Kasi Viheni Vingamazgika?
Kasepuka kasora cinthu ico kakumanya yayi kuti ni bomba, ndipo laphulika na kukoma maso ghake ndiposo kukapendezga umoyo wake wose. Mama wataya bonda wake mumphepete mwa msewu. Munthu uyo ŵamulekeska nchito wawelera uko wagwiranga nchito na kulasa na futi munthu waliyose uyo wamusanga, ndipo paumaliro wakujikoma yekha na futi. Munthu wakucindikika wakugona ŵana ŵacokoŵacoko.
NCHACITIMA kuti malumbiri gha vinthu viheni ghazara comene mazuŵa ghano. Cacitimaso comene nchakuti malumbiri agha kanandi ghakusazgapo kuthiska ndopa za ŵanthu ŵanandi, na ucigeŵenga. Nyuzipepara yinyake mu cilimika ca 1995 yikati: “Mu vilimika ivi Satana wahaŵa comene. Kumanyuma kose uku, ŵanthu ŵandaŵepo na maluso ghanthena ndiposo khumbo la kukoma ŵanyawo cifukwa ca kupambana mtundu, cisopa, panji kupambana kasangiro ka vinthu.”
Kweniso ŵanthu ŵakunanga mphepo, caru, vinthu vya mu caru, na kupulura vyamoyo. Kasi ŵanthu ŵangamazga viheni vyose ivi na kuzgora caru kuŵa ciwemi? Panji, kasi kucita nthena kungayana waka na kukhumba kukapa nyanja na mbale? Nkhwantha ya masambiro, iyo yalemba nkhani zinandi zakukhwaskana na viheni vya mu caru, yikati: “Nayezgayezga comene kuti caru cisinthe, kweni caru cikuwoneka kuti cikusintha yayi.” Panji ndimo namwe mukuwonera.
Uko caru cikulazga cingayelezgereka na sitima iyo yikututuzgika na majigha gha nyanja iyo yauka comene ndipo yikuvundukiravundukira. Nangauli palije munthu uyo wakukhumba kuti yilute uko yikulazga, kweni kuyiwezga kwatondeka. Sitima iyi yikututuzgika nipera na majigha ndiposo cimphepo.
Cimoza mwa ivyo vyacitiska kuti vinthu vihenipirengehenipirenge nthena mu caru nchakuti ŵanthu mbambura kufikapo. (Ŵaroma 3:23) Ndipouli, pakuwona umo viheni vyathandazgikira, vikulongora kuti ŵanthu ŵakucita mwa iwo ŵekha yayi. Kasi cingaŵa camacitiko yayi kuti ŵanthu ŵakukhuŵirizgika na nkhongono yinyake yiheni ndiposo yambura kuwoneka? Para ndimo vilili nadi, kasi ni nkhongono wuli, ndipo tingajivikilira wuli? Nkhani yakulondezgapo yizgorenge mafumbo agha.
[Kulongosora Cithuzithuzi pa peji 3]
© Heldur Netocny/Panos Pictures