Mafumbo Agho Kanandi Ghakufumbika na Ŵantu Ŵakukondweskeka

Usange Ciuta nkutemwa, kasi ncifukwa wuli iye wazomerezga uheni kucitika?

CIUTA wazomerezga uheni kucitika, ndipo ŵantu mamiliyoni ghanandi ŵakucitira dara uheni. Mwaciyerezgero, iwo ŵakurwa nkondo, ŵakutaya mabomba pa ŵana, ŵakunanga caru capasi, ndipo ŵakupangiska njala. Ŵantu mamiliyoni ghanandi ŵakukhweŵa hona ndipo ŵakurwara ntenda ya khansa, ŵakucita ureŵi ndipo ŵakutora matenda ghakupirana mwakugonana, ŵakuloŵera na moŵa ndipo ŵakurwara matenda ghakutupa ciŵindi ndiposo na ghanji ghanteura. Ŵantu ŵanteura aŵa kuti mwanadi ŵakukhumba kuti uheni wose ulekeke cara. Iwo ŵakukhumbikwira kuti ŵapokere cirango kuti uheni uwo umalirethu. Para iwo ŵakumana na soka cifukwa ca ivyo ŵakacita, ŵakwambaso kudandaura kuti, “Nanangaci ine?” Ndipo ŵakwamba kunena Ciuta, nga ndi umo pa Zintharika 19:3 pakuyowoyera: “Uzereza wa muntu ndiwo ukwananga umoyo wake, ndipo panyuma pake wakusungira FUMU cimpindikwa.” (The New English Bible) Ndipo para Ciuta walekeska kacitiro kawo kaheni, iwo ŵayambenge kudandaura kuti ŵapokeka wanangwa wawo wakuti ŵalutirizge na kacitiro kawo!

Cifukwa cikuru ico Yehova wazomerezgera uheni kucitika ncakuti wazgore lwavyo lwa Satana. Satana Diabolosi wakayowoya kuti Ciuta kuti wangaŵikapo ŵantu pa caru capasi awo ŵangaŵa ŵamagomezgeko kwa Iye panyengo yakuyezgeka cara. (Job 1:6-12; 2:1-10) Yehova wazomerezga Satana kuŵapo kuti lwavyo lwake luwoneke. (Exodus 9:16.) Satana wacali kurutirizga kwiziska masoka sono, kupatuska ŵantu kwa Ciuta, peneapo wakurutirizga na lwavyo lwake. (Civumbuzi 12:12) Ndipouli, Job wakagomezgeka. Yesu naye wakacita nteura pera. Ŵakristu ŵaunenesko ŵakugomezgekaso sono.—Job 27:5; 31:6; Mateyu 4:1-11; 1 Petros 1:6, 7.

Ningatemwa kugomezga kuti pazamuŵa paradiso pano pa caru capasi, peneapo ŵantu ŵazamukhala na umoyo kwamuyirayira, kweni kasi ici ncamacitiko nadi?

Mwakulingana na Baibolo, zgoro ndakuti enya. Kweni cingawoneka kuŵa cakusuzga kugomezga cifukwa ncakuti mtundu wa ŵantu wakhala mu uheni kwa virimika mahandiredi ghanandi. Yehova wakalenga caru capasi ndipo wakaphalira mtundu wa ŵantu kuti ucizuzge ico na ŵanarumi na ŵanakazi ŵarunji, ŵeneawo ŵangapwererera vyakumera na vinyama ivyo vilimo ndiposo kucisunga ico kuŵa cakutowa mu malo mwakucinanga. (Wonani mapeji 12 na 17.) Mu malo mwakuti Paradiso muweme uyo wakalayizgika walutilire kuŵako, ukhaliro wacitima uwo wuliko sono nguheni comene kuti wulutilire. Paradiso wazamutora malo gha uheni uwu.

Kasi ndi mwauli umo ningazgolera ŵantu awo ŵakuyuyura ndiposo awo ŵakuyowoya kuti Baibolo ndi vintanguni waka ndiposo ndambura kukoleranako na sayansi?

Kuŵa na cipulikano mu vilayizgo ivi kuti nkugomezga waka vintu vyambura ukaboni weneco cara. “Cipulikano cikufuma mu kupulika.” Mwakusambira Mazgu gha Ciuta, yunji wakuŵa wa vinjeru ndipo cipulikano cake cikukura.—Ŵaroma 10:17; Ŵahebere 11:1.

