Mtende wa Caru Cose​—​Mwauli?

KASI mtende wa caru cose wuli pafupi? Ŵantu ŵanandi ŵakaghanaghananga nteura kweni sono ŵakukayika. Pakuyowoya za masuzgo ghithu agho ghali muntazi, lipoti la mu nyuzipepala ya ku South Africa ya Daily Mail & Guardian likuyowoya kuti, “kusinta kwa ukhaliro wa ŵantu na ndyari uko kukayowoyeka virimika khumi ivyo vyajumpa sono kukuwoneka kuŵa kwambura macitiko.”

Ŵalembi ŵa nkani iyi ŵakukonkoska za cigomezgo ico ŵantu ŵanandi ŵakaŵa naco virimika khumi ivyo vyajumpa. Nkondo ya Mazgu yikaŵa kuti yamara waka panyengo iyo, ndipo mpindano zapakati pa miwuso ya nkongono kukaŵavya. Ŵantu ŵakaghanaghananga kuti uku kukaŵa kwamba kwa nyengo yipya, nyengo yeneiyo ŵantu ŵayambenge kusanga ntowa za kumazgira ukavu, matenda, na kunanga cilengiwa. Lipoti ili likuyowoya kuti “mazgu agha sono ghakuwoneka kuŵa ghambura macitiko kuti ghakwaniriskike.” “Panyengo yasono mpindano zikucitika ku malo uko tikaghanaghananga kuti zingacitika cara; ukavu ukurutirira kuthandazgika pacaru cose. Pali vyaru viŵiri ivyo vili na vilwero vya nyukliya. Nkongono ya United Nations njicoko cifukwa yikutondeka kumazga masuzgo gha ŵantu. Umo ndimo ŵantu wose pacaru capasi ŵakughanaghanira.”

Ŵasambiri ŵa Baibolo ŵakumanya kuti kuyezgayezga kwa muntu, nanga wangaŵa wa mahara wuli, wangamazga yayi masuzgo ghose. Cifukwa wuli? Cifukwa ncakuti, nga ni umo Baibolo likuyowoyera, “caru cose cikugona mu nkongono za muheni.” (1 Yohane 5:19) Pasi pa muwuso wa Satana, caru cingaŵa nga ndi Paradiso cara nga ndi umo Ciuta wakacilengera pakudanga.

Kweni ndipouli, pali cifukwa ca kulindirira vintu viweme. Yehova Ciuta wakulayizga kwiziska mtende pacaru cose capasi, kuti mwa kuzomerezga kaŵiro aka ka vintu kurutilira cara, kweni mwa kwiziska “caru cipya” mweneumo ‘muzamukhala urunji.’ (2 Petros 3:13) Enya, kwizira mu Ufumu wa Ciuta, caru cithu cizamuŵa ca mtende, muzi wakukondweska, mweneumo umoyo na ncito vizamuŵa vyakukondweska nyengo zose kwa ŵantu wose ŵakupulikira. Mwakusazgirapo, Ciuta wakulayizga ‘kufyura sozi lose ku maso ghaŵo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya.’ Ivi kuti ni vilayizgo vyambura kugomezgeka vya ŵantu cara. M’malo mwake, ni Mazgu ghakufuma kwa Mlengi mweneuyo wakuteta cara.—Civumbuzi 21:4; Tito 1:2