Kalata Yakufuma ku Nicaragua

“Pa Mlonga wa Coco, Mukonere ku Malyero”

“MALO agha ghakukhumba kuti muŵe na galimoto iyo yingenda mu mathipa, winji, kweniso kunyamura mafuta ghapadera. Manyani kuti kuli mathipa ghanandi. Pa mlonga wa Coco, mukonere ku malyero.”

Uyo wakanilongosolera mazgu agha wakapangiska kuti nikayike usange namufika nadi. Ndipouli, pa Ciŵiri namulenji, nkhanyamuka kuluta ku ungano uwo ukacitikira ku Wamblán, msumba ucoko uwo wuli kumpoto mu caru ca Nicaragua.

Nkhanyamuka nausikusiku pa galimoto yane, iyo yikaŵa yakale kweni yankhongono. Nkhenda mu msewu wa Pan-American. Nkhati nafika pa Jinotega, nkhatora msewu wafuvu, uwo ŵanthu ŵa kumalo agha ŵakuwucema kuti feo panji kuti wambura kukondweska. Pambere nindanyamuke pa Jinotega, nkhawona masitoro ghaŵiri, yinyake pakalembeka Miracle of God ndipo pa yinyake The Resurrection.

Msewu uwu ukaŵa na makona ndiposo vikwezga na vikhizga. Mu mabuwu nkhendeskanga pacokopacoko. Nkhajumpha mumphepete mwa nyanja, iyo yikaŵa pacanya pa phiri. Nangauli kukaŵa ŵanyakhuŵinda, kweni nkhawona makuni agho ghakaŵa na maluŵa ghakutowa.

Pa kona nkhakhala pacoko kugandana na basi, iyo yikendanga pakati pa msewu. Yikafumiskanga vijosi, ndipo matayala ghake ghakabanthiskanga malibwe. Ku Nicaragua mabasi agho ghakwendeskeka na madilivala ghankhaza panthazi pake ŵakulembapo kuti Cinkhara, Kalizga, Sato, panji Ciŵinda.

Apo zuŵa likaŵa pa luwombo, nkhaŵa kuti nafika ku cidikha ca ku Pantasma. Nkhajumpha pafupi na nyumba yamakuni. Mwanalume munyake uyo wakaŵa mucekuru wakakhala pa mpando, ncheŵe yikagona pasi pa khuni, ndipo ng’ombe ziŵiri ŵakazikakilira ku ngolo iyo yikaŵa na matayala ghakuŵaja. Mu kamusumba kanyake nkhawona kawumba ka ŵana ŵakufuma ku sukulu. Ŵakavwara yunifomu ya buluu, ndipo apo ŵakendanga mu msewu ŵakawonekanga nga nkhajigha kakutimba ku mtunda.

Kukawocha comene apo nkhafikanga pa Wiwilí, ndipo nkhawona mlonga wa Coco. Mlonga uwu ngukuru, ndipo ngwakumanyikwa comene cifukwa cakuti maji ghake ghakukamuka yayi. Nati nakumbuka umo nkhalongozgekera, nkhalazga ku malyero kuluta ku Wamblán, uwo ni mtunda wa makilomita 37.

Nkhendanga mu msewu wakusuzga, ndipo nkhambuka milonga 8 panji 9 yambura maularo. Mu msewu uwo nkhendanga mukaŵa tunkhwawu, ndipo galimoto yikacupuskanga fuvu. Enya, “nkharya fuvu” nga umo ŵanthu ŵa ku malo agha ŵakayowoyeranga. Pamasinda, nkhafika uko nkhapukwa, ku Wamblán ndipo ku malo agha kukaŵa makuni ghanandi.

Ca m’ma 4:30 nakausikusiku, waliyose wakaŵa kuti wawuka. Nkhawuka mwakutendekera cifukwa ca kulira kwa ŵatambala, ndipo nkhamba kwenda mu msewu. Palipose apo nkhendanga nkhapulika sungu la buledi.

Mu mphepete mwa msewu nkhawonamo vithuzithuzi vyakutowa vyakulongora paradiso. Pafupi na masitoro pakaŵa viphambano vyakucemelera malonda gha vyakumwa na vinyake vyantheura. Viphambano vinyake vikakumbuskanga ŵanthu za ivyo ŵawusi ŵa maboma ghatatu ghakumasinda ŵakalayizga. Nkhawonaso vimbuzi vyakuzengeka na malata, ndipo pasi pake pakaŵa silabu.

Nkhatawuzga ŵanthu mu ciyowoyero ca ku Nicaragua kuti Adiós. Ŵanthu ŵakanimwemwetera, ndipo ŵakayowoyanga nane mwacitemwa. Pakucezga tikayowoyanga mwakukwezga mazgu cifukwa ca congo ca ŵakavalo na mbunda ivyo vikajumphanga pafupi na apo tikaŵa.

Pa Cinkhondi namise ŵabali ŵakamba kwiza ku ungano wa mazuŵa ghaŵiri. Ŵanji ŵakenda pasi, ŵanji pa ŵakavalo, ŵanji pa galimoto. Tusepuka na tusungwana tunyake tukenda pasi kwa maora ghankhondi na limoza. Malo agho ŵakenda ghakaŵa ghakofya cifukwa mukaŵa mabomba ghakujimira pasi, kweniso mu mlonga uwo ŵakambuka mukaŵa sundu. Ŵanyake awo ŵakafuma kutali ŵakanyamura cakurya cicoko waka nga ni mpunga wa dende nkhumba. Kasi ŵanthu aŵa ŵakapukwa vici?

Ŵakiza kuzakakhozga cipulikano cawo. Ŵakiza kuzakategherezga nkhani zakufuma mu Baibolo. Ŵakiza kuti ŵazakakondweske Ciuta.

Zuŵa la Cisulo likakwana. Ŵanthu ŵakujumpha 300 ŵakawungana mu cishedi ca malata, ndipo ŵakakhala pa mabenci ndiposo pa mipando ya pulasitiki. Ŵamama ŵakapweleleranga ŵana ŵawo. Pafupi na malo gha ungano pakapulikikwanga kulira kwa nkhumba na nkhuku.

Kukamba kocha comene. Ndipouli, ŵabali ŵakalutilira kutegherezga comene ku ungano. Para ŵakuyowoya nkhani ŵakuŵazga Baibolo, nawo ŵakajuranga ghawo, ŵakimbanga sumu, ndipo ŵakategherezganga comene para mbali wakulomba.

Pa nyengo yakupumura nkhacezganga na ŵanji mwa ŵabali aŵa kweniso kuseŵera na ŵana. Pamasinda tikawonanga fundo izo ŵana aŵa ŵakalemba. Nkhaŵalongora vithuzithuzi vya nyenyezi na vipinga usiku pa kompyuta yane. Ŵana ŵakamwemweteranga, ndipo ŵapapi ŵawo ŵakakondwa.

Ungano ukaŵa nga wamara luŵiro comene, waliyose wakakhumbikwiranga kuwelera kwawo. Namacero ghake, nkhamba kuwerako, nkhakumbukanga vinthu viwemi ivyo vikacitika pa ungano uwu ndipo nkhakondwa cifukwa ca mabwezi agho nkhasanga. Nasimikizga kucita nga umo ŵabali aŵa ŵakucitira, na kusambira umo ningaŵira wakukhorwa kweniso kugomezga Ciuta.

[Cithuzithuzi pa peji 23]

Ŵabali ŵakenda mitunda yitali kuti ŵafike ku malo gha ungano ku Wamblán