“Mu Kungweruka Kwinu Tikuwona Ungweru”

UNGWERU ni cintu ico kanandi tikuciwona mwakupepuka, ndipo tikuzakamanya kuzirwa kwake para magesi ghazimwa, mwakuti mu cikaya cithu cose muli mdima. Mwakukondweska, dazi ilo ni “nkongono ya ungweru” ya kucanya ndakugomezgeka comene. Ndipo tikuwonga comene ungweru wakufuma ku dazi cifukwa ukutovwira kuti tilaŵiskenge, kurya, kuthuta, na kuŵa na umoyo.

Pakuti ungweru ngwakukhumbikwa kuti tiŵe na umoyo, tikwenera kuzizwa yayi para tikuŵazga mu lemba la Genesis kuti iwo ukaŵapo pa zuŵa lakwamba la kulenga. “Ciuta wakati, ‘Kuŵeko kungweruka.’ Ndipo kukaŵako kungweruka.” (Genesis 1:3) Ŵasopi ŵa Ciuta nga ni Themba Davide nyengo zose ŵakamanyanga kuti umoyo na ungweru vikufuma kwa Yehova. “Cisimi ca umoyo ciri na Imwe;” ndimo Davide wakalembera ntena. “Mu kungweruka kwinu tikuwona ungweru.”—Salmo 36:9.

Mazgu gha Davide ghakuyowoya za ungweru weneko kweniso ungweru wakuyerezgera. Buku la Encyclopædia Britannica likuyowoya kuti: “Ungweru ukutovwira comene kuti tilaŵiskenge.” Ndipo likusazgapo kuti: “Mauthenga ghanandi ghakuya mu wongo wa muntu kwizira mu maso kuruska ciŵaro cilicose.” Pakuti vintu vinandi mwa ivyo tikusambira vikuthemba pa kulaŵiska, ndipo kuti tilaŵiskenge makora vikuthemba pa ungweru—ndipo ungweru ukugwiriskirika ncito mu Malemba mwakuyerezgera.

Lekani Yesu wakaphalira ŵasambiri ŵake kuti: “Ndine kungweruka kwa caru. Uyo wakurondezga Ine kuti wati wendenge mu cisi cara, kweni wati waŵenge na kungweruka kwa umoyo.” (Yohane 8:12) Ungweru wakuyerezgera uwo Yesu wakayowoyanga ukaŵa uthenga waunenesko uwo iye wakapharazganga, uwo ukangweruskanga maghanoghano na mitima ya ŵategherezgi ŵake. Pakuŵa mu mdima wauzimu kwa virimika vinandi, ŵasambiri ŵa Yesu pamanyuma pake ŵakamanya makora khumbiro la Ciuta kurazga kwa ŵantu, na cilindizga ca Ufumu wa Ciuta. Uwu ukaŵa nadi ‘ungweru wa umoyo,’ cifukwa kuŵa na cimanyisko ca mtundu uwu kungarongozgera ku umoyo wamuyirayira. “Uwu mbumoyo wa muyirayira,” ndimo wakayowoyera Yesu mu pempero lakuya kwa ŵadada ŵake, ‘kuti ŵamumanyani imwe, Ciuta mweneco yekha, na Yesu Kristu, mweneuyo mukamutuma.’ (Yohane 17:3) Mwanteura tiyeni tireke kupepuska ungweru wauzimu uwu!