Sendelerani kwa Ciuta
Wiske wa Ŵalanda
LEMBA la Salmo 68:5 likuti: “Wiske wa ŵalanda . . . ndiye Ciuta mu malo ghake ghakupatulika.” Mazgu agha ghakutisambizga fundo yinyake yakuzirwa yakukhwaskana na Yehova Ciuta. Ghakulongora kuti wakughanaghanira ŵanthu ŵakusuzgika. Dango ilo wakapeleka ku Ŵaisrayeli likulongora makora kuti wakufipira mtima ŵana ŵalanda. Tiyeni tisande lemba la Exodus 22:22-24, apo pakusangika mazgu ghakwamba mu Baibolo ghakukhwaskana na “mwana mulanda.”
Ciuta wakucenjezga kuti: “Mungasuzganga . . . mwana mulanda.” (Vesi 22) Mazgu agha ghakuŵeyelera waka ŵanthu kuti ŵawovwirenge ŵana ŵalanda yayi, kweni ni dango lakufuma kwa Ciuta. Mwana mulanda wakuŵavya munthu wakumuvikilira na kumovwira ndipo nchipusu kuti ŵanji ŵamucitire nkhaza. Mu nyengo yakale, palije uyo wakeneranga ‘kusuzga’ mwana mulanda mu nthowa yiliyose. Mu Mabaibolo ghanyake, mazgu ghakuti ‘kusuzga’ ghakulembeka kuti “kucitira nkhaza,” “kutombozga,” na “kulyera masuku pa mutu.” Kusuzga mwana mulanda yikaŵa nkhani yikuru mu maso gha Ciuta. Mwawuli?
Dango ili likutiso: “Usange tiuŵasuzge uli, ndipo ŵandililire Ine, nadi tindipulike kulira kwawo.” (Vesi 23) Mu vesi 22 dango ili likulazga ku ŵanthu ŵanandi, kweni mu vesi 23 likulazga ku munthu waliyose payekha. Munthu waliyose payekha ndiposo mtundu wose ukeneranga kupulikira dango ili. Yehova wakawonanga, khutu lake likategherezganga ku ŵana ŵalanda, ndipo wakaŵa wakunozgeka kuŵawovwira para wapulika kulira kwawo.—Salmo 10:14; Zintharika 23:10, 11.
Kasi nchivici cikate cicitikenge usange munthu munyake wakusuzga mwana mulanda, mwakuti wakulilira Ciuta? Yehova wakati: “Ukali wane unyekenge, ndimukomani na lupanga.” (Vesi 24) Buku linyake lakulongosora Baibolo likuti mazgu agha ghangang’anamuraso kuti ‘mphuno yane yizamocha,’ ndipo ghakulongora ukali ukuru. Wonani kuti mu Israyeli, Yehova wakalekera ŵanthu yayi kuti ŵeruzgenge nkhani iyi. Ciuta wakeruzganga yekha munthu waliyose uyo wakalyeranga masuku pa mutu mwana mulanda.—Duteronome 10:17, 18.
Yehova wandasinthe. (Malaki 3:6) Wakulengera lusungu ŵana ŵalanda. (Yakobe 1:27) Mungayezganga yayi kuyuzga ŵana ŵalanda cifukwa para mwacita nthena, Ciuta, uyo ni Dada wa ŵana ŵalanda wakukwiya comene. Awo ŵakusuzga ŵana ŵalanda ŵazamupona yayi “kutukutwa kwa Yehova.” (Zefaniya 2:2) Ŵanthu ŵaheni aŵa ŵazamumanya kuti “nchinthu cakofya kuwa mu mawoko gha Ciuta wamoyo.”—Ŵahebere 10:31.