Kasi Mukukumbuka?
Kasi mwakondwa na nkhani za mu magazini ghasonosono gha Gongwe la Mulinda? Wonani usange mungazgora mafumbo agha:
• Pakuŵa Ŵakhristu, cifukwa wuli nchakuzirwa kulutilira kucita urunji?
Para tikucita urunji ndikuti tikutemwa Yehova na kukhozgera muwuso wake ndipo tikulongora kuti Satana ni mutesi. Ndiposo Yehova wazamuteruzga kuyana na umo tikucitira, cifukwa kucita urunji nkhwakuzirwa comene kuti tiŵe na cilindizga ciwemi.—12/15, mapeji 4-6.
• Kasi mazina ghanyake agho ghakulongora mulimo wapadera wa Yesu pakufiska khumbo la Ciuta ni nga?
Mazina ghake ni agha: Kananda, Mazgu, Ameni, Muphemaniski wa phangano liphya, Musofi Mukuru ndiposo Mphapu Yakulayizgika.—12/15, peji 15.
• Cifukwa wuli Eliya wakaphalira muteŵeti wake kuti walaŵiske ku nyanja apo iyo wakalombanga vula? (1 Mathe. 18:43-45)
Eliya wakalongora kuti wakamanyanga makora umo vula yikupangikira. Mabingo agho ghakupangika pa nyanja cifukwa ca cithukivu ghakwenda mu mlengalenga, ndipo pamasinda ghakupanga vula.—1/1, mapeji 15-16.
• Kasi tingacita wuli kuti tisazgireko cimwemwe cithu mu uteŵeti?
Tinganozgekera mu mtima withu, kuwona umo tingawovwilira makora ŵanji. Ndiposo kupharazga na cilato ca kwambiska masambiro gha Baibolo. Usange ŵanji wakukhwaskika yayi na ivyo tikuŵapharazgira, tikusintha upharazgi mwakuti uyane na ukhaliro wa ŵanthu ŵa mu cigaŵa cithu.—1/15, mapeji 8-10.
• Kasi nthenda ya vyoni iyo yili kulembeka mu Baibolo ndiyo tikuyimanya lero?
Nthenda ya vyoni yikaŵako mu nyengo zakale. (Lev. 13:4, 5) Baibolo likuyowoyaso za vyoni ivyo vikatakanga vyakuvwara na nyumba. “Vyoni” ivyo vikuyowoyeka apa vikwenera kuti ni mtundu wa cuku. (Lev. 13:47-52)—2/1, peji 19.
• Kasi Mkhristu wakwenera kukhwaskika wuli na ivyo Baibolo likusambizga pa nkhani ya maluso ghanyake agho ghakucitika pa nyifwa?
Nangauli Mkhristu wangalira para uyo wakumutemwa wafwa, kweni wakumanya kuti ŵakufwa ŵakumanya kanthu cara. Iyo wakukolerana yayi na maluso ndiposo fundo yakuti ŵakufwa ŵakucita vinthu ivyo vingakhwaska ŵamoyo nangauli ŵanji ŵangamususka. Kuti ŵagege masuzgo, Ŵakhristu ŵanji ŵakulemba ndondomeko ya umo vinthu vingazakalongozgekera pa nyifwa yawo.—2/15, mapeji 29-31
• Kuyana na Salmo 1:1, kuti tiŵe ŵakukondwa tikwenera kugega vinthu vitatu vini?
Pa vesi ili pali kulembeka kuti “fundo ya ŵaheni,” “nthowa ya ŵakwananga,” ndiposo “mphara ya ŵakuconjora.” Ndipo nadi, kuti tiŵe ŵakukondwa, tikwenera kugega awo ŵakuconjora malango gha Ciuta. M’malo mwake, tikwenera kusangwa na malango gha Yehova.—3/1, peji 17.
• Kasi “buku la Jashar” na “buku la Nkhondo za Yehova,” ni mabuku gha mu Baibolo agho ghali kuzgeŵa? (Josh. 10:13; Maŵa. 21:14)
Cara. Vikuwoneka kuti mabuku agha ghakalembeka mwakovwirika na mzimu wa Ciuta yayi, ndipo ghakaŵapo mu nyengo zakale, nakuti ŵanji mwa awo ŵakalembanga Baibolo ŵakawonangamo.—3/15, peji 32.
• Kasi Baibolo la sono la Cilatini liri kusinthika wuli?
Mu 1979, Pope John Paul II wakazomerezga kung’anamulika kwa Nova Vulgata, ilo ni Baibolo liphya la Cilatini. Mu Baibolo ilo likasindikizgika pakwamba, mukaŵa zina la Ciuta, Iahveh (Yehova), mu malo ghanyake. (Ex. 3:15; 6:3) Ndipouli, peneapo Baibolo liphya likasindikizgika mu 1986, zina lakuti Dominus [Fumu] ndilo likahara umo kale mukalembeka kuti Yehova.—4/1, peji 22.