Kasi Kukolerana kwa Visopo Kuli Pafupi? — LAYIBULARE YA PA INTANETI ya Watchtower

Kasi Kukolerana kwa Visopo Kuli Pafupi?

“Muhanya wuno ni zuŵa lakuzirwa comene mu mdauko wa matcharitchi ghithu,” umu ndimo wakayowoyera Christian Krause, pulezidenti wa Lutheran World Federation. Mwakuyana waka, Papa Yohane Paulos waciŵiri wakayowoya za “cakucitika cakusuzga ndiposo cambura kuruwika ca kuyezga kusanga ntowa za kwiziska kukolerana pakati pa Ŵakristu.”

Vipharazgo vya kukora mtima ivi vikacitika panyuma pakusayina Cikalata ca Fundo Zakukhozgeka pa October 31, 1999, mu msumba wa Augsburg, ku Germany, kusimikizgira kuti wose ŵakolerana na fundo za Cipharazgo ca Cikolerano ca Kugowokereka kwa Zakwananga. Nyengo na malo gha cakucitika ico vikasankika. Kukuyowoyeka kuti pa October 31, 1517, Martin Luther wakakhoma maghanoghano ghake ghakukwana 95 pa cijaro ca tcharitchi likuru mu msumba wa Wittenberg, ndipo mwakucita nteura, wakambiska ndondomeko ya Kunozgaso Vintu kwa Ciprotestanti. Mwambura kukayika, ku Augsburg ndiko viŵaro vya Tcharitchi la Lutheran vikaruta mu 1530 kukapereka Vigomezgo vyawo vikuru ivyo vikapangikira mu msumba wa Augsburg, ivyo vikakanika na Tcharici la Katolika, ndipo ici cikapangiska kureka kukolerana pakati pa Ŵaprotesitanti na Ŵakatolika.

Kasi Cipharazgo ca Cikolerano ici cingaŵa ntowa ya kumazgira mpindano pakati pa visopo, nga ni umo ŵakayowoyera? Magulu ghose agha ghakaŵa ghakukhumbisiska cara. Ŵarongozgi ŵa Ciprotestanti ŵakujumpa 250 ŵakalemba cikalata cakukana, iwo ŵakakana kurongozgeka na Tcharitchi la Katolika. Ŵaprotesitanti ŵakakwiyaso peneapo Tcharitchi la Katolika likapharazga za kugowokereka kwapadera kwa zakwananga kwa mu cirimika ca 2000, cintu ceneico cikapangiskaso mpindano virimika 500 ivyo vyajumpa. Ndiposo cifukwa cakuti Vigomezgo vya Ŵaprotesitanti ivyo vikapangikira mu msumba wa Augsburg na kususkika kwake na Tcharitchi la Katolika, uko kukacitika na Wupu wa ku Trent kucali kugwira ncito, kukolerana pakati pa visopo kungacitika cara.

Mpindano na kureka kukolerana pakati pa Visopo vya Cikritu nkukuru comene mwakuti kungamara cara mwa kusayina cikalata ca kukolerana kulikose uko kungacitika. Ndiposo, kuŵa ŵakukolerana mu cipulikano kukuthemba pa kuŵa na vigomezgo vyakuzikika comene pa Mazgu gha Ciuta, Baibolo. (Ŵaefeso 4:3-6) Mu malo mwa kuzomera waka pa mlomo, kukolerana kweneco kukwiza mwa kusambira na kucita ivyo Ciuta wakukhumba kwa ise. “Mitundu yose ya ŵantu yikwenda wose mu zina la ciuta wake na wake, kweni ise tendenge mu zina la Yehova Ciuta witu muyaya na muyana.”—Mika 4:5.

[Kulongosora Cithuzithuzi pa peji 32]