Kasi Muli nga Khuni la Lagani Auna?

MU Muzi unyake kuwaro kwa cisumbu ca Moresby, ku Papua New Guinea, ŵateŵeti ŵaŵiri ŵakafumanga ku upharazgi. Uku ŵakwenda, ŵakawona khuni lakutowa comene. Mulara wakati: “Hee, khuni la lagani auna!” Ndipo wakaphalira munyamata uyo wakaŵa nayo kuti: “Zina ili likung’anamura kuti ‘khuni la cilimika na cilimika.’ Khuni ili likupambana na makuni ghanyake, cilimika cilicose mahamba ghake ghakupuluta ndipo likuwoneka ngati lafwa. Kweni para vura yawa, likuweleramo, likuzota maluŵa, na kwambaso kuwoneka lakutowa.”

Tingasambirapo kanthu pa khuni la lagani auna. Ŵanthu ŵanyake ŵa vyakusandasanda ŵakuti khuni ili ndimoza mwa makuni ghankhondi agho ghakuzota maluŵa ghakutowa comene pa caru cose. Nangauli mu cihanya likuŵavya maluŵa na mahamba, kweni likusunga maji ghanandi. Kweniso likukolombezga misisi yake ku jarawe pasi nkhanira. Para lacita nthena, likukhora ku mphepo yankhongono. Panji titi, likupona nangauli vingasuzga cifukwa likuŵa lakunozgeka.

Nyengo zinyake cipulikano cithu cingayezgeka mu nyengo yakusuzga. Kasi nchivici citovwirenge kuti tizizipizge? Nga ni khuni la lagani auna, nase tikwenera kumwa na kusunga maji gha umoyo kufuma mu Mazgu gha Ciuta. Kweniso tikwenera kudemelera ku ‘jarawe lithu,’ Yehova, na gulu lake. (2 Samuel 22:3) Nadi, khuni la lagani auna likutikumbuska kuti nanga vingasuzga wuli, tingalutilira kuŵa na nkhongono kweniso ŵakutowa mwauzimu usange tikupokera wovwiri uwo Yehova wakutipa. Para tacita nthena, ‘tizamuhalira malayizgano’ gha Yehova, pamoza na layizgo la umoyo wamuyirayira.—Ŵahebere 6:12; Civumbuzi 21:4.