Kasi Nciweme Kucita Mbembe?

KASI ukumanya ŵanyamata panji ŵasungwana awo mbakujikuzga?— Kasi ukutemwa kucezga nawo? Panji ukutemwa kuŵa na muntu uyo ngwancindi ndiposo wakutemwa mtende?— Msambizgi Waluso wakati: ‘Mbacimwemwe ŵantu awo ŵakutemwa mtende, pakuti ŵati ŵacemekenge ŵana ŵa Ciuta.’—Mateyu 5:9.

Kweni nyengo zinyake ŵantu ŵanyake ŵakucita vintu ivyo vikutikwiyiska. Ni ntena yayi?— Mwanteura tingaghanaghana kuti tiwezgere. Ici cikaŵacitikira ŵasambiri ŵa Yesu nyengo yinyake apo ŵakarutanga ku Yerusalemu pamoza na Yesu. Leka nikuphalire umo vikaŵira.

Ŵakati ŵendapo kamutunda, Yesu wakatuma ŵasambiri ŵake ŵanji mu cikaya ca Ŵasamariya kuti ŵakapenje malo ghakugona. Kweni ŵantu ŵa mucikaya ico ŵakakhumbanga cara kuti iwo ŵagonemo, cifukwa Ŵasamariya ŵakaŵa na cisopo cawo na cawo. Ndipo ŵakatinkanga comene ŵantu awo ŵakarutanga ku Yerusalemu kukasopa.

Usange ici cikacitika kwa iwe, nga ukacitaci? Nga ukakwiya? Panji kuŵacitira cintu ciheni?— Ndivyo ŵasambiri ŵake Yakobe na Yohane ŵakakhumbanga kucita. Ŵakamuphalira Yesu kuti: ‘Kasi mukukhumba kuti ticeme moto wikhe kufuma kucanya, kuti uŵamare?’ Mwanteura Yesu wakaŵapa zina lakuti Ŵana ŵa Leza! Kweni Yesu wakaŵaphalira kuti nciweme yayi kuŵacitira ŵantu mu ntowa iyi.—Luka 9:51-56; Marko 3:17.

Mbunenesko kuti nyengo zinyake ŵantu ŵangaticitira nkaza. Ŵana ŵanyake ŵangakhumba yayi kuti tiseŵerenge nawo. Ŵangayowoya kuti: “Tikukhumba cara kuseŵera nawe.” Para ŵatiyowoyera ntena, tingakhuŵazgika, asi ntena? Tingaghanaghana kuti tiwezgere. Kweni kasi tikwenera kuwezgera?—

Kasi ungatora Baibolo lako? Tiye tijure pa Zintharika cipaturo 24, vesi 29. Pakuti: “Unganenanga cara kuti: ‘Ndimucitirenge umo iye wangunicitira; ndimuwezgere kwakulingana na ico iye wacita.’”

Kasi ukughanaghana kuti vesi ili likung’anamuraci kwa iwe?— Likuyowoya kuti tikwenera cara kuwezgera ŵantu uheni. Tingamucitiranga munyithu nkaza yayi cifukwa cakuti iye wanguticitira nkaza. Wuli usange wakwambiska dala mbembe? Wangakutuka mwakuti ukwiye. Wangakuseka na kukuyowoya kuti ndiwe wawofi. Wuli usange wangayowoya kuti ndiwe cindere. Kasi ukwenera kucitaci? Kasi ungamutimba?—

Kaciŵiriso, tiye tiwone ivyo Baibolo likuyowoya. Jura pa Mateyu cipaturo 5, vesi 39. Apo Yesu wakati: ‘Ungalimbananga na muheni cara; kweni uyo wakukupamanta pa thama lako la ku maryero, umuzgorereso linyake.’ Kasi ukughanaghana kuti Yesu wakang’anamurangaci apo wakayowoya mazgu agha? Kasi wakang’anamuranga nadi kuti para muntu wakutimba na fayiti pa thama, umuzgorereso linyake?—

Yayi, Yesu wakang’anamuranga ici cara. Mpama yikupambana na fayiti. Yikuyana waka na kututuzga. Muntu wangatipamanta mwakuti wambiske mbembe panji zawe. Wakukhumba kuti tikwiye. Ndipo usange takwiya na kumututuzga panji kumukweta muntu uyu, ncivici ico cingacitika?— Mbweno tingamba kutimbana.

Kweni Yesu wakakhumbanga cara kuti ŵasambiri ŵake ŵacitenge mbembe. Rekani wakaŵaphalira kuti, usange yunji watitimba, tingawezgeranga yayi. Tingakaripanga cara na kutimbana naye. Usange ticitenge mbembe, cikung’anamura kuti nase tiri ŵaheni nga ni uyo wambiska mbembe.

Usange uli mu suzgo, kasi ukughanaghana kuti ncintu wuli cakovwira ico ukwenera kucita?— Kufumapo. Muntu munyake wangakututuzga kanandi waka. Kweni wangareka pamanyuma pake. Para iwe waukapo, cikung’anamura kuti ulije nkongono cara. Cikung’anamura kuti ukudemerera ku mikhaliro yiweme.

Wuli usange iwe wamutimba munyako na kumuthereska? Ncivici ico cingacitika pamanyuma pake?— Muntu uyo watimbika wangakacema ŵanyake na kwiza nawo. Ŵangakuthyapula comene na luswazu panji kukugwaza na cimayi. Sono, wapulikiska cifukwa ico Yesu wakakanira kuti tireke kucita zawe?—

Kasi tikwenera kucitaci usange ŵantu ŵakutimbana? Kasi tikwenera kumovwirapo yumoza?— Baibolo likutiphalira ico nciweme. Jura pa Zintharika 26, vesi 17. Pakuti: ‘Uyo wanjirirapo pa mpindano iyo kuti njake cara wali nga ndi muntu uyo wakora nceŵe makutu.’

Ncivici ico cikucitika para wakora nceŵe makutu na nkongono? Yikupwetekeka, ndipo nayo yingakuruma, asi ntena? Para nceŵe yikuyezgayezga kuti yifumepo, nawe ukwenera kukora makutu ghake na nkongono, mwanteura nceŵe yikukaripa comene kwazanimuwone. Usange ungayirekezga, yingakuruma comene na nkongono. Kweni kasi ungamilira waka papo na kurutilira kuyikora makutu na nkongono kwambura kureka?—

Wawona, iyi njimoza mwa masuzgo agho tingakumana nagho usange tinjirirenge mu mpindano za ŵantu. Tingamanya yayi uyo wangwambiska mbembe panji cifukwa ico ŵakutimbana. Yumoza wangatimbika, kweni ungamanya yayi panji wangwiba cintu ca munyake. Usange tamovwira, ndikuti tikovwira munkhungu. Ico cingaŵa ciweme yayi, asi ntena?

Anteura, kasi ungacita wuli usange wawona ŵantu ŵakutimbana?— Usange ni kusukulu, ungacimbira kuŵaphalira ŵasambizgi. Usange ni kusukulu yayi ungaŵaphalira ŵapapi ŵako panji ŵapolisi. Enya, nanga ni apo ŵantu ŵanyake ŵakukhumba kutimbana, tikwenera cara kunjizgikamo.

Ŵasambiri ŵaunenesko ŵa Yesu ŵakukanirathu kucita mbembe. Usange ticitenge nteura, tirongorenge kuti tikutemwa comene ico nciweme. Baibolo likuyowoya kuti musambiri wa Yesu “wakwenera kuŵa wa mpindano cara, kweni waŵenge wakuzika ku wose.”—2 Timote 2:24.