“Nkasanga Cilicose ico Nkakhumbanga”

KUYANA na lipoti la World Health Organization (Wupu Wakuwona za Umoyo wa Ŵantu), sono-sono apa pawoneka kuti ŵantu ŵakujumpa 120 miliyoni pa caru cose ŵakurwara na maghanoghano. Ŵantu 1 miliyoni ŵakujikoma cirimika cilicose, ndipo pakati pa 10 na 20 miliyoni ŵakucita vintu vyakuti ŵajikome. Kasi pali wovwiri wuli kwa awo ŵakurwara na maghanoghano? Nyengo zinyake munkhwara ungacepeskako suzgo ili, kweniso kuŵasanguruska. Ŵanyake awo ŵakusuzgika maghanoghano ŵasanga covwiro ca mtundu unyake mu mabuku ghakurongosora Baibolo gha Ŵakaboni ŵa Yehova, nga ni umo karata iyi ya ku France yikuyowoyera.

“Ni kale viŵi yayi apo nkawona kuti umoyo ulije ncito. Nkamuromba Ciuta kuti nciweme nifwe waka. Nkawonanga nga kuti nafwa kale mukati. Nkaromba na nkongono zose kwa Yehova kuti wanovwire. Nkaghanaghana za kuŵazga Yearbook of Jehovah’s Witnesses ya 2002, nkayimara pa mazuŵa ghatatu pera. Nadi pano, niyowoye kuti yili kunipembuzga comene nkanira na kukhozga cipulikano cane.

“Nkapenjaso nkani zinyake mu magazini gha Gongwe la Mulinda na Galamukani! Imwe, nkazizwa! Naŵazga kanandi waka magazini agha virimika vyakujumpa 15, kweni namanyanga yayi kuti ghali na nkani zakupereka nkongono na zakukondweska. Magazini agha ngakuzura na citemwa​—⁠mukhaliro uwo ukuwoneka bweka yayi lero. Nkasanga cilicose ico nkakhumbanga.”

Baibolo likuti: “Yehova wali pafupi na awo mbakupyoka mu mtima, ndipo wakuponoska awo mbamzimu [wakuphwanyika, NW ].” (Salmo 34:18) Inya, wose awo “mbakupyoka mu mtima” panji ‘kuphwanyika mu mzimu’ ŵangasanga cipembuzgo mu Baibolo na kuŵa na cigomezgo ca muntazi muweme. Ŵakaboni ŵa Yehova ŵakugaŵira mabuku gha Baibolo mwakuti ŵawovwire awo ŵakusuzgika kuti ŵasange cipembuzgo mu nthamba ya Ciuta.