Vyakufukura pasi vyakukhwaskana na Baibolo vikuzomerezga unenesko wa mdauko wa Baibolo. Sayansi yaunenesko yikukoreranako na Baibolo. Fundo zakurondezgapo izi zikaŵa kale mu Baibolo pambere zikaŵa zindabowozgeke na nkhwanta za masambiro: vigaŵa ivyo caru cikajumpamo kuti ciŵe apo cili sono, fundo yakuti caru ncakuburungika, ndiposo kuti caru cikuneng’aneng’a mu mlengalenga pambura kantu, ndiposo kuti viyuni vikwendendeka uku na uku cifukwa ca kusinta kwa nyengo.—Genesis, cipaturo 1; Yesaya 40:22; Job 26:7; Yeremiya 8:7.

Kufunyilirika kwa Baibolo kukulongoreka kwizira mu maucimi agho ghafiskika kale. Daniel wakaroskerathu za kukura ndiposo kucepa kwa nkongo za vyaru vyankongono pacaru cose capasi, ndiposo wakapharaso za nyengo ya kwiza kwa Mesiya ndiposo za nyengo yake yakukomekera. (Daniel, vipaturo 2, 8; 9:24-27) Mazuŵa ghano, paliso maucimi ghanandi agho ghakufiskika, gheneagho ghakurongora kuti ghano ndi “mazuŵa gha ku umaliro.” (2 Timote 3:1-5; Mateyu, cipaturo 24) Cimanyisko cakuntazi canteura ici kuti cingamanyikwa kwizira mu nkongono za muntu cara. (Yesaya 41:23) Kuti musange cimanyisko cinandi, wonani mabuku gha Baibulo—Kodi Ndilo Mawu a Mulungu Kapena a Munthu? na Is There a Creator Who Cares About You?, ghakupharazgika na Watchtower Bible and Tract Society.

Kasi ndi mwauli umo ningasambilira kuzgora mafumbo ghakuzikika mu Baibolo?

Mukwenera kusambira Baibolo na kuranguruka pa ilo, ndipo mukweneraso kupempa mzimu wa Ciuta kuti wumurongozgani. (Zintharika 15:28; Luka 11:9-13) Baibolo likuti: “Usange yumoza wa imwe wakuperera vinjeru, warombe Ciuta, mweneuyo wakupa wose kwawanangwa, ndipo kuti wakutombozga cara; ndipo viti vipike kwa iyo.” (Yakobe 1:5) Mwakusazgirapo, paliso vyakovwira kusambilira Baibolo vyakuzirwa comene. Covwiro cakufumira ku ŵanji ncakuzirwaso comene, nga ndi umo Filipu wakawovwilira muntu wa ku Etiyopiya. (Milimo 8:26-35) Ŵakaboni ŵa Yehova ŵakucitiska masambiro gha Baibolo kwawanangwa na ŵantu ŵakukondweskeka mu nyumba zawo. Iŵani ŵakufwatuka mwa kuŵapempa kuti ŵasambire namwe.

Kasi ncifukwa wuli ico ŵantu ŵanandi ŵakususkira Ŵakaboni ŵa Yehova, ndiposo ncifukwa wuli ico ŵakunikanizgira kuti nisambire nawo lumoza?

Yesu wakasuskikanga peneapo wakapharazganga, ndipo iye wakayowoyaso kuti ŵarondezgi ŵake nawoso ŵazamususkika. Peneapo ŵanji ŵakakondweskeka na kasambizgiro ka Yesu, ŵanji ŵakasuska kuti: “Namweso mwapuruskika kasi? Ka walipo yumoza wa Ŵarara, panji wa Ŵafarisi, uyo wakupulikana nayo?” (Yohane 7:46-48; 15:20) Ŵantu ŵanandi awo ŵakumukanizgani kuti muleke kusambira na Ŵakaboni cingaŵa cifukwa cakuti ŵandaphalirike makora za iwo, panjiso cingaŵa cifukwa ca sanko. Sambirani na Ŵakaboni ndipo mukore mwekha unenesko usange cimanyisko cinu ca Baibolo cisazgikirenge panji cara.—Mateyu 7:17-20.

