Mafumbo Ghakufumira ku Ŵaŵazgi

Kasi Mkhristu wakwenera kuyiwona wuli nkhani ya kuzengera na kuloŵa somba?

Baibolo likukanizga yayi kuzengera panji kuloŵa somba. (Duteronome 14:4, 5, 9, 20; Mateyu 17:27; Yohane 21:6) Nangauli Baibolo likukanizga yayi, kweni Mkhristu uyo wakuzengera panji kuloŵa somba wakwenera kumanya makora fundo za mu Baibolo pa nkhani iyi.

Ciuta wakazomerezga Nowa na mphapu yake kuti ŵakomenge na kurya nyama, cikuru ŵakeneranga kuthiska ndopa pambere ŵandarye. (Genesis 9:3, 4) Dango ili likulongora kuti umoyo wa nyama ngwakuzirwa pakuti Ciuta ndiyo wakawulenga. Mwakuyana na fundo iyi, Ŵakhristu ŵakukoma yayi nyama na cilato ca kusambilirapo waka kukoma. Iwo ŵakucitira nkhaza umoyo yayi.—Zintharika 12:10.

Kweniso pali fundo yinyake iyo tikwenera kuyimanya makora pa nkhani iyi. Mwambura kukayika, ŵapositole awo ŵakaŵa ŵalovi ŵakasangwanga para ŵaloŵa somba zinandi. Nangauli ndimo vikaŵira, palije ukaboni wakuti ŵakajitemwanga cifukwa ca kuloŵa somba zinandi. Iwo ŵakacitanga cipharizgano ca kuloŵa somba yayi, nesi kujilongora kuti mbanalume nadi pa kuloŵa.—Salmo 11:5; Ŵagalatiya 5:26.

Antheura, waliyose wajifumbe kuti: ‘Kasi nkhucindika umoyo nga ni umo Yehova wakucitira? Kasi nkhutemwa kuyowoya za kuzengera panji kuloŵa somba? Kasi nkhutemwa kuzengera panji kuloŵa somba, panji nkhutemwa kuteŵetera Ciuta? Kasi kuzengera panji kuloŵa somba kukunipangiska kuti nendezganenge na ŵanthu ŵambura kusopa Ciuta, panji kukunipangiska kuti nileke kupwelelera mbumba yane?—Luka 6:45.

Ŵanji awo ŵakuzengera panji kuloŵa somba kuti ŵasange dende, ŵangamba kusurako kucita vinthu vyauzimu pa nyengo iyo ŵakuzengera panji kuloŵa somba. Kweni cakuzirwa nchakuti, tilongorenge kuti tili na cipulikano ndiposo tikugomezga Ciuta. Tingacita nthena mwa kuŵika vinthu vyauzimu pa malo ghakwamba. (Mateyu 6:33) Ndiposo Ŵakhristu ŵakwenera kupulikira malango gha “Kesare” ghakukhwaskana na kuzengera ndiposo kuloŵa somba. Waliyose wakwenera kughalondezga, kwali ŵamazaza ŵakukhwimiska malango agha panji yayi.—Mateyu 22:21; Ŵaroma 13:1.

Kuti ŵakolerane na khumbo la Ciuta pa kuzengera na kuloŵa somba, ŵanji ŵakwenera kusintha maghanoghano ghawo pa nkhani iyi. (Ŵaefeso 4:22-24) Kweniso tikwenera kucindika ivyo ŵanyithu ŵasankha kucita mwakuyana na njuŵi yawo. Fundo iyi yikukolerana na ivyo Paulosi wakayowoya. Wakati: “Tingeruzganangaso: kweni ici ndico mweruzge, cakuti paŵavye munthu waŵikire mbali wake cikhuŵazgo panji cakuwiska.” (Ŵaroma 14:13) Kutemwa ŵabali kwanthena uku na kuŵalongora nchindi vikupangiska kuti mu mpingo muŵenge mtende, ndiposo Mlengi withu, uyo ni Cata wa umoyo, wakukondwa para tikucita nthena.—1 Ŵakorinte 8:13.a

[Mazgu ghamusi]