Vikaŵa Vinjeru Vyamaseŵera Yayi

ŴANYAMATA ŵatatu ku Central Africa ŵakakhumbanga kuti ŵalute ku ungano wa cigaŵa. Kweni kasi ŵakate ŵendenge wuli? Ulendo uwu ukaŵa wa makilomita pafupifupi 90, ndipo msewu ukaŵa wakujimikajimika ndiposo wa fuvu, kweniso ŵakaŵavya cakwendapo. Ŵakaghanaghana kuti ŵabwereke njinga zitatu, kweni njinga ziwemi zikasangika yayi.

Mulara wa mu mpingo wawo wakati wawona suzgo lawo, wakaŵapa njinga yake yikoloŵeri kweni yankhongono. Wakaŵalongosolera umo iyo na ŵanyake ŵakacitirapo kumanyuma kuti ŵalute ku ungano wa cigaŵa. Mulara uyu wakaŵaphalira kuti wose ŵatatu ŵende pa njinga yimoza. Iyi yikaŵa nthowa yipusu kweni yakusuzga. Kasi vikate vicitikenge wuli?

Kuti ŵaleke kuphya na zuŵa, ŵabali aŵa ŵakawuka usikusiku na kupakira katundu wawo pa njinga. Mbali yumoza wakadangira na njinga, ndipo ŵanyake ŵaŵiri ŵakaphindanga mumanyuma. Wakati wenda mamita 500, mbali uyo wakadangira na njinga wakimilira na kwegamiska njinga ku khuni. Ndipouli, wakawoneseska kuti waŵika pa malo agho ŵabali awo ŵakizanga kumasinda ŵangayiwona mwakuti ŵanthu ŵa kawoko katali ŵaleke “kutora.” Wakati wacita nthena, wakamba kwenda pasi.

Ŵabali ŵaŵiri awo ŵakendanga pasi ŵakati ŵafika apo pakaŵa njinga, yumoza wakakwera ndipo munyake wakalutilira kwenda pasi mamita ghanyake 500 pambere nyengo yake yakuti nayo wakwere njinga yindakwane. Mwakucita nthena, ŵabali aŵa ŵakacepeskako ulendo wawo wa makilomita 90 uwo waliyose wakate wendenge. M’malo mwake, waliyose wakenda makilomita 60. Kuyezgayezga kwawo kukaŵa kwacandulo comene. Ŵakati ŵafika ku ungano, ŵakakumana na ŵabali na ŵadumbu ŵawo, ndipo ŵakakondwa comene na ciphikiro cauzimu. (Dute. 31:12) Kasi cilimika cino mucitenge vyose ivyo mungafiska kuti muzakalute ku ungano wa cigaŵa?