Ncifukwa wuli Ŵakaboni ŵakufikira ŵantu awo ŵali kale na cisopo cawo?

Mwakucita nteura, iwo ŵakurondezga ciyerezgero ca Yesu. Iye wakaruta ku Ŵayuda. Ŵayuda ŵakaŵa naco cisopo cawo, kweni mu ntowa zinandi, cisopo ico cikakoleranangako cara na Mazgu gha Ciuta. (Mateyu 15:1-9) Mitundu yose ya ŵantu yili na visopo vyakupambana-pambana, kwali ndi vya Cikristu panji cara. Ncintu cakuzirwa comene kuti ŵantu ŵaŵe na vigomezgo ivyo vikukoleranako na Mazgu gha Ciuta, ndipo kuyezgayezga uko Ŵakaboni ŵakucita pakuŵawovwira ŵantu kuti ŵacite mwanteura kukulongora pakweru citemwa ca pa mzengezgani.

Kasi Ŵakaboni ŵakugomezga kuti cisopo cawo cekha ndico ncaunenesko?

Muntu waliyose uyo wakuzirwiska cisopo wakwenera kukhorweskeka kuti wali mu cisopo caunenesko. Para ndi ntena cara ipo palije candulo cakuŵira mu cisopo ico. Ŵakristu ŵakuciskika kuti: “Pimani vintu vyose; koreskani ico nciweme.” (1 Ŵatesalonika 5:21) Waliyose wakwenera kusimikizgira kuti vigomezgo vyake vikukoleranako na Malemba, ici ncifukwa cakuti pali cipulikano cimoza pera caunenesko. Ŵaefeso 4:5 ŵakuzomerezga fundo iyi, iwo ŵakuphara kuti: “Fumu yimoza cipulikano cimoza, ubapatizo umoza.” Yesu wakakoleranako cara na kaghanaghaniro ako kazara sono kakuti pali ntowa ndiposo visopo vinandi vyeneivyo vikurongozgera ku ciponosko. Mu malo mwake iye wakayowoya kuti: “Cipata ncicoko, ntowa nayo njifinyi, iyo yikurata ku umoyo, ndipo mbacoko aŵo ŵakuyisanga.” Ŵakaboni ŵa Yehova ŵakugomezga kuti ŵacisanga cisopo caunenesko. Viŵenge nteura cara ipo ntena ŵakupenja cisopo cinyake.—Mateyu 7:14.

Kasi iwo ŵakugomezga kuti ndiwo ŵekha awo ŵazamuponoskeka?

Yayi. Ŵantu mamiliyoni awo ŵakaŵa ŵamoyo virimika mahandiredi ghanandi kunyuma uku, awo ŵakaŵa Ŵakaboni ŵa Yehova cara, ŵazamuwuskika na kuŵa na mwaŵi wakuŵaso ŵamoyo. Ŵantu ŵanandi awo sono mbamoyo ŵangatemwa kusambira unenesko na urunji pambere “suzgo yikuru” yindafike, ndipo ŵangazakaponeskeka. Mwakusazgirapo, Yesu wakayowoya kuti tingeruzgananga cara yumoza na munyake. Ise tikulaŵiska kuwalo; Ciuta wakulaŵiska mu mtima. Iye wakulaŵiska mwakulondora ndipo wakweruzga mwalusungu. Iye wimika Yesu kuti ndiye wapereke ceruzgo, kuti ise cara.—Mateyu 7:1-5; 24:21; 25:31.

Kasi ndi ndrama zilinga izo zikulindizgika kuperekeka na awo ŵakufika pa maungano gha Ŵakaboni ŵa Yehova?

