Mafumbo Ghakufumira ku Ŵaŵazgi
Mu kalata iyo wakalembera Ŵahebere, mpositole Paulosi wakayowoya za “kaŵikiro ka mawoko.” Kasi wakang’anamuranga kwimika ŵalara panji wakayowoyanga za cinthu cinyake?—Heb. 6:2.
Palije cifukwa ca kughanaghanira kuti mazgu agha ghakung’anamura cinthu cimoza. Ndipouli, Paulosi wakwenera kuti wakayowoyanga za kaŵikiro ka mawoko ako kakacitikanga kuti munthu wapokere vyawanangwa vya mzimu.
Mbunenesko kuti Baibolo likuyowoya za kaŵikiro ka mawoko para likuyowoya za kwimika ŵanthu kuti ŵacite milimo ya Ciuta. Mozesi “wakaŵika mawoko ghake pa” Joshua apo wakamwimikanga kuŵa mulongozgi wakulondezgapo. (Dute. 34:9) Mu mpingo Wacikhristu, ŵanalume ŵakwenelera ŵakimikikanga mwakucita kuŵika mawoko pa iwo. (Mil. 6:6; 1 Tim. 4:14) Paulosi wakacenjezga za kuŵika mwaluŵiro mawoko pa munthu.—1 Tim. 5:22.
Ndipouli, Paulosi wakaciska Ŵakhristu Ŵacihebere kuti ‘ŵalutilire ku ulara’ pakuti ŵakaleka “kuyowoya na mitendeko.” Pamanyuma pake wakazunura za “kujimaso lufura lwa kung’anamukako ku milimo yakufwa, na lwa kupulikana na Ciuta, na lwa kusambizga kwa mabapatizo, na lwa kaŵikiro ka mawoko.” (Heb. 6:1, 2) Kasi kwimika ŵalara kungaŵa vinthu vyamtendeko ivyo Ŵakhristu ŵakwenera kuvileka na kukulira ku ulara? Yayi. Kuŵa mulara wa mpingo nchilato cakuzirwa ico ŵabali wose ŵakukhwima ŵakwenera kufiska.—1 Tim. 3:1.
Kweni pakaŵa cifukwa cinyake ca kuŵikira mawoko pa munthu. Mu nyengo ya Ŵakhristu ŵakwambilira, Yehova wakaŵakana Ŵaisrayeli ŵakuthupi, na kwamba kutumbika mpingo wa Ŵakhristu ŵakuphakazgika. (Mat. 21:43; Mil. 15:14; Gal. 6:16) Vyawanangwa vya mzimu vyakuzizwiska, nga nkhuyowoya malulimi, vikaŵa ukaboni wa kusintha uku. (1 Kor. 12:4-11) Apo Korneliyo na mbumba yake ŵakazgoka Ŵakhristu, ŵakapokera mzimu, ndipo cilongolero cake cikaŵa cakuti ‘ŵakayowoyanga na malulimi.’—Mil. 10:44-46.
Nyengo zinyake vyawanangwa vyakuzizwiska vikapelekekanga mwa kuŵika mawoko pa munthu. Filipu wakati wapharazga makani ghawemi mu Samariya, ŵanandi ŵakabapatizika. Wupu wakulongozga ukatumako mpositole Petrosi na mpositole Yohane. Cifukwa wuli? Tikuŵazga kuti: “Penepapo [ŵapositole ŵaŵiri aŵa] ŵakaŵikanga mawoko pa [ŵanthu awo ŵakaŵa kuti ŵabapatizika waka], ndipo ŵakapokera mzimu utuŵa.” Ici cikung’anamura kuti ŵakapokera vyawanangwa vya mzimu, na kucita vinthu ivyo ŵanji ŵakaviwonanga. Tikumanya ivi cifukwa Simoni, uyo pakwamba wakacitanga masalamusi, wakawona umo mzimu ukagwiliranga nchito ndipo wakakhumba kugura nkhongono iyi kuti nayo waŵikenge mawoko pa ŵanyake kuti waŵape mzimu utuŵa kuti nawo ŵacitenge vyakuzizwiska. (Mil. 8:5-20) Pamanyuma pake, ŵanthu 12 ŵakabapatizika mu Efeso. Tikuŵazga kuti: ‘Ndipo Paulosi wakati waŵika mawoko ghake pa iwo mzimu utuŵa ukiza pa iwo; ndipo ŵakayowoyanga na lulimi, na kucima.’—Mil. 19:1-7; yaniskani na 2 Timote 1:6.
Ntheura pa Ŵahebere 6:2, nchakuwonekerathu kuti Paulosi wakayowoyanga za kaŵikiro ka mawoko kuti vyawanangwa vya mzimu vipelekeke ku ŵanthu awo ŵakazgokanga Ŵakhristu.