŵa chiwemi kwa iwo kuleka kumanya makora nthowa ya urunji, kuluska kuti ŵayimanye makora na kupatukako ku dango lituŵa ilo ŵakapokera.+ 22 Ivyo mazgu gha ntharika yaunenesko ghakuyowoya vyaŵachitikira, ghakuti: “Ntcheŵe yawelera ku mawukuzi ghake, ndipo nkhumba iyo ŵanguyigeziska yawelera na kukavivira pa mathipa.”+

3 Ŵakutemweka, iyi ni kalata yachiŵiri iyo nkhumulemberani, ndipo nga ni mu kalata yakwamba, nkhumukumbuskani kuti mughanaghanenge makora,+ 2 na kukumbuka mazgu agho ghakayowoyeka kale* na ntchimi zituŵa kweniso dango la Fumu na Mponoski kwizira mu ŵapositole ŵinu. 3 Chakwamba manyani kuti mu mazuŵa ghaumaliro kwizenge ŵakugoska na kugoska kwawo, awo ŵazamulondezga makhumbiro ghawo.+ 4 Ŵazamuyowoya kuti: “Kasi kuŵapo kwake kwakulayizgika uku kuli nkhu?+ Chifukwa kufuma mu zuŵa ilo ŵasekuru ŵithu ŵakagonera tulo mu nyifwa, vinthu vyose vikulutilira nthena pera kufuma pa kwamba kwa chilengiwa.”+

5 Pakuti ŵakuzerezgera dala fundo iyi, yakuti kale kukaŵa machanya na charu chapasi icho chikatumphuka pachanya pa maji ndipo chikaŵa pakati pa maji na maji. Chikaŵako na mazgu gha Chiuta.+ 6 Ndipo vinthu ivi vikaparanya charu icho chikaŵako nyengo yira apo chikazura na maji.+ 7 Kweni na mazgu agha pera, machanya na charu chapasi ivyo viliko sono Chiuta wavisungira moto, ndipo visungikenge m’paka pa zuŵa la cheruzgo na la pharanyiko la ŵanthu ŵambura kopa Chiuta.+

8 Kweni ŵakutemweka, muleke kuzerezga fundo yakuti zuŵa limoza kwa Yehova* lili nga ni vyaka 1,000 ndipo vyaka 1,000 vili nga ni zuŵa limoza.+ 9 Yehova* wakuchedwa yayi na layizgo lake,+ nga umo ŵanthu ŵanyake ŵakuwonera kuti wakuchedwa. Kweni wakuzikira chifukwa cha imwe pakuti wakukhumba yayi kuti munyake waparanyike, kweni wakukhumba kuti wose ŵang’anamuke mtima.+ 10 Kweni zuŵa la Yehova*+ lizenge nga ni munkhungu.+ Mu zuŵa ili machanya ghazamufumapo luŵiro+ na mphomo yikuru. Vinthu ivyo vikupanga machanya na charu chapasi vizamotcha chomene na kusongonoka, ndipo charu chapasi na milimo iyo yilimo vizamuvumbukwa.+

11 Pakuti vinthu vyose ivi vizamusongonoka nthena, mughanaghanire mtundu wa ŵanthu uwo mukwenera kuŵa. Muŵe ŵanthu ŵa makhaliro ghatuŵa na kuchita milimo iyo yikulongora kuti mukusopa Chiuta mwakujipeleka, 12 uku nyengo zose mukulindilira na kukumbuka* kuŵapo kwa zuŵa la Yehova.*+ Pa zuŵa ili machanya ghazamuparanyika+ na moto, ndipo vinthu ivyo vikupanga machanya na charu chapasi vizamusongonoka chifukwa cha kotcha chomene. 13 Kweni kuli machanya ghaphya na charu chapasi chiphya ivyo tikulindilira kuyana na layizgo lake,+ ndipo mu ivi muzamukhala urunji.+

14 Ntheura ŵakutemweka, pakuti mukulindilira vinthu ivi, yezgani chomene kuti paumaliro, iyo wazakamusangani ŵambura kabanga na ŵambura kalema ndiposo mu mtende.+ 15 Kweniso, wonani kuzika mtima kwa Fumu yithu kuŵa chiponosko, nga umo Paulosi nayo, mubali withu wakutemweka, wakamulemberani kuyana na vinjeru ivyo wali kupika.+ 16 Wakayowoya za vinthu ivi, nga umo wakuchitiraso mu makalata ghake ghose. Kweni mu makalata agha, muli vinyake vyakusuzga kupulikiska, ivyo ŵambura kusambira na ŵambura kukhazikika ŵakubendezga, nga umo ŵakuchitiraso na Malemba ghanyake ghose, ndipo ŵakujichemera pharanyiko.

17 Ntheura, imwe ŵakutemweka, pakuti mukumanyirathu vinthu ivi, chenjerani kuti muleke kupuluskika pamoza nawo mu kwananga kwa ŵanthu ŵaheni ndiposo kuti mulutilire kuŵa ŵakukhora.*+ 18 Kweni lutilirani kukura mu lusungu lukuru kweniso mu kumanya Fumu na Mponoski Yesu Khristu. Kwa iyo kuŵe uchindami sono m’paka ku zuŵa lamuyirayira. Ameni.