Kasi Muli Ŵakunozgeka Kuzgora Awo Ŵakumufumbani Vigomezgo Vinu?
KASI muli kuŵapo mu ukhaliro uwo mukawona kuti nchiwemi kulongosora vigomezgo vinu? Wonani ivyo vikacitikira Susana, mudumbu wa vilimika 16 wa ku Paraguay. Apo ŵakasambiranga cisambizgo cinyake ku sekondare, mwana munyake wakayowoya kuti Ŵakaboni ŵa Yehova ŵakugomezga yayi “Testamente la Kale,” Yesu Khristu, ndiposo Mariya. Munyake wakayowoya kuti Ŵakaboni ŵakutalulira pakucita vinthu, ŵakulolera kufwa m’malo mwa kupokera munkhwara ku cipatala. Muŵenge imwe mphanyi mukacita wuli?
Susana wakalomba kwa Yehova, na kuwuska woko. Cisambizgo ico ŵakasambiranga cikaŵa pafupi kumara, ndipo Susana wakalomba asambizgi ŵake kuti ŵamuzomerezge kuti wazakayowoye ivyo iyo nga njumoza wa Ŵakaboni ŵa Yehova wakugomezga. Asambizgi ŵake ŵakamuzomerezga. Kwa masabata ghaŵiri ghakulondezgapo, Susana wakanozgekera umo wangakayowoyera nkhani yake, ndipo wakagwiliskira nchito burosha la Ŵakaboni ŵa Yehova—Kasi Iwo Mbanjani? Kasi Ncici Ico Iwo Ŵakugomezga?
Zuŵa lakuti walongosolere vigomezgo vyake likafika. Susana wakalongosora cifukwa ico tikucemekera Ŵakaboni ŵa Yehova. Wakalongosoraso ivyo tikulindizga munthazi ndiposo cifukwa ico tikulekera kuzomera kuti ŵatiŵikenge ndopa. Pamasinda wakaphalira awo ŵakaŵa mu kilasi kuti ŵamufumbe mafumbo. Ŵanandi ŵakawuska mawoko. Asambizgi ŵake ŵakakondwa comene cifukwa ca kupulika umo Susana wakazgoleranga mafumbo mwakugwiliskira nchito Baibolo.
Mwana munyake mu kilasi wakati: “Zuŵa linyake nkhaluta ku Nyumba ya Ufumu, kweni nkhawonamo cikozgo cilicose yayi.” Asambizgi ŵakakhumbanga kumanya cifukwa ico mu Nyumba ya Ufumu mulijire vikozgo. Susana wakaŵaŵazgira Salmo 115:4-8 na Exodus 20:4. Mwakuzizikika, asambizgi ŵakafumba kuti: “Cifukwa wuli mu machalichi ghithu muli vikozgo apo Baibolo likukana?”
Wakalutilira kuzgora mafumbo ghawo kwa maminiti 40. Apo Susana wakaŵafumba usange ŵangatemwa kuwonelera vidiyo ya No Blood—Medicine Meets the Challenge, wose ŵakazomera. Ntheura asambizgi ŵakanozga ndondomeko yakuti cidumbirano cizakalutilire namacero ghake. Paumaliro wa vidiyo iyi, Susana wakayowoya nthowa zakucizgira zambura kusazgako ndopa izo Ŵakaboni ŵa Yehova ŵakuzomera. Ŵakati ŵapulika nthena, asambizgi ŵake ŵakati: “Nkhamanyanga yayi kuti kuli nthowa zinandi zakucizgira m’malo mwa kupokera ndopa, kweniso nkhamanyanga yayi vyandulo vya kuleka kupokera ndopa. Kasi nthowa izi ni za Ŵakaboni ŵa Yehova pera?” Asambizgi ŵakati ŵapulika kuti nthowa izi ni za waliyose, ŵakayowoya kuti: “Para Ŵakaboni ŵa Yehova ŵangizaso ku nyumba yane, mbwenu nizamuŵapokelera.”
Susana wakanozgekera kuti wamuyowoya nkhani yake kwa maminiti 20 pera, kweni cidumbirano cikatora maora ghatatu. Sabata yakulondezgapo, ŵana ŵa sukulu ŵanyake nawo ŵakayowoya nkhani zakukhwaskana na vigomezgo vya machalichi ghawo. Paumaliro wa nkhani zawo, ŵana aŵa ŵakafumbika mafumbo ghakukhwaskana na vigomezgo vyawo, kweni ŵakatondeka kuzgora. Asambizgi ŵawo ŵakafumba kuti: “Cifukwa wuli mukutondeka kuzgora mafumbo ghakukhwaskana na vigomezgo vinu nga umo wakacitira munyinu uyo njumoza wa Ŵakaboni ŵa Yehova?”
Ŵana aŵa ŵakazgora kuti: “Ŵanyithu ŵakusambira nadi Baibolo, kweni ise tikulimanya yayi.”
Asambizgi wakaphalira Susana kuti: “Mukusambira nadi Baibolo, ndipo mukuyezgayezga kucita ivyo likuyowoya. Mukwenera kuwongeka comene.”
Susana wakhumbenge mphanyi wakakhala cete, kweni wakalongosora vigomezgo vyake mwacikanga. Mwakucita nthena, wakalondezga ciyelezgero ca kasungwana ka ku Israyeli ako kakakoleka wuzga na Ŵasiriya. Kasungwana aka kakakhalanga mu nyumba ya Namani, mulara wa ŵasilikari ŵa Siriya, uyo wakaŵa na matenda gha vyoni agho ghakaŵa ghakuru comene. Kasungwana aka kakaphalira fumukazi yake kuti: “Sekuru wane wakharenge na nchimi iyo yili ku Samariya, mphanyi yilikumucizga ku vyoni vyake.” Kasungwana aka kakatondeka kukhala waka cete kwambura kuphalirako ŵanji za Ciuta waunenesko. Ivi vikawovwira kuti abwana ŵake a Namani ŵambe kusopa Yehova.—2 Mathe. 5:3, 17.
Susana nayo vikamutonda kukhala waka cete kwambura kuphalirako ŵanji za Yehova na ŵanthu ŵake. Mwa kuŵa na cikanga kuzgora mafumbo ghakukhwaskana na vigomezgo vyake, Susana wakalondezga languro lakuti: “Tuŵiskani mu mitima yinu Khristu nga ndi Fumu: uku muli mcanya kale mazuŵa ghose kumuzgora yose uyo wakumufumbani kafukwa ka cigomezgo ico muli naco, kweni na kuzika na wofi.” (1 Pet. 3: 15) Kasi muli ŵakunozgeka kuzgora awo ŵakumufumbani vigomezgo vinu para mwaŵi wasangika?
[Cithuzithuzi pa peji 17]
Vinthu ivi vingamovwirani kuti muzgore mafumbo ghakukhwaskana na vigomezgo vinu