Joshuwa na Ŵagibiyoni

Ivyo vikachitika ku Yeriko vikapulikikwa mu vigaŵa vinandi vya ku Kenani. Mafumu ghose gha mu Kenani ghakakolerana kuti gharwe nkhondo na Ŵaisrayeli. Kweni Ŵagibiyoni ŵakaŵa na pulani yinyake. Ŵakavwara malaya ghakukeluka na kuluta kwa Joshuwa, ndipo ŵakamuphalira kuti: ‘Tafuma ku charu chakutali. Tili kupulika vya Yehova na vyose ivyo wakamuchitirani ku Eguputo na ku Mowabu. Tilayizgani kuti mutikomenge yayi, ndipo tiŵenge ŵateŵeti ŵinu.’

Joshuwa wakaŵagomezga ndipo wakaŵalayizga kuti ŵakomekenge yayi. Pakati pajumpha mazuŵa ghatatu, Joshuwa wakamanya kuti ŵanthu aŵa ŵakafuma pafupi waka. Ŵakaŵa ŵamwenemura mu Kenani. Joshuwa wakafumba Ŵagibiyoni kuti: ‘Chifukwa wuli mukatipusika?’ Iwo ŵakazgora kuti: ‘Tikawopanga. Tikumanya kuti Yehova Chiuta winu wakumulwerani nkhondo. Chonde kutikoma yayi.’ Joshuwa wakachita ivyo ŵakapangana ndipo wakaŵakoma yayi.

Pakati pajumpha mazuŵa ghachoko waka, mafumu 5 gha mu Kenani na ŵasilikari ŵawo, ŵakawofya Ŵagibiyoni kuti ŵarwenge nawo nkhondo. Joshuwa na ŵasilikari ŵake ŵakenda usiku wose kuti ŵakaponoske Ŵagibiyoni. Machero ghake, nkhondo yikayamba mulenjilenji. Ŵakenani ŵakayamba kuchimbira chopichopi. Kulikose uko ŵakachimbiliranga, Yehova wakaŵawiskiranga vimalibwe ndipo vikaŵadinyanga. Pamanyuma, Joshuwa wakapempha Yehova kuti wayimiske zuŵa kuti lileke kunjira. Chifukwa wuli wakapempha Yehova kuti wachite chinthu icho chikaŵa kuti chindachitikepo? Chifukwa Joshuwa wakagomezganga chomene Yehova. Ivyo wakapempha vikachitika nadi. Zuŵa likanjira yayi m’paka Ŵaisrayeli ŵakakoma mafumu ghose gha mu Kenani na ŵasilikari ŵawo.