Kasi Mukuyowoya Vigomezgo Vinu Para Mpata Wasangika?
“KASI unenesko wanadi uliko?” Uwu ndiwo ukaŵa mutu wa nkhani iyo ŵana ŵa sukulu ku Poland ŵakaphalizgananga kulemba. Ulongozgi uwo ukapelekeka pakulemba nkhani iyi ukati: “Tikukhumbikwira unenesko wanadi yayi. Palije uyo wakuwukhumba. Nakuti kulije fundo iyo njaunenesko fikepo.” Agata, uyo ni mwana wa sukulu ya sekondare, wa vilimika 15 ndiposo yumoza wa Ŵakaboni ŵa Yehova, wakasangirapo mwaŵi kuti waphalireko ŵanji vigomezgo vyake vya mu Baibolo.
Pakunozgekera kulemba nkhani yake, Agata wakalomba dankha kwa Yehova kuti wamulongozge ndipo pamanyuma wakamba kupenja mabuku agho ghakalongosorapo nkhani iyi. Fundo zakuyana na nkhani iyi wakazisanga mu Gongwe la Mulinda la Julayi 1, 1995. Wakalemba fumbo ilo Pontiyo Pilato wakafumba Yesu kuti: “Kasi unenesko nchici?” (Yohane 18:38) Agata wakalemba kuti ili likaŵa fumbo lakukayikira ilo ŵanthu ŵanandi ŵakufumba kuti: ‘Unenesko? Unenesko nkhanyama wuli? Kulije unenesko.’ Agata wakalemba kuti: “Mutu wa nkhani iyi ndiposo ulongozgi uwo wapelekeka vikunikumbuska fumbo la Pilato.”
Pamanyuma wakalongosora za cigomezgo cakuti cinthu ico nchaunenesko ku munthu munyake cingaŵa cautesi ku munyake ndipo wose ŵangaŵa kuti ŵakuneneska. Wakafumba mafumbo agho limoza lake ndakuti: “Ninjani wa ise uyo mphanyi wakukwera ndege usange malango ghakwendeskera ndege ngautesi?” Pamanyuma, wakayowoya za Baibolo, wakati: “Mazgu gha Ciuta tikughagomezga mwacimutumutu waka yayi, kweni cifukwa ca ukaboni wankhongono uwo ulipo.” Wakayowoya kuti wakugomezga kuti awo ŵakukhumba nadi kumanya unenesko ŵangausanga para ŵangazikira.
Agata wakapika dipuloma yapadera, ndipo wakaŵa na mwaŵi wa kulongosolera kilasi lose vigomezgo vyake. Ŵana ŵa sukulu ŵanandi ŵakazomera kuti wambe kusambira nawo Baibolo. Agata ngwakukondwa kuti wakagwiliskira nchito mpata uwu kuti waphalireko ŵanji vigomezgo vyake. Enya, kuŵa ŵakunozgeka kuyowoya vigomezgo vinu nyengo yili yose iyo mpata wasangikira kungaŵa na vyandulo vinandi. Kasi ni mipata wuli iyo mungasanga kuti muphalireko ŵanji vigomezgo vinu?