Mwana wa Sukulu Mutu Wayima
Peter wakuyezga kukhazikika pa mpando, kweni mtima ngwake yayi. Amadamu, awo iyo wakuŵachindika, ŵamara waka kulongosora umo Charles Darwin kwizira mu chisambizgo chake chakuti vinthu vikachita kusintha wawovwilira kuti ŵanthu ŵabanuke kumaso pa nkhani ya sayansi, na kuleka kugomezga waka vidokoni. Sono amadamu ŵakuti ŵana ŵayowoyepo maghanoghano ghawo.
Peter mutu wayima. Ŵapapi ŵake ŵali kumusambizga kuti Chiuta ndiyo wakalenga charu na vyamoyo vyose ivyo vilipo. Ŵakuti Baibolo likuneneska kuti charu chikachita kulengeka, kweni chisambizgo chakuti vinthu vikachita kusintha ni maghanoghano waka, nakuti palije ukaboni. Msambizgi wa Peter na ŵapapi ŵake, wose ŵakumukhumbira viwemi. Kweni wagomezgenge njani apa?
Ivi ndivyo vikuchitika chaka na chaka mu masukulu pa charu chose chapasi. Kasi Peter na ŵana ŵa sukulu ŵanyake ŵakwenera kuchita wuli pa nkhani iyi? Chingaŵa chambura mahara usange ŵangagomezga waka ivyo ŵaphalirika, ŵati? Ipo ŵakwenera kusanga ŵekha unenesko. Ŵakwenera kupenja maukaboni kuti ŵawone usange mbunenesko kuti vinthu vikachita kusintha, panji vikachita kulengeka. Pamanyuma, ŵawone ŵekha ivyo ŵangagomezga.
Nakuti Baibolo likuti tileke kugomezga waka chilichose. Munthu yumoza uyo wakalembako Baibolo wakati: “Munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.” (Zintharika 14:15) Baibolo likuphalira Ŵakhristu kuti na ‘nkhongono yawo ya kughanaghana,’ ŵapimenge ivyo ŵakusambira, mwakuti ŵawone usange ni vyaunenesko nadi.—Ŵaroma 12:1, 2.
Ŵavisopa ŵanyake ŵakuti masukulu ghakwenera kusambizga fundo yakuti vinthu vikachita kulengeka. Kweni ntchito ya kabuku aka nkhukhozgera ŵanthu aŵa yayi. Ntchito yake njakuti kamovwirani kuwona usange ivyo ŵanthu ŵakuyowoya vyakuti vinthu vikachita kusintha ni vyaunenesko, kweniso usange mbunenesko kuti ivyo Baibolo likuyowoya vyakuti vinthu vikalengeka ntchidokoni waka.
Tilongosorenge chomene vya selo, chifukwa ndiwo mbumoyo. Mumanyenge vinthu vyakuzizika ivyo vikuchitika kuti maselo ghapangike. Kweniso tikumupemphani kuti mughanaghanirepo fundo izo ŵanyake ŵakuti mbukaboni wakuti vinthu vikachita kusintha.
Kuluwa yayi kuti nkhani iyi yikumukhwaskani, ndipo waliyose wakwenera kusanga zgoro pa fumbo lakuti, Kasi umoyo ukamba wuli? Ukalengeka panji ukamba wekha kufuma ku chinthu chinyake? Panji muli kughanaghanirapo kale nkhani yakuzirwa iyi. Kabuku aka kakulongosora ukaboni unyake uwo ukukhorweska ŵanthu ŵanandi kuti vinthu vikachita kulengeka.