Vinjeru vya Chiuta Vikovwira

KASI Yehova ni Muwusi wavinjeru? Nthowa yimoza yakuzirwa iyo yingatovwira kuzgora fumbo ili nkhughanaghanira ulongozgi uwo iyo wakupeleka. Kasi ngwakovwira nadi? Usange munthu wangalondezga ulongozgi wa Chiuta, kasi wangasanga chandulo wuli? Themba lavinjeru Solomoni likalemba ntharika zinandi chomene. Ntharika izi zikovwira pa chinthu chilichose. Ghanaghanirani viyelezgero ivi.

Kugomezga mwa Chiuta. Ntchakuzirwa chomene kugomezga Yehova kuti tiŵe ŵabwezi ŵake. Solomoni wakalemba kuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere Iyo, ndipo tiwanyoloskenge nthowa zako.” (Zintharika 3:5, 6) Kugomezga mwa Chiuta na kulondezga ulongozgi wake kweniso kupulikira ndivyo vikovwira kusanga chandulo mu umoyo. Para munthu wakuchita nthena wakukondweska mtima wa Chiuta ndipo Yehova wakumuzgora mulwani Wake Satana pa nkhani izo wakawuska.—Zintharika 27:11.

Kuŵa ŵavinjeru pakuchita vinthu na ŵanji. Ulongozgi uwo Chiuta wali kupeleka ku ŵafumu, ŵawoli, na ŵana ngwakovwira chomene mazuŵa ghano kuluska kale. Chiuta wakuphalira mfumu kuti ‘wakondwenge nayo muwoli wa uphya wake,’ kumuchiska kuti waŵenge wakugomezgeka kwa muwoli wake. (Zintharika 5:18-20) Mu buku la zintharika, ŵanakazi ŵakutengwa ŵakusangamo mazgu agho ghakulumba chomene mwanakazi wakugomezgeka uyo wakuchindikika na mfumu wake ndiposo ŵana. (Zintharika, chipaturo 31) Ŵana ŵakuphalirika kuti ŵapulikirenge ŵapapi ŵawo. (Zintharika 6:20) Kweniso, buku ili likulongosora kuzirwa kwa kuŵa na ŵabwezi, chifukwa munthu uyo wakujipatura wakupenja vya yekha. (Zintharika 18:1) Ŵanyithu ŵangatipangiska kuŵa ŵawemi panji ŵaheni. Ntheura tikwenera kuchenjera pakusankha ŵabwezi.—Zintharika 13:20; 17:17.

Kuchita mwavinjeru. Mu buku ili muliso ulongozgi pa nkhani ya uloŵevu, kuŵa na mtima uwemi kweniso kuleka kughanaghana viheni, na kulimbikira ntchito. (Zintharika 6:6; 14:30; 20:1) Likuchenjezga kuti kugomezga nthowa za munthu m’malo mwa Chiuta kukudangilira ku pharanyiko. (Zintharika 14:12) Likutichiska kuti tivikilire mtima withu, kung’anamura wunthu wa mukati, ku vinthu ivyo vingatipuluska, ndiposo likutikumbuska kuti ‘mukati [mwa mtima] muli chisimi cha umoyo.’—Zintharika 4:23.

Ŵanthu mamiliyoni ghanandi pa charu chose chapasi ŵawona kuti ŵakukhala makora chifukwa cha kulondezga ulongozgi uwu. Ntheura iwo ŵamuzomera Yehova kuŵa Muwusi wawo.

—Yafuma mu buku la Zintharika.