Charu cha KAZAKHSTAN

ŴANTHU ŵa ku Kazakhstan ŵakutemwa kukhala umoyo wakwendakwenda. Ŵaliska ŵakulyeska viŵeto vyawo mu malo ghakupambanapambana kuyana na umo nyengo yiliri. Muchihanya ŵakusamira mu malo ghakukwera chifukwa mukuzizima. Para nyengo yakuzizima yafika, ŵakuweleraso mu malo ghakuthukira.

Ŵanthu ŵanyake mu charu ichi ŵakukhala mu misumba yisambazi. Ndipouli, mitheto, chakurya, na ivyo ŵakuluka vikulongora umoyo wakwendakwenda uwo ŵasekuru ŵawo ŵakakhalanga. Ŵanthu aŵa ŵakutemwa mapowemu na sumu izo ŵakwimba na vyakwimbira ivyo ŵakupanga ŵekha.

Ŵanthu awo ŵakutemwa kwendakwenda ŵakukhala mu tunyumba twakuchemeka yurts uto ŵakwenda nato. Ŵaliska ŵa viŵeto nawo ŵakutemwa tunyumba utu, apo awo ŵakukhala mu tawuni ŵakukhalamo para ŵali na vyakuchitika vyapadera. Tunyumba utu nthuwemi chomene kwa ŵanthu awo ŵiza kuzakawona malo. Mu tunyumba utu ndimo ŵanakazi ŵa ku Kazakhstan ŵakutemwa kulukira vinthu na kupanga makalipeti.

Mabanja agho ghakukhala ku mizi ghakuzirwiska chomene mahachi. Pali mazina pafupifupi 21 gha chiyowoyero cha Chikazakh agho ghakulongosora vya hachi, ndipo zina lililose lili na ng’anamuro lake. Paliso mazgu ghakujumpha 30 agho ghakulongosora mitundu ya mahachi. Para munthu wapika hachi nga ntchawanangwa wakukondwa chomene chifukwa hachi njakudura. Ŵanyamata ŵa ku mizi ŵakusambizgika kukwera hachi kufuma waka pa wanichi.

Ŵanthu ŵanandi ku Kazakhstan ŵakutemwa kurya nyama yambura kusazgako vyakunoweskera. Ŵanandi ku Kazakhstan ŵakutemwa kumwa mkaka wa hachi wakuchemeka koumiss. Nangauli ukuntchantchamira kweni nguwemi chomene ku thupi la munthu.

Ofesi ya Ŵakaboni ŵa Yehova mu charu ichi yikupokelera ŵanthu ŵanandi awo ŵiza kuzakawona malo.