Kalata kwa Nowa

“WAKUTEMWEKA Nowa, naŵazga kanandi waka nkhani yako mu Baibolo na umo ukazengera cingalaŵa ico iwe na mbumba yako mukaponeramo.”

Ndimo wakambira kalata yake Minnamaria, msungwana wa vilimika 15. Msungwana uyu wakanjira ciphalizgano ca ŵana ŵa sukulu ŵa vilimika 14 mupaka 21 ca kulemba nkhani. Ciphalizgano ici cikanozgeka na positi ofesi ya ku Finland, Wupu wa Teachers of Finnish, na wa Finnish Literature Society. Ŵakenera kulemba kalata kufuma mu buku. Ŵana ŵa sukulu ŵakatumika kulembera kalata mlembi wa buku panji munthu uyo wakuzunulika mu buku. Ŵasambizgi ŵakasankhapo makalata ghakujumpha 1,400 agho ŵana ŵa sukulu ŵakalemba na kughapeleka kwa maofesala agho ghakanozga ciphalizgano ici. Maofesala ghakasankhapo yimoza yiwemi comene, ziwemi 10, na zinyakeso 10 ziwemiko. Minnamaria wakakondwa kuti wakapokera njombe cifukwa cakuti kalata yake yikaŵa pa gulu lacitatu.

Cifukwa wuli Minnamaria, msungwana wa vilimika vicoko waka, wakamulembera kalata Nowa, munthu uyo wakaŵako kale comene, nakuti panji sono pajumpha vilimika 5,000? Iyo wakuti: “Cinthu cakwamba ico cikiza mu maghanoghano ni Baibolo. Ŵanthu awo ŵakuzunulika mu Baibolo nkhuŵamanya makora comene. Nkhani zawo nazisambira kanandi waka ndipo nkhuŵa nga nkhuŵawona. Nkhasankha Nowa cifukwa umoyo wake ukunikondweska comene nakuti ukupambana na umoyo wane.”

Kalata iyo Minnamaria wakalembera Nowa yikumara na mazgu ghakuti: “[Nowa] ucali ciyelezgero ciwemi ca cipulikano na kupulikira. Milimo yako yikupangiska wose awo ŵakuŵazga Baibolo kuti ŵacite mwakuyana na cipulikano cawo.”

Kalata iyi, ya msungwana uyo wakuŵazga Baibolo, yikulongora kuti Baibolo ‘ndamoyo, ndipo ndankhongono [nadi]’ pa ŵana na ŵalara wuwo.—Ŵahebere 4:12.