Pakuyowoya za kupereka ndrama, mpostole Paulos wakayowoya kuti: “Muntu yose wapenge nga ndi umo waghanaghanira mu mtima wake; na kudonda cara, nesi na kukoserezgeka: cifukwa Ciuta wakutemwa uyo wakupa na kusangwa.” (2 Ŵakorinte 9:7) Mu Nyumba za Ufumu na pamalo ghakucitirapo ungano gha Ŵakaboni ŵa Yehova, pakuŵavya kusonkeska ndrama. Pakuŵa mabokosi agho waliyose wangatemwa kuŵikamo cakupereka. Pakuŵavya uyo wakumanya unandi wa vyakupereka ivyo ŵanji ŵapereka ndiposo usange ŵandapereke. Ŵanji ncamacitiko kuti ŵapereke vinandi kuruska ŵanji; ndiposo ŵanji ŵangaŵavya cilicose cakuti ŵapereke. Yesu wakarongora kawonero kakwenelera peneapo wakayowoyapo za bokosi lakuponyamo ndrama ilo likaŵa mu tempele mu Yerusalemu ndiposo na ŵantu awo ŵakaponyangamo: Cintu cakuzirwa ndico kuŵa mwanangwa pakupereka, kuti unandi wa ndrama cara.—Luka 21:1-4.

Usange naŵa yumoza wa Ŵakaboni ŵa Yehova, kasi ine nane nipharazgenge nga ndi umo iwo ŵakucitira?

Para yunji waŵa na cimanyisko cinandi ca Paradiso wa caru capasi uyo wali kulayizgika kwizira mu Ufumu wa Kristu, iye wakutemwa kupharazga ku ŵanji. Imwe namwe mucitenge nteura pera. Igho ndi makani ghaweme!—Milimo 5:41, 42.

Kucita mwanteura ndi ntowa yakuzirwa comene yakurongolera kuti imwe ndimwe nadi musambiri wa Kristu. Mu Baibolo, Yesu wakucemeka kuti “kaboni wakugomezgeka na wakuneneska.” Panyengo iyo wakaŵira pa caru capasi, iye wakapharazganga kuti: “Ufumu wa kucanya waneng’enera,” ndipo wakatumaso ŵasambiri ŵake kuti nawoso ŵakacite mwakuyana waka. (Civumbuzi 3:14; Mateyu 4:17; 10:7) Panyuma pake Yesu wakalangura ŵarondezgi ŵake kuti: ‘Nteura rutaninge [mukapange ŵasambiri mu ŵantu, NW] ŵa mitundu yose, . . . muŵasambizge.’ Iye wakayowoyerathu kuti pambere umaliro undafike, “makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose.”—Mateyu 24:14; 28:19, 20.

Pali ntowa zinandi comene zakupharazgira makani ghaweme. Kudumbiskana na mabwezi ndiposo na ŵantu awo mukumanyana nawo kanandi kukupereka mupata wakuti mupharazgire. Ŵanji ŵakupharazga mwakulemba makalata panji mwakugwiriskira ncito telefoni. Ŵanji ŵakuposita mabuku agho mukuŵa nkani izo iwo ŵakughanaghana kuti ŵanyawo awo ŵaŵatumizgira ŵamukondweskeka nazo. Cifukwa ca khumbo lakuti ŵaleke kupambana na muntu waliyose, Ŵakaboni ŵakuruta kunyumba na nyumba na uthenga.

Baibolo lili na ncemo yakukondweska iyi: “Ndipo mzimu na mwali ŵakuti, ‘Zanga.’ Ndipo mweneuyo wakupulika watenge, ‘Zanga.’ Ndipo mweneuyo wali na nyota, wizenge: mweneuyo wakukhumba, watore maji gha umoyo kwawanangwa.” (Civumbuzi 22:17) Kuphalira ŵanji za caru ca Paradiso na vitumbiko vyake kukukwenera kucitika mwakunwekera, kukwenera kucitika na mtima wakukhumbisiska kuti mupharazge makani ghaweme.

Tili na cigomezgo cose kuti mucali na mafumbo ghanji ghakukhwaskana na Ŵakaboni ŵa Yehova na vigomezgo vyawo. Mutepanji muli na nkani izo mukuzipulikiska makora cara. Ndise ŵakukhumbisiska kuti tizgore mafumbo ghinu. Malo ghaticepera mu brosha ili, anteura tikumupempani kuti mufumbe Ŵakaboni awo ŵali kufupi namwe. Mungaŵafumba iwo pa Nyumba ya Ufumu nyengo ya maungano ghawo, panji para iwo ŵiza panyumba pinu. Panjiso mungatumizga mafumbo ghinu ku Watch Tower, mwakugwiriskira ncito adiresi yakwenelera pasi apa.