Mafumbo Ghakufumira ku Ŵaŵazgi

Mphawuli apo Satana wakaponyeka pasi?—Uvu. 12:1-9.

Nangauli buku la Uvumbuzi likuyowoya yayi nyengo yeneko iyo Satana wakaponyekera pasi, kweni likutiphalira vyakucitika ivyo vingatovwira kughanaghanira nyengo iyo wakaponyekera. Cimoza mwa vyakucitika ivi ni kukhazikiskika kwa Ufumu wakuwusika na Mesiya. Pamasinda pake, “kukawuka nkhondo kucanya” ndipo Satana na ŵangelo ŵake ŵakathera na kuponyeka pasi.

Malemba ghakulongora pakweru kuti: “Nyengo zakutemeka za mitundu” zikamara mu 1914 ndipo Ufumu ukakhazikiskika.a (Luka 21:24) Kasi kufuma pa nyengo iyo kufika apo nkhondo yikawukira na kuponyera Satana pasi, pakatora utali wuli?

Pa Uvumbuzi 12:4 pakuti, “cinjoka [uyo ni Satana] cikalutilira kwimilira panthazi pa mwanakazi uyo wakaŵa pafupi kubaba, kuti para wababa cimyangure mwana wake.” Ici cikulongora kuti Satana wakakhumbanga kuparanya Ufumu uphya uwu apo ukababikanga. Nangauli Yehova wakatondeska Satana kufiska maghanoghano ghake ghaheni, kweni Satana wakayezgayezga kuti waparanye Ufumu uphya uwo ukakhazikiskika waka. Lekani cikaŵa cakwenelera kuti “Mikayeli na ŵangelo ŵake” ŵaponyere pasi “cinjoka na ŵangelo ŵake,” mwakuti ŵaleke kuparanya Ufumu. Ici cikulongora kuti Satana wakathereskeka na kuponyeka pasi pamasinda pakuti Ufumu wababika mu 1914.

Fundo yinyake iyo tikwenera kughanaghanirapo nja kuwuskika kwa Ŵakhristu ŵakuphakazgika uko Malemba ghakulongora kuti kukamba pamasinda pa kukhazikiskika kwa Ufumu.b (Uvu. 20:6) Pakuti Malemba ghakuyowoya yayi kuti ŵabali ŵakuphakazgika ŵa Khristu ŵakaŵa nayo pakurwa nkhondo ya kucimbizga Satana na viŵanda vyake kucanya, kuwuskika kwawo kukwenera kuti kukamba pamasinda pa kuthereskeka kwa Satana.

Ntheura Baibolo likuyowoya nyengo yeneko yayi apo Satana na viŵanda vyake ŵakaponyeka pa caru capasi. Kweni pali ukaboni wakuti ivi vikacitika apo Yesu Khristu wakhazikiskika pa citengo mu 1914.

[Mazgu ghamusi]